Sani Si A Mau Hpa Lak Lai Ai Hkam Kaja Lam Akyu

Sani si hpun hpe anhte a Wunpawng mungdan ginra hta law law mu mada lu ai sha n-ga, Indonisia, South East Asia, India hte Africa shara ni hta shingra tara hku nna tu ai hpe chye lu ai. South East Asia, India hte Africa hkan tu ai sani si gaw kahkum si kaji zawn rai nna n myin shi yang tsit ai n sam hpe mu lu ai re. Anhte a ginra hta gaw sani si myin wa yang hpoi ai nsam hpe mu lu ai, Ndai sani si a hpyi hta gaw mau hpa lak lai ai Hydroxycitric Acid ( HCA ) dat rawng ai rai nna, ndai HCA dat kaw nna sha jak tsi mawan ni law law hpe galaw shapraw tawn da ai hpe mung mu mada lu ai re.

Ndai sani si hpe anhte a dinghku shat gawk kata hta loi loi hte galaw lu mai nga ai. Sani si hta gaw law htam ai compounded ni rai nga ai Calcium, Phosphorus, Riboflavin, Niacin, Iron, Thiamine dat ni lawm nga ai. Ndai dat ni gaw anhte shinggyim masha ni a hkum hkrang hkam kaja lam a matu shani shagu dan tawk ra ahkyak taw nga ai tsi atsam ni rai nga ai. Ndai sani si a hkri ai dat gaw shat rin ai lam hpe grau nna kaja wa hkra madi shadaw ya lu ai rai nga ai.

Sani si hpe lu sha ai a marang e lu la mai ai hkam kaja lam akyu ni hpe matut tsun ga nga yang sani si hta vitamin, Minerals hte Polyphenol dat ni hpring tsup hkra rawng ai majaw shinggyim masha a hkam kaja lam hpe tang du hkra madi shadaw ya lu ai hpung jat lu sha langai mi rai nga ai. Sani si a hpyi hta lawm ai Hydroxycitric Acid dat gaw lawm ai shadang grai tsaw ai rai nna hpum ding lai ai hte hkum hkrang na sau shajan ni hpe shayawm jahkrat kau ya lu ai hta atsam grai kaba ai lam chye lu ai.

Sani si hte galaw shapraw da ai hkum num nak jahkrat ai tsi ni hpe mung gat lawk hta mu mada lu nga ai. Anhte a hkum hkrang shara ra hta nga ai grai hkru yak ai sau hpe ndai sani si kaw lawm ai Hydroxycitric Acid ( HCA ) dat gaw atsawm sha hkru jahkrat kau ya lu ai rai nna hkum hkrang hta sau shajan ni bai mahkawng wa na hpe tau nau ning hkap makawp ya lu ai re hpe chye lu ai. Dai sha n-ga shi hta lawm ai HCA dat gaw lu sha ding lai sha mayu ai myit hpe mung shayawm kau ya lu ai hpe chye lu ai.

Dai sha n-ga sani si a hpyi gaw shat rin ai lam hpe grau nna hkam kaja shangun ai, sai kata kaw rawng nga ai n kaja ai cholesterol ni hpe ning hkap shayawm kau ya lu ai atsam nga ai re majaw gaw sai tsaw ana ni n byin wa na matu mung tau nau makawp maga ya lu ai. Bai sani si gaw sai kata na dwi hpa dat hpe jahkrat kau ya lu ai rai nna lu sha sha ngut ai hpang sai kata hta dwi hpa dat ni law lung wa ai hpe ning hkap ya lu ai. Dai majaw sani si gaw jitdwi saidwi ana lu ai masha ni hte sai tsaw ana lu ai machyi masha ni grau nna sha ya ra ai shingra tsi mawan lu sha rai nga ai.

Sade kata hta Calcium Oxalate Crystal ja hkak kaba wa nna sade bum machyi wa ai, sade hten za wa ai lam ni n byin na matu tau nau makawp maga ya ai hte sani si a hkri ai dat ni gaw sade kata kaw e rawng nga ai nlung zawn re ai Crystal ni hpe tun shabyawng kau ya lu ai atsam rawng ai re majaw gaw sade hta nlung n rawng wa na hpe tau nau makawp maga ya ai hte nlung kaji ni rawng wa yang mung, tun shabyawng kau ya lu ai atsam nga ai.

Bai nna ndai sani si hta gaw Diuretic Effects mung lawm nga ai. Jit hti hti ai hte jit n law ai,  jit sa yak ai ndai mang hkang ni hpe hparan ya nna jit hpe dang lu hkra sa kau shangun ai re majaw hkum hkrang hta n kaja ai Uric acid ni mahkawng wa na, gout ana byin wa na lam hpe mung tau nau makawp maya ya lu ai.

Dai sha n-ga sani si gaw sin bum nna shanhtoi wa ai, B ana, C ana hte kan kata hka rawng wa ai hka yam kan ana lu ai machyi masha ni hte mung grai htap htuk ai shingra tsi mawan lu sha re ai zawn ndai ana ni hpe tau nau makawp maga na hte mai tsai hkyamsa wa lu na matu akyu jashawn sung lang nga ma ai. Bai sinwawp kata na n san n seng ai gung maza mala ni hpe jasan jaseng kau ya lu sha n-ga, mahka hpe mung byawng shangun lu ai atsam shi hta rawng ai re.

Salum hte seng ai ana hte sin hte seng ai ana ni a matu mung grai nan htap htuk kaja ai tsi mawan lusha langai mi re. Dai ni na gat lawk ni hta sani si hpe shingra tsi hku nna mung, jak tsi mawan hku nna mung hpuung jat lusha langai mi hku nna mung shakya rai amyu myu ni hku nna mung  galaw shapraw sung lang nga sai re hpe mu mada lu ai. Bai ndai sani si gaw lami laman, nrut nra hte hkri hkraw bum machyi ai ni a matu mung grai kaja ai shingra tsi langai mi rai nga ai.

Sani si hpe anhte a ginra hta gaw Wunpawng myusha ni htung hking lu sha hku nna shan, nga shadu sha ai hta hkri hpa hku nna bang sha chye ma ai. Tinang ra ai gara ladat hku nna mung sani si hpe jai lang mai nga ai. Sani si hpe tsi mawan hku nna akyu jashawn jai lang na nga yang jahkraw tawn da ai sani si hkyep langai lahkawng hpe lagat ntsin, shanam hte arau pawng nna hka hpunglum kahtet ai hte tsing lu ai, shing nrai shadu lu ai ladat hku nna n law dik, lani mi kalang, masum ya din yang kalang man man lu ya ai a marang e lahta e tsun mat wa ai ana ahkya ni hpe tau nau makawp maga la lu na hte machyi makaw ana ahkya ni kaw na lawan mai tsai lawt kawt wa lu na matu madi shadaw ai hpung jat tsi mawan lu sha hku nna akyu jashawn jai lang mai nga ai.

Dai re majaw tsawra ai shiga madat nu wa hpu nau ni sani si a mau hpa lak lai ai hkam kaja lam akyu ni hpe madat hka ja la nna sani si hpe tinang a dum nta sun wang kata hkai shajang ai hku nna mung, hkai shajang na yak hkak ai ni mung anhte buga ginra hta law law tu ai re majaw sani si hpe tsi mawan hku nna akyu jashawn jai lang sa wa lu u ga ngu yaw shada let garan kachyan ya dat lu ga ai.