Orthodox Saradaw Kaba Bartholomew A Matsun Ga

Wa Sarabyin a matsun laika ni hpe hpung tang hpaji ninghkring ni,Karai hpaji ninghkring ni,myit sawn hpaji ninghkring ni hte mare buga wuhpung wuhpawng ni law law gaw bai myit sumru nna tsun shapraw dan ai marang e, akyu pru manu dan shangun sai.Kahtawlik Nawku Hpung shinggan na kaga nawku hpung ni,kaga masham makam hpung ni mung dai hte maren sha ndai lam ni hpe sung sung myit yu tsang ai hpe tsun shapraw sai hta n-ga,ndai anhte yawng hte myitru nga ai hkrit tsang lam ni a ntsa manu dan ai sawn sumru lam jaw ya sai.

 Orthodox Nawku hpung a Saradaw Kaba Bartholomew a matsun ga hpe madi madun ga nga yang Saradaw kaba Batholomew gaw anhte marai shagu mungkan shingra tara yawng a ntsa galaw lai wa sai,machyi shangun sai lam ni hpe myit malai ra nga ai lam hpe tsun madun sai.Grup-yin hte seng nna yawng gaw matut manoi loi loi jahten sharun sai lam,Karai hpan da ai hkrang jahten kau ai lam ni hta kaji kaba shang lawm galaw sai hpe hkap la na matu saw shaga sai.Ndai ga matsun ni hpe bai tsun tsun rai nna,anhte yawng hpe mungkan ga ntsa e,tawt lai sai tinang mara hkam la na matu asawng nna mung,shadut nna mung,dakring dalang saw shaga lai wa sai.Dai mara ni gaw shinggyim masha a matu Karai Kasang hpan da sai hkrung mahkrung asak nga ai ni hpe jahten sharun ai,shinggyim masha a matu mungkan ga a hkumtsup ai kahkyin lam hpe duhkra ladaw galai shai hkra shanbyin ya nna,grau sawng ai de jahten shangun ai,nam maling hte ga sau rawng ai ga,nawng ni jahten sharun ai,shinggyim masha a matu lamu ga na hka,ga sau ,san ai nbung ni hpe nsan nseng shangun ai lam ni rai nga ai.Mungkan a shignra tara hpe nhtan shai hkra galaw ai mara gaw anhte hkum nan a ntsa shut hpyit ai hte Karai Kasang hpe shut hpyit ai mara rai nga ai.

Saradaw Batholomew dai lam tsun ai shaloi kalang ta gyupyin hte seng ai mang hkang ni a ru pawt rai nga ai wenyi lam hte laikyang tara lam ni hpe ahkyak da na matu madi madun sai re.Dai shadum ai lam hta anhte gaw jak ladat hpaji (technology) hte sha mahtai tam ai nrai,shinggyim masha ni galai shai ai masa hta mung mahtai tam na hpe hpyi shawn ai re.Shing nrai yang,anhte gaw ana kumla hpe chyu sha myit jung ai lam rai na ga ai.Anhte jai lang ai hpe ap nawng ai myit hte shara galai na,nammak lawhpa myit hpe shawang myit hte galai na,majoi lahpawt kau na lam hpe garan kachyan ai lam hte galai na,garan jaw chye shangun ai hte asum jaw chye na gaw shadawn sharam myit nga ai lam ni hte galai na hpe shi hpyi shawn nga ai.Dai lam ni gaw tinang ra sharawng ai hta Karai Kasang a mungkan ga ra kadawn ai gaw hpa rai ngu ai de,gau ngwi ngwi sit shang ai tsawra ai lam rai nga ai.Anhte gaw Hkristan rai nga ga ai hte maren Mungkan ga gaw hparan ra nga ai manghkang nrai,pyaw ai mungsung re ai hpe kabu ai hte shakawn myit rau sumru dinglik yu let nga sa shara rai nga ai.