Uma Bum Ga Daidaw Let, Layang Ga Nga Kaba wa ai, Yungwi Shadang ( 06 OCT 2019 )

Nawku hpung lamang hte manaw manang ni garum hpyi wa shagu, galoi mung Yungwi Nsen hte shang lawm garum ya nga ai, Yungwi Shadang Lahtaw Dai Li.

Yak hkam jan jau ai lam ni law law a lapran, Shawng Nnan lang na, “ Buga Na Tsaw ” Mahkawn Album hpe galaw la lu let, kade nna ai aten hta mung chying sha ni hpang de du wa sana rai nga ai.

Dum Nta Masha ni a lam

Daini na Ramma ni law malawng, tinang myit lawm ai magam hpe galaw shakut hkawmsa nga ai hta shingni magam mung lawm nga ai. Dai zawn re ai shingni magam hta shang tsap let, kade nna ai aten hta, Shawng Nnan Lang na, Mahkawn CD Album hpe shapraw na rai nga ai, Yungwi Shadang Lahtaw Dai Li mung lawm nga ai.

Shi hpe gaw, lai wa sai, 1984 ning, October shata (12) ya shani, Kachyihtu Jau Ginwang, Mung Ra Yang (Sh) Hka Htu Mare hta, Chyinghkai Kanu Maria Hkan Yang Htu Bu hte Chyinghkai Kawa Bosco Lahtaw Hting Nan yen kawn shangai chyinghkai wa ai rai nga ai.

Kahpu kanau marai (11) rai nna, marai (4) gaw n nga mat sai hte ya gaw shan-nau ni marai (7) asak naw hkrung nga ai. Sara Dai Li gaw, Ma La Mahtang rai nna, Shi a mying shing teng shamying ai hta lak lai ai lam hpe san yu yang, “ngai shangai chyinghkai wa ai ten, Shadai Gali nna, shangai wa ai majaw, Shadai Gali (Sh)  Dai Li hpe la nna, Lahtaw Dai Li ngu shamying la ai re da”, nga nna shi hkum nan tsun dan wa ai.

Hpaji Hkaja La ai hkrun lam

Ndai zawn rai nna, dai daw buga Mung Ra Yang hta laika hpaji sharin jawng n nga ai majaw, Minutes 45 ram lagaw lam hkawm sa ra ai, Pan Lawng Yang lawu tsang jawng hta, Jawng Kaji kawn Tsang (2) du hkra hpaji sharin hkaja la let, tsang (3-4) hpe gaw, Mali Bumrun Jawng hta hkaja la lai wa sai.

Lapran tsang jawng hpaji hpe gaw, N Gum La mare hta hkaja la nna, Lahta tsang hpaji hpe gaw, Myitkyina, Masat (5) Lahta tsang jawng hta sharin hkaja la lai wa sai.

Dakkasu hpaji hpe gaw, Myitkyina Dakkasu hta hkaja la lu sai rai nga ai.

Jawng Sara Lit Magam

1999 Ning kawn 2016 ning du hkra, Hpaji Dap hte Jawng Sara Lit magam hpe gun hpai lai wa sai re.

Shingni Hkrun Lam Hkawmsa wa ai lam

2000 ram ning kawn, shingni hkrun lam de shang tsap wa sai rai nna, daini du hkra shi ka shalat da ai mahkawn gaw, Buk (10) jan ram rai nga sai. Ya shapru na Mahkawn Album hpe gaw, 2019 ning, March shata (20) jan kawn hpang wa ai rai let, Mahkawn Buk (10) lawm nga ai.

Ngwi Pyaw ai dinghku hkrun lam hte Magam Bungli

Sara Lahtaw Dai Li a nrum ntau jan gaw, Myitkyina, Sanpra na rai let, ya ten, kashu kasha marai (2) hte ngwi pyaw ai kun dinghku hpe madu da sai rai nga ai.

2018 Ning, July Shata kawn, 2019 Ning, August Shata du hkra, Myitkyina Mare kaba hta daju ai, Humanity Institute (HI) wuhpung wuhpawng hta magam gun lai wa sai rai nga ai.

Ya ten hta gaw, dum nta magam hte Nawku hpung kata, buga kata hta ra nga ai magam lam ni hta dang lu ai daram shang tsap garum taw nga ai rai nga ai.

Ramma ni hpe n gun jaw dat ai lam

Sara Dai Lai kawn ramma ni hpe n gun jaw dat ai lam hta, “Ndai shingni hkrun lam gaw, si mani ai ladat hte hpaji jaw ai lam rai nna, myit simsa ai lam hpe mung jaw ya lu nga ai.” nga ai.

“Tinang a ra sharawng ai amu magam hta aten hpe majoi n lahpawt kau ai sha, shakut sa wa ga.” nga nna matut tsun n gun jaw dat nga ai.

Sara Lahtaw Dai Li galoi mung myit hta bang da ai lashum ga gaw, “Shakut yang nmai byin ai lam hpa n-nga ai” ngu ai rai nga ai.

Presented by

Sister Rose Angeline Maran Nang Doi

RVA-Kachin Service Office

Myitkyina