Yung Padi Hpun Hpa Majaw Htoi Nsam Byin Ai Lam

Yung Padi (Gumbaw) Hpa Majaw Htoi Nsam Byin Ai Lam

  Yung padi hpun hpe lanam ta hta hkai nga ai zawn n shung ta hta mung hkai nga ma ai.Nkau hka lu ai buga ginra ni hta ginhtawng ta hta mung hkai nga ma ai.Aten garan nna hkai mai ai majaw shaning ting hkai shapraw mai nga ai majaw shang gumhpraw lu ai nsi nai si amyu hpan langai rai nga ai.N-shung ta hte ginhtawng hta gaw Nov-April shata duhkra hkai nna Lanam ta hta gaw May-Oct duhkra hkai ma ai.Ga amyu hpan nla ta ai sha hkai mai nga tim grau na namhpun kaja ai zaini ga ni hta grau na kajal u ai.Bai na Lamung si hte yung padi,Mahkaw si hte Yung padi,Sanap hka hte yung padi n dai zawn shani galu nsi nai si hpun ni lapran hta mung lapran matep hkai ai n si nai si hkai sun hku na mung galaw hkai sha mai nga ai.

  Lanam ta hta hkai na rai yang marang law ai buga ginra ni hku na hkai sun shara hta hka n -ung na matu hkai bawng hpe loi tsaw tsaw galaw hkai nna kawng re ai shar ani hta hkai yang kaja ai.Yung padi hpun gaw hka ing jang hpun n kaba nna lap makrung ni n tsit ai sha htoi n sam byin chye ai.N dai Yung padi hpe bra ban bawng galaw nna hkai ai zawn tum hpe kalang ta jahkrat hkai ai mung nga ai.Bra bawng galaw nna bra ban hpe htawt sit hkai ai ten hta hka law nga yang (sh)hpun machyi nga yang hpun ni htoi nsam byin wa chye ai.

  Hpun a matu Pulay namhpun n bang yang mung Nitrogen dat ningra nna lap ni htoi wa chye ai.bai Jai lang ai law mat yang mung hpun ni ndang hkam na lap ni magyi htoi mat chye nga ai.

Hkayi ana- Hkai sun na ga hta kamu/shu lamut ni nga yang dai a majaw hpun nkaja nna htoi nsam byin wa ai.

 Baina hka jaw ai law mat yang mung hpun htoi nsam byin wa chye nna,law malawng gaw namlaw namlap ni gaw hka dat law law ra nna hkai bawng hta hka n ding hprut hkra jahpot kalang shana daw hta kalang madi ai daram sha jaw ya yang kaja nga ai.

  Virus ana a majaw lap,makru ni hta teng pang hkang ni,tsit ai ntsa hta htoi nsam teng pang hkang byin nga ai ni mung nga chye ai. Ndai zawn teng pang hkang byin ai gaw hkai sun hta chyup sha latung,pya latung,……,chyinu hpraw ni du hkrat nna latung ni kaw na ana zinli ni lawm wa nna hpun hta ngam taw ai lam rai nga ai.

  Lap chyup sha latung ni hpe hpun ting chyang ai latung sat tsi hpe jai lang nna makawp maga mai ai.Ana n kap hkra na matu n nan byin wa ai hpun hpe hkai sun kaw na baw kau ya ra ai.Hkai sun makau hta Majap,yang yi,pasi,ndai hpun n inga yang mung ana kap hkra lu nga ai.. Lap hkraw ana,hpun kyip kap rai ana byin yang mung hpun ni htoi nsam byin chye ai.Tsing ban ni kaw na mung latung ana ni kap hkra lu ai majaw tsing ni hpe ladat hte hkrak jasan jaseng la kau ya ra ai.Virus a majaw byin ai ana re yang byin nga ai hpun hpe baw kaw nna wan nat kau u.Hka a majaw byin ai re yang Hkai bawng galaw nna hkai ai hku na Hka a  majaw byin ai lam hpe hkyam sa shangun lu nga ai.