Sade Hkamja Hkra Nga Chye Ga

Sade machyi ana mung daini na aten byin law taw ai ana langai rai nna grai sawng ai madang du mat jang tsi shamai la na yak ai,ja gumhpraw grai htum ra ai sha n-ga machyi hkrum ai masha ni mung grai nan nchyi nmu machyi shoichyum hkam sha ra ai ana rai nga ai.

Sade ana byin ai hta asak kaba wa nna byin ai,amyu roisai hta hkan nna byin ai lam ni hpe tau nau makawp maga la nmai ai raitim grai sawng ai madang nbyin wa hkra hte kaga masa lam ni a majaw sade hkra machyi lam nbyin hkra gaw tau hkrau nna sadi sahka makawp maga la mai ai lam ni nga nga ai.

Masha langai hta sade lahkawng rawng ai,sade n kaja mat tim bai galai bang mai ai,sade langai mi n kaja mat yang ngam ai langai hte asak hkrung lu ai nga tim kaja wa ta tut hta gaw n loi nga ai re,amai hte sha galaw lu ai baw nrai nga ai.Machyi shoihpa hpe hkam sha ra ai,ja gumhpraw law law htum ra ai,kaga yak hkak lam ni law law hkrum sha ra na teng sha rai nga ai.

Sade hkamja lam n nga ai rai yang hkum hkrang hta kaga ana ahkya ni du shang jat wa na,hkra machyi lawm wa na mung grai loi nga ai majaw tinang a sade hkamja lam nga hkra garai n machyi ai ten kaw nna tau nau sadi sahka ya na ra hkyak ai.Sade ana grai sawng mat ai majaw sade yawng ngu na daram hten za taw ai madang du wa jang sade kashin ra ai,shing nrai kaga masha kaw na sade bai galai bang ra nga ai.Sade kashin ai ngu ai mung machyi hten za taw sai sade bai hkamja wa hkra galaw ya lu ai lam n nga ai,sade galaw ra ai bungli hpe garum ya ai madang sha rai nga ai.Kaga masha kaw na sade bai galai bang na ngu ai mung grai nan nloi ai lam rai nga ai.

Rai yang anhte hpa galaw mai na ga ai rai nga jang sade hkamja nga na matu hka law law lu na,jum shayawm sha na,malut hka yawm nlu na,tsa chyaru koi gam na,makret kawa machyi mai tsi ni hpe tinang chye ai hku nlu na hte jitdwi sai dwi ana lu ai masha ni rai yang ana nsawng hkra sadi sahka lu sha nga sa chye na ra ai.

Sade ana hpe aten galu byin shangun ai hta jitdwi shadang tsaw ai mung lawm nga ai re.Sai kata jumdwi dat grai law wa ai hte rau jit hta mung law nang wa nna sade a sai lam lasa ni du hkra hten za mat wa ai.Dai kaw nna sade gaw shi a bungli rai nga ai maza mala gung ni hpe jen jasan shapraw ai bungli hpe atsawm nlu galaw mat ai majaw hkum hkrang hta gung maza ni majaw rawng wa ai.Dai majaw sade hkamja na matu hka law law lu na ra ai lam matsun da nga ma ai re.

Hka law law nlu ai majaw hka dat ra kadawn nignra wa ai rai yang sade galaw ra ai bungli ni kahprai kashai rai hten za mat ai.Hka law law nlu ai majaw hkum hkrang hta hka dat htawng mat ai,ningra mat ai rai yang sai kata hta gung maza ni  grai law majaw rawng nna sade gaw dai hpe jen shapraw kau ya lu na atsam yawm mat nga ai. Dai majaw hka lu ai gaw masha yawng loi loi hte galaw lu ai lam mung rai nga ai hte sade ana a matu sha nrai,hkum hkrang hkamja lam a matu grai akyu jaw ya lu nga ai re.

Hkamja na lusha ni hpe lata sha chye u – Sade ana mang hkang byin wa ai gaw sai rawt ai,salum ana nga ai,jitdwi ana nga ai kaw na madung byin wa chye ai rai nga ai.Dai majaw dai ana ni nbyin wa na matu gaw hkamja lam hte htuk ai hku lu sha nga sa chye na ahkyak rai nga ai.Gung byin shangun lu ai lusha ni,chemical datu tsi lawm ai lusha ni hpe koi gam chye na ra ai.

Hkum hkrang shamu shamawt lam dingrun galaw ya nga u – hkum hkrang shamu shamawt lam ngu ai hta lak san aten jaw nna gym ginsup ai,lama ma ginsup shamu shamawt lam nlu galaw ai raitim dum nta hta shani shagu tinang galaw ra ai bungli ni nga ai,ga shadawn lusha shadu ai,dum nta san seng ai,gat sa,hka ja rai shani shagu na nta bungli galaw taw ai mung shamu shamawt lam ni rai nga ai.Hpa bungli mung nkam galaw nna aten tup,TV shawng kaw dung,ph hkrai yu shakut rai nga ai chyawm gaw hkamja lam hta hkra machyi wa na sha rai nga ai.

Hkrup mara tsi ni hpe tinang chye ai hku nmai lu ai – daini na aten hta shingra dat lusha tsi nga nna tsi mawan law law pru taw nga ai re.Grau nna online ntsa tsi mawan hkum tsumhpa ndau dut nga ma ai.Dut ai masha ni gaw grai kaja ai nga nna tsun ndau dut ma ai raitim tsun shagu hpe nmai kam ai.Grau hkrit tsang ra ai gaw dai tsi ni mari lu dat ai majaw kaja ai akyu htan sin hte sade hpe kalang ta hkra machyi jahten shaza kau lu ai hpe sadi ra ai.Tsi langai ngai hpe lu na rai jang dai tsi hpe galoi aten gara hku lu ra na,kade daram shadang lu ra ai,lusha hte kade daram gang nna lu ra na,dai tsi gaw kaga hkra machyi lam byin wa mai ai kun  ngu ai tsi matsun ni hpe atsawm hkrak,atsin ayang shawng chye na da na she lu ra ai.Bai nna makret kawa machyi mai tsi ni hpe mung loi mi machyi nga npyaw shagu majoi mi nlu ga ngu sadi jaw mayu ai.Makret kawa nem tsi ni law malawng gaw grai law lu ai rai jang shat kan hta hkra ai,sin hte sade hta hkra machyi shangun nga ai hpe ja ja sadi lu chye ga.

Malut hka yawm hkum lu – malut hka yawm lu ai gaw lu ai ten na magang sai lam lasa ni hpe kaji chyum mat shangun nna hkum hkrang a ahkyak ai shara de sai gayin sa ai lam yawm mat lu nga ai.Dai zawn sai gayin du shangun ai hta sade mung lawm nga ai.Sai atsawm ndu mat jang sade gaw bungli atsawm nlu galaw mat sai.Dai hte maren tsa hpe mung shayawm lu ya na ra nga ai.Tsa a majaw hkum hkrang de majaw shang wa ai gung maza ni hpe sin hte sade gaw ning hkap lu hkra agying agang shakut ra nga ai re.

Dai rai nna hpang jahtum tsun mayu ai gaw sade hkamja nga na matu lahta e tsun mat wa sai lam ni hte sadi sahka la mai ai zawn hkamja lam jep joi ai hpe dingrun galaw ya taw lu ai gaw grai kaja ai,hpa ana ahkya mi raitim nnan byin hpang wa ai ten chye nna tsi lu tsi sha kau ai rai she machyi ana nsawng ai sha lawan ai hku tsi shamai la lu na rai nga ai ngu tsun shadum garan kachyan ya dat ga ai.

Lamang tang madun ai - Julia Ja Ing