Shinglet Gaw Kaji Tim Atsam Rawng Ai

Kaja ai ga gaw manu dan ai panglai seng hte bung nga ai.Htoi kabrim ai kachyi gaw tsawm ai numsha hpe sumli da ai zawn,kaja ai ga gaw shaga ai wa hpe sumli da nga ai.Kalang lang atsin zim sha nga ai lam gaw ja hte bung ai.

Ga shaga na aten shi mi nga ai.Atsin zim sha nga na aten mung shi mi nga ai.Dai langai hte langai a aten hpe chye ginhka ai masha gaw shakawn ging ai,sari hte shanu nga ai masha re.

Anhte ga shaga ai shaloi tinang shaga dat ai ga hte masha hpe shut kau lu ai aten ni nga ai.Shing nrai masha kaga a myit masin hpe achyaw machyi shangun ai aten ni nga ai chye ai,dai zawn re a aten,masa lam ni hta laklai tsun shaga ra ai lam sha n nga yang,dai zawn re ai ga ni hpe ntsun ai sha ngam kau da yang grau kaja ai.`

Manaw manang wa shi a ruyak lam ni hpe marai langai ngai atsawm sha madat ya na matu ra ai aten ni nga ai.Tengman ai,kaja ai  manang gaw kabu gara myit lawm ai hte atsin zim sha madat ya na re.Dai gaw mai kaja ai lam rai nga ai hte dai  zawn re ai aten hta tinang bai tsun shaga dat ai ga gaw manang wa a matu myit n-gun lu na ga,manang wa hpe myit pyaw shangun lu ai lam mung rai wa chye ai.

Bai nna atsawm myit sumru lu na matu anhte hkum shagu atsin zim sha nga ra ai aten ni nga ai.Raitim tsawm htap ai ten ginra pru yang,anhte hkum shagu ga shaga na lit nga ai.Anhte tsun shaga dat ai ga gaw masha ni a myit hpe jahtoi shaleng ya nna shanhte a myit masin hpe shalum ya lu ai.Ga shaga ai atsam hte masha a ruyak lam hpe anhte hpyan ya lu ai,kaja ai kabu gara pyaw hpa lam hpe shabran lu ai,manaw manang ni hte rau shada da tsawra hku hkau kahkyin gumdin lu ga ai.

Shinglet gaw anhte a hkum hkrang na kaji htum ai daw shan ni hta langai mi sha rai tim ,atsam grai rawng ai daw shan rai nga ai.Anhte a prat hta galu kaba ai,hkrat sum ai,ngu ai lam gaw shinglet hpe gara hku kade daram jai lang ai hta mahta ai.Chyum laika hta shinglet hpe sanghpaw bairi hte shabung da ai.Sang hpaw ni dai hte wa kaba nga ai hte,nbung laru kaba e ahpawt gumpye ai hkrum ma tim,grai kaji ai li hkang hte sha dai ni hpe hkang la lu ai.Dai hte maren shinglet gaw kade kaji nga ai raitim mung gumrawng gumtawng kaba nga lu ai.(Yaku 3:4-5a ) Dai gaw kade kaji tim atsam rawng ai ngu mayu ai re.