Sun Hkauna Shu La Ngut Ai Hpang Wan Nat Ai A Akyu Jaw Ai Hte Akyu Yawm Ai Lam

Sun hkauna ni hta nai mam nsi naisi ni hpe dan la, shu la ngut ai hpang wan nat jasan kau ai a akyu nga ai hte akyu yawm ai lam hte seng nna hka ja da lu ai  hpe tsun ginlen garan kachyan ya mayu ai.

Sun hkauna ni hta nai mam nsi naisi ni hpe dan la, shu la ngut ai hpang ngam taw ai mam hpun ni hte nsi naisi hpun ngam ni hpe lawan ai hku shakrin jasan kau lu na matu wan nat ai hpe galaw chye nga ga ai. Hkauna mam ni hpe masha e dan ai rai yang tinang ra ai shadawn shadan hkrak kaw dan la lu mai ai raitim jak rung rai ni jai lang nna dan ai shaloi, grau nna mam dan jak hte dan sharun la ai shaloi gaw mam hpun yi hku hpun du ni grai galu hkra tu ngam taw chye nga ai. Mam dan sharun la ngut ai hpang kaga hkai nmai, nsi naisi ni bai hkai mayu ai shaloi gaw dai mam hpun yi hku hpun du ni hpe lawan ladan rai shatsam shakrin kau ya lu na matu ja gumhpraw mung nhtum ra ai sha loi dik galaw mai ai ladat gaw wan nat shakrin kau ai rai nga ai. Sun hkauna galaw sha ai masha law malawng gaw ndai ladat hpe shaning law law galaw lang hkrat wa sai rai nga ai.

Dai zawn galaw ai gaw akyu jaw ai lam ni nga ai zawn n kaja ai maga de byin wa shangun ai akyu yawm ai lam ni mung byin wa chye nga ai hpe gaw sadi ra na ga ai. Sun hkauna hpe wan nat ai shaloi sadi ra na lam ni hpe tsun ga nga yang kaga shara de wan kap hkru mat ai lam n byin hkra wan nat na shara hpe madin jahkrat masat da na ra ai hte duhkra ladaw hte aten hpe yu maram nna she wan nat ai lam galaw na ra ai. Bai jan grai kahtet nna wan hkru n-gun grai ja ai gaw ga kata nga ai organic shingra rai ni, asak hkrung ai akyu jaw hkrung kanu ni, lusha n’gun dat lu na matu jahten shaza kau ya ai re majaw aten na wa jang ga sau hpe jahten kau ya nga ai. Wan nat ngut ai hpang akyu jaw ai hkrung kanu ni bai hkrung grin wa lu na matu ga sau hpe aten ladaw langai na ai du hkra tawn da na ra nga ai.

Wan nat ai gaw ga sau hpe hkru mat shangun ai sha n-ga ga sau a mabyin  kumla nsam ni hpe du hkra galai shai mat shangun ai majaw sun hkauna a matu akyu jaw ai htan akyu yawm ai de grau byin shangun ai hpe dum sawn shalawm na ra ai nga nna tsun tawn da nga ai.

Rai yang sun hkauna hpe wan nat nna jasan shakrin la ai shaloi byin wa na akyu jaw lam hte akyu yawm ni hpe shingdaw yu dat ga nga yang sun hkauna ni hta na hkai nmai hpun ngam ni hpe wan nat nna pru wa ai lusha n’gun dat gaw ga sau kata de lawan ai hku bai jaw ya lu ai majaw lamu ga sau man hta lusha n’gun dat lu nna ga sau nam hpun law jat wa shangun ai. Maga mi de akyu yawm shangun ai lam hta ga sau gaw nitrogen, phosfate, potassium, sulhpur, magnesium zawn re ai hkai hpun ni kaba wa na matu ra kadawn ai lusha n’gun dat ni hpe shapraw ya ai rai nga ai. Wan nat ai a majaw ga sau kahtet dat jat wa ai, ga sau gayun hkyet nna nru nra byin wa ai, ga sau dat arut hkra lawm mat ai, dap shingmun ni a majaw lusha dat ni yawm mat chye nga ai.

Hkauna hta wan nat ai gaw ga sau kata e nga ai tsing hpun ni hte n ra ang ai latung shingtai hkrung kanu ni hpe shatsai shamat kau ya ai majaw garai n kraw shi ai latung di ni hpe mung shatsai jasan kau ya lu nga ai. Maga mi hku nna akyu yawm shangun ai gaw kajin chyai zawn re ai akyu jaw hkrung kanu ni hpe si mat shangun nna ga sau kaja shangun ai lusha dat ni hpe yawm mat shangun ai hte aten ladaw galu a matu mung n kaja ai lam re ai hpe tsun tawn da nga ai.

Sun hkauna hta wan nat ai akyu gaw ga kata na latung shingtai kanu hpyen ni hpe hkai ladaw shaning lahkawng daram du hkra makawp maga ya lu ai. Hkai nmai hpun jahkraw ni hpe wan nat nna lu ai dap ni hpe ga sau namhpun hku nna bai akyu jashawn jai lang mai nga ai.Maga mi de akyu yawm shangun ai lam gaw hkai ladaw shaning lahkawng daram a matu sha kaja nna hpang daw shaning ni hta ga sau atsam ningja ni yawm mat chye nga ai.

Wan nat nna akyu nga ai lam hta hkai nmai hpun jahkraw ni hpe wan nat kau ai gaw organic shingra mabyin hku nna akyu nga ai rai nhtawm tsing hpun ni hpe mung si mat shangun lu ai. Bai hkai na hkai nmai hpun ni a matu madi dat hpe hting hkang da ya lu ai sha n-ga ga sau a matu lusha n’gun dat jaw jahpring ya ai hta n’gun bang n ra ai ladat mung rai nga ai. Raitim maga mi de akyu yawm shangun ai gaw wan grai law nat ai rai jang wan hkut ni mung nbung hpe maza shangun ai majaw cabondioxite hte wan hkut ni gaw makau grup yin shingra tara hpe jahten shaza ai hta lawm nga ai. Dai re majaw hkai nmai bai hkai na matu aten jaw lu ai rai yang gaw wan n nat ai sha hkai nmai hpun jahkraw ni hpe sun hkauna shara shagu hkan garai ayai da ya ai gaw lamu ga hpe madi dat jaw lu ai rai nna grau kaja ai lam hpaji jaw tsun tawn da nga ai.

Wan nat na rai yang gara aten hta nat yang grau kaja ai kun -Wan nat na rai jang gaw shana de maga daw hte hkai nmai hpun ni hkraw taw sai aten hpe lata nna nat ya ra ai. Dai aten gaw madi dat rawng shadang yawm nna tsing hpun hte hkai nmai hpun ni a hpyen rai nga ai hkrung kanu ni hpe mung si mat shangun lu nga ai. Wan nat ai shaloi sadi ra na bai langai mi gaw hpri hte magri zawn re ai wan n hkru ai baw maza rai lama ma lawm ai rai yang wan hkru taw ai aten grau na nna kahtet shadang grau law chye ai majaw dai zawn re ai hpri rai ni n lawm na hpe mung sadi ra ai.

Dai re majaw tsawra ai shiga madat nu wa hpu nau ni sun hkauna wan nat ai gaw kaja ai akyu htan ga sau hpe aten galu hta n kaja ai maga grau byin shangun lu ai rai nna mai byin ai daram wan nat nna sun jasan shakrin ai hpe n galaw na matu hpaji jaw da nga ai. Aten a majaw, shing nrai galaw na atsam n nga ai majaw n byin n mai wan nat jasan shakrin ra ai rai yang pyi  4/5 ning na ai hpang she nat ai gaw kaja dik re nga nna tsun tawn da ma ai lam machye machyang hpe garan kachyan ya dat lu ga ai.