Pawt Htoi Sha Nna Lu Mai Ai Hkamja Lam Akyu Ni

Pawt htoi sumla

Malu masha kaja hta lawm nna shat gawk hta law law mu lu ai pawt htoi gaw hkamja lam a matu grai kaja ai lu sha langai rai nga ga ai. Pawt htoi a hkamja lam akyu hte seng nna kadun ai hku tsun ga nga yang pawt htoi hta potassium,vitamin A, vitamin C, mawm dat hte beta carotene dat ni grai law rawng ai.

Pawt htoi sha nna lu la mai na hkamja lam akyu ni gaw ( 1 ) pawt htoi hpe galoi mung sha ya ai gaw sinda shan cancer ana n byin hkra makawp maga ya lu ai. ( 2 ) lu sha rin ai shat lam a matu kaja nna kan chyat, kan shingdang ai lam n byin ai sha n ga salum hte sin a magam bungli hpe mung n gun shabyin ya lu ai.( 3 ) vitamin A rawng ai a majaw myi n gun kaja nna n ra hte seng ai ana ni n byin hkra makawp maga ya lu ai. (4 ) Pawt htoi gaw hkum hkrang kraw kan kata jasan jaseng ya ai hta atsam grai rawng ai majaw sin hte sai san seng lu na matu lam hta grai garum ya ai rai nna ban si tu ai, hpyi hkra machyi hten za hkrum ai hte hpyi hkraw kapran ai lam n byin hkra makawp maga ya lu ai. Dai majaw sai shan madi lali tsawm htap ai hpe grai akyu jaw ya ai.

5) ma kaji ni shata ( 6 ) hpring ai hpang lu sha dat jahpring jaw sha ai shaloi pawt htoi hpe bang shalawm jaw sha ai rai yang ma ni hta ra kadawn ai vitamin dat ni lu nna bacteria hkrung kanu ni hte kap bra ana ni kaw na makawp maga ya ai sha n ga ma kaji ni a myi n gun grau kaja hkra garum ya lu ai. ( 6 ) pawt htoi sha ya ai gaw makret makrat machyi mai ai hte asak gawng kung lawan ai hpe shayawm kau ya lu ai. (7 ) Pawt htoi hpe nam si ntsin zawn gayau lu ai rai yang hkum num nak yawm hkrat lu ai re majaw hpum shayawm mayu ai masha ni sha ya na kaja ai.

Pawt htoi hta vitamin A hte mawm dat ni grai law rawng ai re majaw sai kata jumdwi dat law rawng ai hpe mung reng hkang sharap shara ya lu ai. Dai majaw pawt htoi gayau ntsin hpe jumdwi n bng jat ai sha lu ai gaw hkamja lam a matu grai akyu byin shangun lu nga ai. Pawt htoi gaw shingra nan dwi ai nam chyim rawng ai re majaw jumdwi n bang jat  tim adwi nga nna grai lu mu ai re. Ndai pawt htoi gayau ntsin gaw hka dat mung jahpring ya lu ai re majaw hkamja lam a matu gayau lu ya na kaja ai. Shingrai tsawra ai shiga madat nu wa hpunau ni anhte galoi mung sha taw nga ga ai pawt htoi gaw hkum hkrang a matu kaning re ai akyu ni jaw ya lu ai lam daini kalang mi bai madat hka ja la lu saga ai re majaw pawt htoi lu sha shat mai hku nna mung, ntsin shup gayau lu ai hku nna mung tinang a ra ai hku lu sha jai lang nna pawt htoi a hkam kaja lam akyu hpe hkam la nga ga law.

 

Lamang tang madun ai - Julia Ja Ing 

Add new comment

9 + 4 =