Shingra Tsi Mawan Shadu Lu Nna Hkamja Nga Ga

Daini na hkam kaja lam machye machyang madat hka ja la na aten lamang hta gaw Saranum Ah Bau Lahpai garan kachyan da ya ai shingra tsi lap ni rai nga ai kumba ban shing nrai kumba shakau pawt, shingtawn pan, shanam, lwi hkri si, lagat ntsin  hte kala ang nam ni gayau shadu lu nna akyu hkam la mai na machye machyang hpe tsun ginlen garan kachyan ya mayu ai.Ndai shingra tsi mawan gayau ntsin gaw shinggyim masha ni a nsa sa lam hta byin ai ana ahkya hte waw machyi ana amyu myu hpe shamai shatsai ya lu ai hte hkum chying n gun hpe shatsaw ya lu ai shingra tsi kaja rai nga ai.

Shingra tsi gayau lu na hta lawm ai shingra tsi malawm ni gaw n ba ban pawt, shanam, lagat ntsin, shingtawn pan lap, gala ang nam hte lwi hkri si ndai hpan ( 6 ) re ai hpe shawng shachyen ya mayu ai.

Buga ginra hta hkan na kumba shakau nga nna mung tsun shamying lang ai nba ban pawt gaw cancer cell amyu myu hpe sat kau ya lu ai, sai dip n gun hpe man man hkang zing ya nna, sai tsaw ai lam hpe shayawm ya lu ai, hkum hkrang hta sai gayin hkawm sa ai lam kaja shangun ai, hkum kahtet ai hpe shakawp ya lu ai, hka li hka waw hpe shamai shatsai ya ai, shat kan rin ai lam hpe grau kaja shangun ai, myit hkiba lit li lam hte myit ningtsang gawng run ai lam hpe shayawm ya lu ai, hkum hkrang hta na n kaja ai sau shajan ni hpe jasan kau ya lu nna hkum num nak hpe shayawm ya lu ai, lami laman machyi ai gout ana hpe mai tsai hkyamsa wa shangun lu ai, sai kata kaw n san n seng ai maza mala hte gung ni hpe jen jasan kau ya lu ai, kan mase, kan machyi ai ana, nbung htu ai lam ni hpe shamai shatsai  ya lu ai,bai kumba ban hpe lu ya ai a marang e sin, sade, pu hte jit shabawng ni hta na n kaja ai, n san n seng ai maza mala ni hpe jasan jaseng kau ya lu ai atsam shi hta nga ai lam chye lu ai. Ndai gaw kumba ban pawt hta lawm ai shi a tsi atsam ni rai nga ai.

Ndai shingra tsi mawan gayau shadu lu ai hka hta e kumba ban pawt lahkawng ram hpe bang jang ram ai, ndai kaw lawm ai tsi mawan hpan ( 6 ) hta na kumba ban pawt hte shanam hpe ahpa hpa rai galep ahkyep kau na, dai ngut ai hpang asan re ai di hta hka hpe shawng shadu shaprut da na, hka prut ai hpang she, mi mawt galep da ai kumba ban pawt hte shanam bang na, dai hpang  shingtawn pan hte gala ang nam bai bang rai nna shadu da ga, dai hpe hpyau hte yat yat rai nna shalau ya u. Tsi lap ni bang ai hpang  minutes 5 – 10 na hkra shadu tawn da na ra ai.

Ndai shingra tsi mawan gayau shadu da ai ntsin hpe ma hkum kanu ni hte chyu chyu ai ma nga kanu ni mung mai lu ai. Bai nna tsi shadu ai kaw na pru wa ai salu nsa ni hpe marawp ya ai rai yang mung nsa sa lam hta byin ai sinda chyat ai, nsa n hkru sa ai, ladi pat ai, waw waw ai, yu hkraw bum machyi ai hte mahka rawng ai lam ni hpe shamai shatsai kau ya lu ai. Ndai hpe lu ya ai sha n-ga, shi hta na pru wa ai salu nsa hpe mung sinwawp de du hkra tang du hkra rai marawp bang ya ga dai mung grai akyu byin nga ai.

Shingra tsi gayau shadu da ai ntsin hpe san seng ai gawm langai mi hta jen bang da u,  jen la lu ai ntsin hpe shakawp tawn da nna lu mai ai. Shi a ntsin nam chyim gaw jap hpawm ai nam chyim hpe lu na re. A katsi nga lu mayu ai rai yang hka ge tawng bang nna mung lu mai ai. Raitim tinang hta nsa sa chyat ai ana byin taw ai, yu hkraw bum machyi ai, jahkru ai, waw waw ai rai jang gaw hka ge tawng n bang ai sha, lum lum nga ai lu ya jang grau kaja ai. Dwi ai ra jang gaw lagat ntsin kyaw masum bang nna lu mai ai. Ndai gaw hkum hkrang hkamja lam hte myit hkamja lam hpan lahkawng hpe akyu kaba jaw ya lu ai, shingra tsi mawan gayau shadu lu ai ladat rai nga ai ngu tsun shana garan kachyan ya dat lu ga ai.

By - Julia Ja Ing