Shingtawn Pan A Hkamja Lam Akyu

Myen mungding tsi chyum hku nga yang shingtawn pan gaw kahtet ai,jap kahpram ai,loi hka ai nam chyim rawng nna jit,nbung,sinda chyat,mahkak chyat ai ni hpe dang lu ai.Jahkru ai,ana kanu shang ai,hpawm kahpram machyi ai hpe mai tsai shangun lu ai.Malu masha rin shamyit kaja ai,n-gup mu shangun ai,sama kaja ai,nsen kaja ai hte asak galu ai akyu ni hku nna masha hpe akyu law shangun lu ai rai nga ai.Shingtawn pan a lap hte atum ni hpe shingra tsi mawan hku nna akyu jashawn sung lang lu mai ai ladat  lam ni hpe matut hkaja mat wa yu ga.

1)na machyi ai – na makret machyi yang shingtawn pan lap hpe wan galip kakang la nna na kata de ntsin kahte lahkawng dang shup bang ya u mai tsai lu na ra ai. 2)Wa machyi yang shingtawn pan shup ntsin hte ma hpyit bawm,payuk ni hpe gayau rin mani gumdin la nna wa latung sha ai ,wa machyi ai shara hta bang ya  u,mai tsai lu na ra ai.3) Ma ni hkum kahtet,shingma kahtet machyi rai byin yang – shingtawn pan lap hte bu lap hpe wan ji hte nam chying loi mi bang gayau rai rin mani la nna chya ya u.Hkum ting ahpa  hpa rai  masawp chya ya u ,mai tsai lu nga ai.

4)baw chyen machyi yang – shingtawn pan lap a katsing sha re ai hpe shup la nna na labying hte kahtan hta chya ya u mai tsai lu nga ai.5)jit shing dang ,jit hti hti,sin bum,shan htoi rai byin yang shingtawn pan tum hte chyingnam tum gayau rin mani la rai  nam htan hte gayau gumdin nna jan lam jahkraw la u.Dai hpe jahpawt kalang ,shana kalang rai ding run sha ya u.Pu shaw ana mung mai tsai lu nga ai.6) aten galu hkum kahtet machyi yang – jahpawt jau jau shingtawn pan lap shup ntsin kyaw mi hpe lu ya ya di u,hkum kahtet kawp mat lu ai.Magri lakung hte lu ai rai yang grau nna tsi tai lu nga ai.7) Hka li machyi yang – shingtawn pan lap a katsing hprap hprap re ai pa mali /ma nga dang hpe n hprip bawm tum masum dang gayau rin mani la nna bat mi hta 2 lang dingrun lu ya yang mai tsai lu ai.8) Maru,sumbram gaya ai rai yang – shingtawn pan lap hpe  lwi hkri si ntsin hte gayau nna a mani rai hkra htu u.Dai htu tawn ai alap pa ni hte gaya ai shara kaw arut chya ya ai shaloi mai tsai lu ai.

9)Nam pum pum,kan machyi byin ai rai yang – shingtawn pan lap hpe shadu lu ya mai ai zawn  ntsin shup la nna mung lu ya mai ai.10) nsen shang,yu hkraw machyi byin yang shingtawn pan tum kung sai hpe hka tsing da nna dai ntsin hpe lu ya mai ai.11) Ana kanu shang nna twi machyi,bum ka-ut machyi rai byin yang shingtawn pan lap shadu ntsin hte kashin ya u.Lama hpye machyi ai rai yang shingtawn pan lap jahkraw hpe mani shingmun la nna mun ya u mai tsai lu na ra ai.

12)Hpyi ana byin ai rai yang – Hpyi hte seng ai ana shagu gaw shingtawn pan lap ,rawng hkun hpe chyingnam sau hkan mi daram bang gayau nna wan n’gun nau nja ai hte hka hkyet hkra shadu kau nna lu ai sau hpe gaya ai shara hkan chya ya yang mai tsai lu ai.Bai dai sau hpe hpa hka gawm kaji hta kahte lahkawng/masum dang kahte bang nna hka hpun lum a kahtet re ai hte kawut shakawp lu yang waw shang,jahkru ai ana ahkya ni mai tsai lu ai.Dai sau hpe chya da yang ji grawng,mayan ni nsa kawa ai.

13)Kan lasa di kapran ai – shayi num ni ma hkum rai nna kan lasa di kapran ai majaw gaya ai rai yang shingtawn pan lap jahkraw hpe rin mani la nna chya ya mai ai.(14)Ban si tu ai,sama kap ai,sumbraw ni kap ai rai yang mung shingtawn pan lap shup ntsin hpe chya ya mai ai.15) Ma ni kan manai kanu rawng yang shingtawn pan shup ntsin jaw lu ya u.16)Na wu kadu,wa machyi,na matswi yun rai byin yang shingtawn pan shup ntsin hpe kyaw hta bang nna wan kakang shalum dat u,loi lum lum nga ai ntsin hpe na kata de kahte lahkawng /masum rai bang ya yang mai tsai lu ai.

(17)Ladi pat,ladi kata hpye machyi rai byin yang shingtawn pan lap hpe lam jahkraw tawn nna a mani rai htu shingmun la nhtawm marawp manam ya ya di u.(18)Hka li gari kashung machyi ai rai yang shingtawn pan aru hpe hka gawm masum hta na gawm mi sha ngam hkra shadu nna lu ya u.Salat hpaw nna kahtet kawp wa na ra ai.19)lagat, u gyin ,n gaw gawk,wa ndu yan zawn re ai nyang,ntuk rawng ai hkrung kanu lama ma kawa hkrum ai rai yang shingtawn pan lap hpe htu mani la nna ga-up dadap ya u.(20)yu hkraw machyi,sa bap ana byin,mawng hkaw ana ni byin ai rai yang shingtawn pan pu sumbaw nawng hpe shanam jahkraw ,shakau hkyeng ni hte gayau htu la nna lagat ntsin hte sha ya u mai tsai lu na ra ai.

.(21)Jahkru mai lu na matu – shingtawn pan lap shup ntsin hpe lagat ntsin hte gayau nna lani mi masum lang lu ya u mai tsai lu na ra ai.(22)Shat kan ana machyi ai,nbung hta machyi rai byin yang shingtawn pan lap jahkraw hpe hpa hka lu ai zawn hka hpun lum hte tsing lu ya yang mai tsai lu ai.Ma ni nbung hta,kan machyi re ai shaloi mung mai tsai lu ai lam machye machyang ni hpe garan kachyan ya dat lu ga ai. Shiga madat nu wa hpunau ni yawng anhte a makau grupyin sun,wang ni hta aloi ali hte lu la mai,hkai sha mai ai shingtawn pan hpe hkam kaja lam a matu mung manu dan ai shakau shaban langai hku akyu jashawn sung sha chye nna asak galu hkam kaja ai akyu hpe hkam la nga ga.

Lamang tang madun ai  - Julia Ja Ing