Pawt Htoi Lap Mung Sha Mai Ai Re Kun

Pawt htoi lap sumla

Pawt htoi sha mai ai hpe gaw masha yawng chye ga ai hte maren pawt htoi gaw hkum hkrang hkamja lam a matu mung grai akyu rawng ai lusha kaja rai nga ai. Pawt htoi hpe grai manu shadan lu sha law ga ai raitim shi a lap hpe sha chye ai masha gaw nau n nga ai hpe mu lu ai. Gat hkan mung pawt htoi ntaw ntsang dut ai raitim pawt htoi lap gaw n dut nga ai re. Kaja wa nga yang pawt htoi lap mung laubu pawt a lap zawn sha, sha mai nga ai. Pawt htoi sha yang hkamja lam a matu kaja ai zawn pawt htoi lap mung hkamja lam hpe akyu jaw madi shadaw garum ya lu nga ai re. Pawt htoi a hkamja lam akyu hte seng nna lai wa sai lamang ni hta law law lang madat hka ja la lu sai mung rai nga ai. Daini na lamang hta gaw pawt htoi lap a akyu rawng ai lam, hkamja lam a matu gara hku akyu jaw ai lam hpe madat hka ja la yu ga.

Naw kya hkalung ai pawt htoi lap hpe asan rai kyaw gangau sha, shing nrai hka hpunglum hte kaprawng kau nna gayau sha, banau ntsin hte ahtawk sha, shing nrai shan, nga ni hte pau shadu sha, hotpot shadu hkan bang sha rai tinang ra ai ladat amyu myu hku shadu sha mai ai lu sha kaja rai nga ai. Pawt htoi lap gaw loi mi hka ai zawn nga nam chyim rawng ai raitim shi hta hpa gung dat mung nrawng ai sha, hkamja lam a matu tsi byin ai lusha rai nga ai.

Pawt htoi lap sha ai gaw hkam jan lu na hkum chying n gun kaja ai zawn nra hte myi a matu mung kaja ai lusha rai nga ai.Hkum chying n gun kaja ai ngu ai hta pawt htoi lap gaw gung maza ni hpe shaprai kau ya lu ai zawn vitamin C grai law rawng ai majaw anti – oxidant tsam grai rawng ai. Hkum chying n gun hpe jahpring shatsup ya lu nna ana ahkya ni kap shang ai hkrit tsang hpa kaw na makawp maga ya lu ai.

Myi maju lasa hkamja ai – pawt htoi lap hta lutein, zeaxanthin hte beta-carotene dat ni grai law rawng ai majaw myi sap sanap ni hten za hkra machyi lam n byin hkra makawp maga ya lu ai hte myi mut kap, myit htau ana byin ai hpe mung hkyamsa shangun lu ai.

Hkum hkrang kata na gung maza ni hpe shprai kau ya lu ai – pawt htoi lap gaw hkum hkrang hta rawng taw ai gung maza ni hpe lawan ai hku jasan shaprai kau ya lu nna sade hkamja lam hpe madi shadaw garum ya lu ai.

Sai shadawn shadang hting shara lu ai – pawt htoi lap hta potassium rawng ai majaw sai lam lasa ni hpe shakya shamyan ya lu ai zawn sai lam ni hta sai gayin hkawm sa kaja hkra garum ya lu ai. Sai rawt ai lam nbyin hkra makawp maga ya lu ai z awn salum sai lam lasa hpe hkamja shangun nna a kajawng sha salum gumlawt hkring mat ai, hkum katsing si ai lam n byin hkra mung makawp maga ya lu ai.

Nra hkamja ai – pawt htoi lap gaw pawt htoi daram nhprang dat nrawng ai raitim nra hpe ja hkak hkamja lu hkra kaja dik garum ya lu nga ai. Nra kya, nra bawm ai lam nbyin hkra garum ya lu ai zawn nra ni hpe hkamja ja hkak shangun ai.

Lusha rin kaja ai – pawt htoi lap hta mawm dat grai law rawng ai majaw kan sa man nna pu hpe hkamja shangun ai zawn lusha rin masa hpe hkamja shangun lu ai.

Pu kaba hpe mung hkamja shangun ai re majaw pu kaba cancer ana nbyin hkra makawp maga ya lu ai. Dai re majaw tsawra ai shiga madat nu wa hpu nau ni pawt htoi hpe sha mai ai zawn pawt htoi lap sha ai mung ya sha tsun ai hkamja lam akyu law law hpe hkam lu mai nga ai majaw pawt htoi lap hkalung ni hpe n kabai kau ai sha lu sha jai lang nna hkum hkrang hkam kaja ai akyu hpe hkam la nga ga law.

 

Lamang tang madun shana ya ai - Julia Ja Ing 

Add new comment

12 + 1 =