Yup Mayu Ai Myit Hpe N Shingdang Kau Ga

Yup hkring sa la ai ngu ai gaw masha langai a shingra mabyin masa langai rai nga ai.Atsawm sha yup la ai a marang e hkum hkrang hkring sa lu nna masha gaw hpang shani e a san awan,zet zet tsang tsang nga nna hkawm sa shamu shamawt lu na rai nga ai.Lama shana atsawm n yup la ai,yup n hkru ai rai yang  hpang shani mung anun anai nga nna nga n pyaw ai,bungli galaw n pyaw ai hte aten na wa jang hkamja lam hta hkra machyi wa na gaw teng sha rai nga ai.

Yup npyaw ai ana gaw nbyin nmai tsi lajang ra ai hkamja lam mang hkang langai mung rai nga ai.Dai hta grau sawng ai gaw yup mayu nga ninglen shanang nna n yup ai sha nga ai gaw hkamja lam hta hkra machyi wa lu nga ai.Kalang lang sumla hkrung yu ai,internet lang,facebook yu ai,game ginsup ai,shing nrai bungli n ngut ai majaw bungli matut galaw taw ai dai zawm lama ma a majaw yup ten du sai,yup mung yup mayu nga ninglen yup mayu sharang nna nga taw ai lam ni byin chye nga ai. Dai zawn yup mayu ai hpe sharang nna nga shalai ai aten na wa ai rai jang myit maju jung lu ai lam hta ningra wa ai,myit sawn sumru ding lik chye ai lam yawm wa ai,matsing sumhting lu na atsam yawm wa ai,myit dawdan ai lam hta dawdan shut ai lam law wa ai,n gun lapyin ni yawm wa ai,myit hkam sha lam galai shai lawan ai ndai zawn re ai mang hkang  lam ni shawng byin hpang wa chye ai.

Yup mayu ai myit hpe aten na na gaw masha kadai mung nlu sharang jin nga ai.Rai tim dai hpe shanang nna jahkring hkring galaw ai rai jang hkamja lam hta hkra machyi hkrum wa na ga ai re.Dai majaw  hpa lam a majaw mi rai rai grai yup mayu ai hpe coffee lu,hkri hpa namsi zawn re ai lama ma sha nna yup mayu shabran la ai akyang hpe n shamawn da ga,aten na na nrem da ga ngu tsun shadum ya mayu ai.

Kaning re ai hkamja lam mang hkang ni byin wa chye a ta nga jang gau ngwi ngwi akyang byin wa nna yup npyaw ana lu wa chye ai hte jitdwi saidwi ana,ladu lai hpum ai ana,salum ana,hormone nru nra byin wa ai,lagaw lata makret machyi ai,hkum hkrang hkamja lam sha n-ga ,myit hkamja lam hte seng ai mang hkang ni hkrum sha ra wa chye nga ai.Dai majaw yup mayu ai ten hpe sharang nna yup ten shalai kau ai akyang gaw hkamja lam hkra machyi shangun ai a npawt madung langai hta lawm nga ai re.

Yup mayu ai ngu ai gaw na a hkum hkrang gaw yup hkring sa na ra ai majaw hpyi shawn wa ai lam rai nga ai.Dai majaw yup ten hta yup mayu jang yup kau dat ai gaw kaja dik rai nga ai.Dai hku nre sha,yup mayu ai myit hpe shaprai shamat kau nna shani hte shana yup ten shut taw ai,yup ten nman ai,yup ten hpring tup n yup ai lang law wa jang hkamja lam hta hkra machyi hkrum hpang wa sai.

Dai re majaw yup hkring sa la ai ten hpe shi aten hkrak rai yup lu hkra akyang galaw shaman da na gaw hkamja lam a matu grai ahkyak ai hta lawm nga ai,shani shagu aten man man hte jaw ai masa lam hku yup ten hpring tup jaw nna hkru hkru yup hkring sa ya na ra ahkyak ga ai ngu kahtap tsun shadum n gun jaw mayu ai.

Masha gaw yup hkru ai rai yang she azet atsang asan awan nga nna galaw ai magam bungli lam shagu hta myit lawm hkum lawm hte atsawm sha galaw awng dang lu na,bawnu mung asan apan nga nna myit mang sawn sumru ai lam,myit maju jung lu ai lam ni hpe mung atsawm sha galaw lu na rai nna hkum hkrang myit masin hkam kaja ai hte myit mang galaw sa ai lam ni hta awng dang ai akyu law law hpe hkam la lu na rai nga ai.Yup ten hpe manu n shadan,yup ten shalai nna nga ai akyang hpe aten galu galaw taw ai rai yang gaw myit hkamja lam,hkum hkrang hkamja lam hta hkra machyi hkrum na akyu yawm ai lam ni sha grau byin pru wa chye ai hpe myit dum nna yup ten hpe manu shadan ga,yup mayu ai myit hpe n shingdang kau ga ngu n gun jaw tsun shadum ya dat lu ga ai.

Lamang tang madun ai - Julia Ja Ing