San Pra Ai Mother Teresa A Labau Lam Daw 2, 14 August 2018.

          Tsawra ai nu wa hpu nau ni, Mungkan ntsa hta asak naw hkrung nga ai ten kaw nna “ Living Saint” Asak hkrung ai san pra ai masha ngu nna tsun kajai Gumhkawng mat wa sai Mothter Teresa a labau lam hta na myit lawm hpa kasi ningli ni hpe hkaja yu ga.

          Nu wa hpu nau ni, Madu a shaning 1962 hta Tsawra matsan dum ai magam hta lak lai shakut ai Mother Teresa hpe India Asuya Up hkang hpung hku nna, shagrau ai kum hpa ap jaw ya mat wa ma ai, dai shaning hta sha Ndai philippnes mungdan kaw na shagrau ai, sinpraw Asia mungdan ni hte seng ai, Masaysay Kumhpa hpe mung hkap la lu nu ai, dai aten hta Mungkan mungdan ni re ai, Africa, Austalia, England, Nicaragau, Cuba, Russia, the Uropa dan ni hta shi a ma ma hpung hpe hpaw nhtan da lu nu ai. 1969 ning March shata praw (3) ya shani, Wasarabyin Paulu (6) kaw nna shi a tsawra matsan dum ai magam bungli hkrun lam hta jai lang lu na matu Mawdaw  langai shagrau dat nu ai, rai tim dai hpe shi njawn ai sha $ Dolla 98,000 the dut kau nna dai gumhpraw hte Mang gang kap ai ni hpe tsi shamai na matu tsi rung gap ai hta jai lang mat wa ai, dai hte maren India mungdan asuya hkun nna mung, shi a tsawra matsan dum ai magam hkrun lam hkawm ai shaloi, Nbungli, Hkarang leng, Wan leng shabrai njaw ai jawn lu na matu lajang ya lai wa sai. Mother Teresa gaw shi a tsawra matsan dum ai magam grau  grau nna awng dang wa nna, 1979 Oct 17 ya shani mungkan ngwi pyaw simsa Novel Kumhpa shagrau ai hkrum nu ai, dai shaning hta sha, American, England mungdan ni kaw nna shagrau ai kumhpa, Wa sarabyin Yohan (23) kaw na shagrau ai kumhpa hpe mung hkam la lu nu ai.

          1979 Dec 10 ya shai gaw Noway mungdan a hkaw hkam wa shagrau ai Kum hpa. 1980 ning hta gaw shi a ma ma jawng ni hpe Lebonon, sinna Germany, Yugoslavia, Mexico, Brazil, Peru, Kennya, Haiti, Spain, Ethiopia, Belgiam, New Guinea, Argintena, Soviet mungdan, Albania the Cuba ngu ai Rusia mungdan ni hta bai hpaw hpang jat lu ma ai. 1988 ning Mya shata 21 ya shani gaw Roma mare Vatican kaw e jawng langai bai hpaw nhtan da lu sai. Tsawra ai nu wa hpu nau ni ndai zawn Mother Teresa a tsawra mastan dum ai magam gun hpai ai Mama hpung ni gaw Nhkring nsa Bungli galaw shakut ai lam chye lu ai shaloi, masha yawng gaw myit n’gun lu ai hte shang lawm shakut mayu ai ni nga wa ma ai, dai hte maren 1963 hta Tsawra matsan dum ai Bro. Uhpung, 1976 hta ( Contemplative ) ngu ai aten tup akyu hpyi shakut ai Mama ni the, 1979 hta Bro Uhpung langai hpe hpaw nhtan da lu ma ai. Bai nna Mother Teresa a mama uhpung ni gaw hkum hkrang hta ra kadawn ai hpe sha hkye ai nre, wenyi lam hpe hkye mawai lu na matu Tsawra matsan dum jau hpung hpe mung hpaw nhtan da mat wa sai lam chye lu nga ai. Ndai zawn Jau, Ma ma, Bro uhpung ni sha n’ga, Lay Missionary ngu ai Yu maya hpung masha ni law law mung ndai magam hta shang lawm ap nawng nga ai daini du hkra rai nga ma ai.Mother Teresa gaw shi a magam gun jau, mama, Bro ni hpe, ndai magam bungli shakut ai ten hta akyu hpyi chye ra ai, myit masin hta tsawra matsan dum ai sasana magam re ngu nna galoi mung myit dum ra ai nga nna tsun shadum dum re da. 1981 ning hta, Chyoi pra ai hkum a san seng ai jau ni ngu mying ai jau hpung hpe mung hpaw nhtan da nna Chyoi pra hkum kaw sa nna aten tup akyu hpyi htinglu htinglai ap nanwg ai lam hpe mung galaw ma ai lam chye lu ai. Ndai zawn Mother Teresa a tsawra matsan dum ai magam, lawan ladan rawt jat kalu kaba awng dang mat wa ai, Hpa majaw  kun??? ngu nna maram yu ai shaloi, magam bungli shachyen shaja ai lam hta shakut ra ai zawn, k,k, hpe kam sham let akyu hpyi ai lam hta mung atsam dat ra ai lam hka ja la lu nga ai. Tsawra ai nu wa hpu nau ni, Mother Teresa a magam bungli hpe myit lawm nna mungdan shagu kawn shagrau ai kum hpa ni hti she ndang rai mat wa ai, Hpa majaw kun ngu nna loi li sum ru yu ga, Mother Teresa gaw kaji dik ai magam bungli hpe kaba dik ai Tsawra myit hte Amyu hpung n’gin hka masha ru sai n’ginhka masha hkum shagu hpe manu shadan ai myit masin atsam hte  k,k, hpe shagrau ai kaba dik ai kum hpa re ngu nna myit la lu nga ai. Dai majaw anhte a prat hta mung k,k, hpan da ai masha shagu hpe manu shadan hkat chye na matu myit dum la mai nga ai, Nawku hpung shada da, Arawng aya kaji kaba, lu su ngamai ai lam hpe nyu ai sha, shada myit hkrum let k,k, a tsawra myit hta kahkin gumdin nga ra ai lam hpe mung shadum ya nga ai. Bai nna 1986 ning  Feb shata hta wasarabyin John Paul II India mung de sa du dam ai shaloi Mother Teresa a jawng ginjaw Culcutta mare kaba de sa du gawan lai wa sai. 1988-89 laman hta mung Mother Teresa gaw nhkring nsa shakut let pu ba nna hkam kaja lam loi li ningra wa ai hte tsi rung lahkawng lang rawng ra mat ai, Tsi rung yu nna mai hkam kaja wa sai hte gaw, shawoi na hte maren matsan dum garum ai magam hta nhkring nsa atsam dat shakut mat wa ai, mungdan law law ni hta hpaw nhtan da ai shi a jawng ni the matsan masha ni hpe yu lakawn ai dabang ni de du hkawm gawan gatsan ai. 1990 ning sep; shata hta gaw Mossionnaries of Charity Ma ma hpung a Ma Ma kaba hku nna kalang mi bai kahtap lata tang da hkrum ai, dai aten hta shi a asak (80) ning rai sai majaw hkam kaja lam nau nnga ai hpe mu lu ai. Nu Wa ni, Mother Teresa a sak hkrung hkawm sa ai prat hkrun lam hpe bai n’htang sum ru yu shaloi, mau hpa a’tsam rawng ai shayi sha re hpe mu lu nga ai. chya-sam mungdan de myu sha n’bung, ru sai n’bung ai ginra de sasana magam hta awng dang hkra shakut mat wa ai rai nga ai. Mother Teresa a magam bungli gaw Madu karai kasang ra sharawng ai magam bungli re lam dan dawng mu mada nga ai law.