Ready Made Lusha Hpe Shadawn Sharam Sha Ga

Ya ndai aten hta ready malu masha hkum sumhpa ni gaw gat lawk shara shagu hta mu lu nga ga ai hte masha shagu mung ready made lusha ni hpe koi yen nlu re ai prat rai taw nga sai. Ready made lusha ni gaw chyalu hkrawn hkra, lawan ladan rai sha dat mai ai zawn n gup nam chyim mu htuk hkra mung galaw shapraw da ai majaw sha ai masha mung lani hte lani grau grau law jat wa nga ai.

Hkam kaja lam tup hkrak hkan sa ai masha ni chyawm gaw ready made lusha hpe mai byin ai daram koi gam nga ma ai raitim masha law malaw gaw ready made lusha ni hpe she manu dan dik ai lusha kaja shadu nga ma ai. Masha n kau mi hkamja lam a matu n hkrak ai hpe chye ai majaw shadawn sharam rai kalang numrang sha mari lusha ai ni mung gaw nga ai. Masha nkau mi gaw hpa nan n chye ai majaw sha taw ai ni mung law law naw rai nga ai. Nkau mi gaw chye ninglen sha mu dum ai majaw sha ai, nkau mi shadu jahkut sha loi ai majaw sha ai, masha nkau mi gaw lagawn ai majaw nan chyalu hkrawn hkra rai sha mai ai ready made lusha sha law ai ni nga nga ai.

Tsawra ai shiga madat nu wa hpu nau ni ndai ready made malu masha ni yawng gaw gara lusha hpan raitim shingra malu masha ni daram kaja ai n lawm nga ai re. Ready made malu masha sha law ai a majaw mawng cancer ana, jitdwi saidwi ana, sin ana hte kaga hkrit tsang ra ai ana ahkya ni law law wa ndum shami rai byin hkrum ra nga ga ai. Sha dat ai hte rau kalang ta nan machyi wa ai nre majaw mung sadi sahka, shadawn sharam lusha ai lam n nga ai hpe mu lu ai. Dai majaw ready made lusha ni hpe mai byin ai made koi gam ga, shadawn sharam rai sha ga ngu daini kalang mi bai tsun shadum dat mayu ai.

Mi sha tsun sai hte maren masha n kau mi gaw lagawn ai, loi daw tam ai majaw masha ni chyalu hkrawn rai sha mai hkra mu hpa nam chyim ni yawng gayau bang da ngut sai ready lusha hpe madung tawn sha law nga ga ai.Ga shadawn coffee gayau lu na rai yang tinang hkrai gangau htu mani la nna gayau lu ra ai coffee nre sha, loi loi hte gayau lu mai ai coffee mix htuk matep ni hpaw gayau lu ai she grau law wa nga ai.Dai hte maren ready made hkau soi jahkraw,wa pu,u pu jahkraw hte kaga ready made malu masha ni law law nga ai.Dai malu masha ni gaw aten njaw ra ai sha,chyalu hkrawn rai sha mai ai,sha mung sha mu ai,yu yang mung tsawm ai re majaw loi lam tam nna sha ai masha ni grau grau she law jat wa nga ai.Dai malu masha ni hpe sha ai lang law wa jang tinang a hkum hkrang hkam kaja lam hta hkra machyi shangun nga ai hpe mung dum chye na ra nga ga ai.

Ready  made malu masha ni hpe sha nna madung byin wa shangun ai ana ahkya ni hpe hka ja yu ai shaloi hkum katsing si ana byin ai  – ready made malu masha ni hpe chyahkring hkring sha,sha ai masha ni gaw sai shadawn shadang rawt ai majaw hkum katsing si ana byin na grau loi wa ai.

Ladu lai hpum ai – Fast food ready made malu masha ni hta rawng ai cholesterol ni gaw masha hpe hpum lai ai lam byin shangun ai.Ready made malu masha hpe bat mi hta lahkawng lang hta jan nna sha ai masha ni gaw,kaga masha ni htan hkum hkrang num nak grau rawt nna,ladu lai hpum ai lam grau byin law ai hpe mu lu ai.

Cancer ana byin wa ai –ready made malu masha hpe grai law sha ai masha ni gaw sade cancer ana ,pu kaba cancer ana,shat lam cancer ana ni byin wa chye ai.Dai malu masha ni a majaw hkra machyi ai gaw masha kaba ni hta sha n-ga ,ma kaji ni  hta du hkra hkam sha ra chye nga ai.Ready made malu masha grai law jaw sha ai ma ni hta mung ladu lai hpum ai lam hte salum ana byin lu ai sha n-ga sinda chyat ana hte asak naw kaji ai raitim sai rawt ana byin ai shoihpa lam ni hkrum sha ra chye nga ai.

Ready lusha rai nga ai loi loi hte lawan ladan rai sha mai ai hkau soi jahkraw mung daini na aten masha law law a matu manap lu sha hte hkau hpoi mahtawt sha ai shaloi grai shara lu taw nga ai.Ndai hkau soi jahkraw htuk ni hta sodium jum dat  grai law ai re majaw madung gaw sai rawt ana hte salum ana byin wa shangun lu nna sade hpe mung jahten shaza kau ya lu nga ai.Dai majaw hkau soi jahkraw hpe shadawn sharam rai sha ga,hkau soi jahkraw hpe shadu sha,tsing sha ai shaloi mung hka hpun lum hte shawng jahkring mi tsing katsau kau nna tsing sha,shadu sha ai gaw hkamja lam hkra machyi ai hta loi hkyamsa ai nga nna hpaji jaw matsun da nga ma ai.

Ready made lusha ngu ai hta lahta e tsun mat wa sai sha hpa ni chyu sha nrai nga ai, shingra dwi hpa ntsin nre ai, nam si gayau ntsin ni hte dwi hpa ntsin ni mung law law nga nga ai. Dai dwi hpa ntsin ni hpe ma kaji ni mung grai ra lu nga ma ai re. Grai law lu ai gaw ma ni a hkam kaja lam hpe mung hkra machyi shangun na teng sha rai nga ai. Dai majaw kaja ai n kaja ai hpe chye ginhka sai masha kaba ni gaw ma ni a myit ra ai hku hkrai n hkan ya ai sha, shanhte a hkam kaja lam hpe madung myit shalawm ya nna ready made lusha ni hpe shadawn sharam rai jaw sha ga, masha shagu mung ready made lusha ni hpe shadawn sharam rai lusha chye nna asak galu hkam kaja ai akyu hpe hkam la nga ga law.

By - Julia Ja Ing