Tsi Kaba Tai Ai Chyahkya Si

Chyahkya si hpe anhte yawng chye ga ai hte maren shingra tsi mawan kaja, mungding tsi mawan kaja langai hku nna mung akyu jashawn jai lang chye ai ni nga ga ai re. Chyahkya si gaw hkum hkrang hkamja lam a matu kaning re ai akyu ni hpe jaw ya lu ai re kun ngu ai hpe daini kalang mi bai madat hka ja la yu ga.

Chyahkya si ngu tsun ai raitim chyahkya hpun ting hta na chyahkya si, chyahkya tum,chyahkya hpyi, chyahkya pu, chyahkya lap ni yawng gaw tsi mawan kaja hku akyu jaw ai daw ni hkrai rai nga ai. Chyahkya si hpe jit dwi sai dwi tsi shamai ai hta tsi shatai akyu jashawn jai lang chye ga ai zawn sin da chyat machyi ana, sai hkyeng di n gun yawm ai ana, salum hte seng ai ana, kan nbung htu machyi ai, shat kan kata acid grai law dinglai ai lam ni hpe shayawm ya ai hte shat kan hpye nna matswi rawng ai, sumbraw sumbram hte hpyi hta gaya machyi ai hpyi ana amyu myu a matu mung akyu jashawn jai lang mai nga ai.

Bai hpre hpre rai nna kan mase machyi ai, kan hkyeng machyi ai ana ni tsi shamai ai hta mung chyahkya si gaw tsi mawan kaja langai rai nga ai. Mi tsun sai hte maren chyahkya si a tum hte pu mung tsi kaja tai nga ai. Chyahkya si a pu hte tum hpe sinwawp hku bum ana, asthma ngu ai sinda chyat machyi ana ni byin yang akyu jashawn jai lang mai nga ai. Chyahkya si a lap, pu hte tum ni yawng gaw shingra tara hku nna kraw kan hpe katsi pyaw shangun ai, hkum kahtet ai hpe lawan kawp shangun ai atsam mung rawng ai.

Kan chyat chyat ai mang hkang byin chye ai masha ni chyahkya pu hpe hka hpun lum hte tsing lu ai rai yang kan chyat chyat ai, kan sa n man ai mang hkang hpe hparan ya lu na ra ai. Chyahkya si gaw anhte a hkum hkrang hpe ninghkap n gun shaja ya ai, jit dwi, sai dwi ana hpe shamai shatsai ya lu ai hte sai kata hta sau grai law mahkawng rawng wa ai hpe shayawm jahkrat ya lu ai atsam nga ai.

Chyahkya si hta e anti-oxydant dat rawng ai sha n-ga chyahkya si gaw sai hkyeng di madang hpe shatsaw ya nna sai n’gun yawm ai ana hpe shamai shatsai ya lu ai. Anhte shinggyim masha ni a hkum hkrang maju lasaw lasa ni hpe n’gun ja shangun ai rai nna bum machyi ai lam hpe shayawm ya lu ai sha n-ga sai tsaw ana hpe mung shayawm jahkrat ya lu ai.

Bai nna tsawra ai shiga madat nu wa hpu nau ni ndai chyahkya si gaw anhte yawng hkrit tsang la nga ga ai mawng cancer ana n byin wa hkra mung tau nau makawp maga ya lu ai atsam nga ai hte anhte a myi hte n mu lu ai ana kanu ni law law hpe mung dang manga kau ya lu ai atsam rawng ai.

Chyahkya si sha ai gaw bawnu matsing sumhting lu na nyan marai hpe mung grau nna kaja shangun ai. Baw sin ai ana hpe shamai shatsai ya lu ai, masin kahtet ju kachyi ai ana, sin hte salum a ntsa hta sau shajan ni magap law rawng wa ai mang hkang hpe mung  shamai shatsai ya lu ai lam chye lu nga ai.

Chyahkya si gaw kara a matu mung n’gun tsi langai rai nga ai. Chyahkya si shadu la lu ai ntsin hte baw hkrut ya ai rai yang kara raw, kara run ai lam n byin hkra makawp maga ya lu ai hte kara run mat ai shara hta kara mun nnan ni hpe lawan ai hku bai tu wa shangun lu ai. Dai majaw daini na aten hta chyahkya si hpe kara kaja tsi, baw hkrut tsi ntsin ni galaw htuk shapraw da nga ma ai re.

Bai chyahkya si hpe sai shan hpyi n sam ni hpe mung pri madi htoi tsawm shangun lu ai hte asak kaba wa ai hta hkan nna byin ai hpyi kyip gawng kung nsam sam wa ai hpe mung lanyan kau ya shangun ai. Dai majaw myi man hkan chya ai baw tsawm tsi shakya rai ni hku nna mung galaw shapraw dut shabra nga ma ai re.

Sade hte jit shabawng hta ana mang hkang nga ai majaw jit ji yang kahtet ai, jit hti hti ai, jit sa lam hta jahkring hkring sha ana kanu shang nna machyi ai lam ni hpe mung chyahkya si hte shamai shatsai ya lu ai lam chye lu ai. Chyahkya si gaw myi kahtet ai hpe shamai ya lu ai sha n-ga myi hpe grau nna san san pra pra mu shangun lu ai. Myi htau nnan kap wa ai ten hta mung chyahkya si hpe tsi shatai jai lang mai nga ai.

Chyahkya si gaw shayi num ni a matu mung grai akyu rawng ai tsi kaja rai nga ai. Num ni a hkrang kaw na ahpraw ntsin shing nrai htoi nsam grai law pru ai hpe mung shamai shatsai ya lu ai sha n-ga pu jat n’gun n rawng ai majaw ma kap yak ai hte num ni a num hkring n man ai myi nyap ana ni hpe mung shamai shatsai ya lu ai.

Rai yang chyahkya si hpe gara hku akyu jashawn jai lang mai ngu ai hpe mung chye tawn da na ra nga ga ai. Chyahkya si hpe akyu jashawn jai lang mai na ladat gaw chyahkya si shadu da ai ntsin hpe shat sha ngut ai hpang lani mi lahkawng lang man man lu ya ai rai yang lahta e tsun mat wa ai ana ahkya ni kaw nna tau nau makawp maga la lu na matu hte shamai shatsai la lu na matu akyu jashawn jai lang mai nga ai. Chyahkya si shadu ntsin hta jum dwi shing nrai lagat ntsin loi bang shadu lu mai ai. Mai byin ai rai yang jumdwi n lang ai sha lagat ntsin hpe jai lang ai gaw grau nna tsi byin lu nga ai.

Jitdwi saidwi ana lu ai machyi masha ni rai yang gaw chyahkya si hpe shadu la lu ai ntsin hta jumdwi hte lagat ntsin n bang ai sha, shi a shingra ntsin san san rai nna lu ya ra ai. Chyahkya si gaw shi a shingra dat nan kraw grai katsi shangun ai hte hkum grai kahtet ai hpe lawan kawp shangun ai atsam nga ai re majaw gaw waw shawn jahkru ai, nyap san kapya ai hte shan hpyi grai hkraw ai masha ni lang na n manu ai lam mung tsun da nga ai. Gala amyu sha ni gaw chyahkya si hpe shanhte a mungding tsi kaba langai mi hku nna shaning hkying mi a lahta akyu jashawn jai lang hkrat wa ai re hpe chye lu ai. Dai re majaw tsawra ai shiga madat nu wa hpu nau ni hkam kaja lam hpe grai akyu jaw nga ai chyahkya si hpe akyu jashawn jai lang chye nna ana ahkya kaw na lawt kawt ai hkam kaja ai akyu hpe hkam la ga ngu garan kachyan ya dat lu ga ai.

By - Julia Ja Ing