San Pra Ai Ni A Labau, August 07, 2018

SAN PRA AI MOTHER TERESA A LABAU LAM ( Daw 1 )

           Tsawra hkungga ai nu wa hpu nau ni, Mungkan ntsa hta asak naw hkrung nga ai ten kaw nna “ Living Saint” Asak hkrung ai sanpra ai masha ngu nna tsun kajai Gumhkawng mat wa sai Mothter Teresa a labau lam hta na anhte a prat a matu kasi  yu la mai ai lam ni sum ru yu ga.

          Mother Teresa gaw, madu a shaning 1910 ning August shata 26 ya shani Macedonia Mungdan skopje ngu ai mare kaw shangai wa ai re, kanu yan kawa gaw Yi sun hkau na bungli galaw sha ai yan rai ma ai, shan nau ni marai (3) kaw na Mother Teresa gaw kaji hpung dim mahtang rai nga ai. Shi a kaji yang na kashin kamun mying gaw Aganes ngu ai rai lu ai. Mother Teresa a kawa gaw, 1919 ning hta nnga mat sai, kanu gai da jan gaw k,k, hpe kam hpa chye ai, kasha ni hpe mung atsawm sha yu woi awn sharin chye ai, dai majaw shan nau ni yawng gaw myitsu hpaji chye ai ni rai nga ma ai, ndai zawn myit su let Mothter Teresa gaw, DOUTHERS OG MARY ngu ai uhpung kaw shang nna tara laika the mahkawn mangoi ni sharin la lu ai majaw grai kabu myit dik nga ai, dai the maren kaji ten kaw nna sasana majen je ai, magam lam hta grai myit lawm shakut mat wa ai rai nga ai.

          Bai nna Nawku hpung na share shagan ning hkring ni, san pra ai masha ni a ahtik labau ni hpe hti hka ja la chye ai jan re. Mother Teresa shan nau ni shada da grai chye tsawra hkat ai, matsan mayan re ni hpe mung grai matsan dum chye ma ai da, shanhte kaw sa hpyi sha ai ni hpe galoi mung Madu Yesu a myit man tau let yawng kahpu kanau ni hkrai re nga nna  jaw sha chye ai nga nna tsun ai. Sasana magam hta myit lawm ai Mother Tresa gaw, Asak 18 ning hta SISTERS OF OUR LADY OF LORETO ngu ai Ma ma uhpung hta shang lawm magam gun mat let Ma ma ni hte seng ai hpaji ningli ni hpe sharin hka ja la rai nna 1931 ning May shata 24 ya shani Madat mara ai, Matsan mayan ai, Chyoi pra San seng  ai  Ndai ga sadi (3) hpe hkam la nna Ma ma prat hte sasana magam gunhpai mat wa ai, Teresa ngu ai mying gaw Ma ma tai ai shaloi na jan mau mying rai nga lu ai. Mothter Teresa Mama tai ai shaloi Teresa ngu ai mying hpe la ai a lachyum gaw Madu Yesu tsawra ai san pra ai Teresa a kasi la mayu ai majaw re nga nna chye lu ai. Mother Teresa gaw Mama tai wa ai hpang Pyintit mungdan kaw nna India mungdan Calcutta mare kaw hpaw nhtan da ai shanhte a mama hpung ni up hkang ai san pra ai Mary ngu mying ai hpaji jawng hta, Lamu ga hpaji hte Labau hpaji saranum magam gun hpai na lit shatsam hkrum ai, kade nna ai Jawng up mama kaba aya tang da hkrum nna 1946 ning du hkra kang ka ai hte gun hpai lai wa sai.

           1946 September shata 10 ya shani myit sumru wut sawk galaw let, akyu hpyi sumru nga yang, k,k, lak san shaga la ai hpe hkrum nu ai, dai lak lai shaga la ai lam gaw, matsan mayan ru yak jam jau hkrum ai ni, lu na sha na nlu, shingbyi shara dum nta nlu ai ni, ana zinli kap ai ni, machyi makaw hkrum hkra ai masha ni hpe yu lakawn na magam rai lu ai, dai lam hpe k,k, kaw kam sham myit hte hpa mung myit ung ang ai lam nnga Ap nawng shakut na matu myit daw dan lu ai hte shanhte a Mama kaba hpang de ahkang hpyi la nna, dai Mama hpung kaw na pru mat wa sai. Mother Teresa gaw machyi makaw ai ni hpe yu gawn lajang lu na matu tsi hpaji hpe sharin la nna matsan dik ai masha ni nga ai lawk de sa nga nhtawm dai magam hpe hpang dat lu nu ai. Mother Teresa gaw shi a magam grai nhpang yang Chyoi pra hkum kaw sa akyu hpyi n’gun ban la nan Rosary sha noi da rai yi ngam de rawt sa sa re da. shi a shani shagu na magam bungli gaw lam makau hkan si maw nga ai ni, kanu kawa ni kabai da ai ma kaji ni, Ahpye  alam Ana kap ai ni, lu na sha na nlu, kaw si hkrum nga ai ni hpe yu lakawn ai magam rai nga lu ai.

           Ndai zawn Mothter Teresa a ap nawng ai magam nnan hpang ai ten hta shi kaw Gumhpraw lap (5) sha lu ai re da,  shi a n’gun atsam marai hpe kam ai nre, k,k, a tsawra matsan dum lama ai lam hpe, matsan jam jau ai masha ni hku nna shadan shaleng ya lu na myit mada let shakut shaja ai lam rai nga lu ai, nau matsan ai majaw jawng nlu lung ai ma (5) hte shawng nnan jawng hpaw hpang lu nu ai, Laika ka na lung pa, Kam gu, Hkye dan nlu mari ai re majaw Ga kaw shingna hte ka mahkret let laika ka sharin ya nga ai hpe makau kaw lai wa lai sa masha ni yu mau ma ai da. Mother Teresa hku nna 1950 ning Oct shata hta Tsawra matsan dum ai Ma ma hpung ( Charity of Missionary ) ngu ai Mama hpung hpe hpaw hpang lu dat nu ai, shi a mama hpung ni a sang gan gaw yu maya India amyu shayi sha langai zawn, Sar-ri rai malu ai, shanhte a mama hpung gaw Calcutta mare kaw sha n’re India mung shara ni law law hta mung Mama ni sa du magam gun hpai mat wa ai.

          1951 ning hta, machyi masha ni, si maw ai ni shanu shingbyi na matu, shara lu shap la nna, shara shagu hkan na machyi masha ni, si maw ai ni hpe lahkawn tawn da nhtawm atsawm sha si wa lu mu ga lajang ya ma ai. Mother Teresa a magam bungli lani the lani galu kaba wa ai the maren, 1960 hta gaw, wa sara byin a ahkaw ahkang the mungkan mungdan ni law law de Ma ma marai 3000 jan sasana magam gun hpai lai wa ma ai. Tsawra ai nu wa  hpu nau ni ndai Mother Teresa a tsawra matsan dum ai magam bungli gaw k,k, a ra sharawng ai magam re  lam dan dawng nga mali ai law.

ka Lajang ai wa - Mama Rose Angeline Maran Nang Doi

                          Myitkyina, RVC Ginjaw Rung.