Wa Machyi Ana Mai Ai Maling Ga Lap

Maling Ga Lap

Maling ga lap hte ana ahkya amyu myu hpe tsi shamai ya lu ai hta wa machyi ana a matu mung grai hkrak ai shingra tsi lap rai nga ai. Wa machyi ana gaw aten ntam shana yup tung hkan mung ndang sharang na zawn nga  machyi shoi chyum byin chye ai hpe  wa machyi ana lu ai masha ni hkam sha yu na ga ai re.

Dai zawn byin wa ai aten ni hta tinang a makau grupyin na maling ga lap hpe myit dum dat ga. Maling ga lap loi ginsa na ga sai pa ( 10 ) daram hpe di la nna hka hte shawng asan sha kashin kau dat u. Dai hpe ngoi shing nrai, di langai ngai hta hka gawm mi daram bang nna grai prut hkra shadu dat u. Jum loi mi bang shadu tim mai ai. Hka loi mi hkyet ai hpang gaw maling ga lap hta na hkup ai ntsin lu na ra ai. Dai hpe htawn la nna, loi naw katsi shakawp da u. Shakawp da ai ntsin loi mi lum lum rai jang dai ntsin hpe minute mi, minute lahkawng dang na hkra ma-um nna bai prat kau shing nrai, dai ntsin hte n gup garu kashin ya di ai rai jang wa machyi ai ana a ningdaw mi rai hkyamsa mai tsai mat lu na ra ai. 

Wa machyi ai lam n nga ai raitim pyi wa machyi ana lu ai,wa latung sha ai, wa use se ai, wa uji machyi ana lu ai masha ni rai yang maling ga hpe shadu nna n gup garu, n gup krang ya ya di ai rai yang wa machyi ana kaw na tsan gang mat na ra ai.

Tsawra ai shiga madat nu wa hpu nau ni ya na zawn mung masa nsim sa, gasat  gala byin nna majan koi yen hprawng hkawm ra ai ten ni hta machyi makaw ana ahkya ni byin wa yang kalang ta tsi rung tsi gawk sa na yak ai, tsi mari lu, mari sha na yak ai aten ni hta ndai zawn rai tinang a makau grupyin hta nga ai shingra tsi hkrung tsi nan ni hpe chye tawn da na grai nan ra ahkyak la nga ai. Shingra tsi hpun, tsi lap, tsi ru ni hpe akyu jashawn jai lang chye ai rai yang, manu jahpu law law jaw nna mari lu, mari sha ra ai jak tsi ni hta grau manu dan ai tsi mawan kaja, tsi hkrung tsi nan ni rai nga ai.

Ndai maling ga lap mung akyu jashawn jai lang chye ai rai yang ya sha tsun ai wa machyi ana grai mai tsai lu ai zawn kan mase machyi mai ai, ningma hkra la yang mai ai, jitdwi sai dwi ana hte kaga ana ahkya ni law law hpe mai tsai shangun lu ai shingra tsi lap nam si hpun rai nga  ai ngu tsun shana garan kachyan ya dat lu ga ai.

 

By - Julia Ing 

Add new comment

2 + 0 =