Nlung Chyahkri A Hkamja Lam Akyu Ni

Nlung chyahkri ngu tsun dat ai hte tsi mawan langai re ai hpe anhte yawng chye na da na ga ai re.Nlung chyahkri hpan law law nga ai hta na potassium nlung chyahkri hpe akyu jashawn jai lang nga ga ai.Nlung chyahkri hpe mungkan madang hku jai lang ai hpe yu dat yang hka san na matu hte shadang la ni n hka mun rep ai shaloi jai lang law ai hpe mu lu nga ai.Tsi mawan hku nna gaw n gup kata byin ai ana ahkya ni mai na matu,n gup manam hkyamsa na matu,lagaw lahtin ga,lagaw lahka hka ai hkyamsa na matu hte lahpa npu,hpa yen manam mai tsi ni hku nna jai lang law ai hpe mu lu ai.

Nlung chyahkri gaw hkamja lam a matu tsi mawan kaja langai tai ya lu ai rai tim nlung chyahkri hpe jai lang ai shaloi hkum hkrang a matu ramdaw re ai shadawn shadang rai na gaw ahkyak nga ai.Nlung chyahkri hpe grai law jai lang ai rai yang hkum hkrang hta hkra machyi ai lam ni bai byin wa chye nga ai.Dai majaw nlung chyahkri hpe hkamja lam hte htuk manu ai hku jai lang mai na ladat lam hte nlung chyahkri kaw na lu la mai na  hkamja lam akyu ara ni hpe daini anhte hka ja la yu ga.

1)N gup kata hpye ai,wa machyi ai lam ni byin ai rai yang nlung chyahkri kachyi mi hpe rin mani shingmun la nna hpye ai shara hta mun bang ya ai rai yang loi kaprep machyi ai rai tim hpang shani rai jang hkyamsa mai tsai mat na ra ai.

Rai tim ma kaji ni hta byin ai rai yang chyawm gaw dai hku n mai galaw ya ai, nlung chyahkri kachyi mi hpe hka hpunlum hte gayau nna n gup krang garu ntsin hku sha kashin ya u.Lani mi 2 lang shing nrai masum lang galaw ya mai ai.Masha kaba mi rai rai,ma kaji mi rai rai n lung chyahkri ma um da ai ntsin nlu ma ut kau na gaw sadi ra nga ai.

2)Lagaw lahtin ga ai,lagaw lahka hka rai byin ai rai yang nlung chyahkri hte tsi shamai la mai nga ai.Nlung chyahkri hpe wan hte shawng kakang kahtet kau nna katsi hkam da u,katsi ai hpang htu mani shing nrai,rin mani la nna ma un sau hte gayau nhtawm lagaw lahka hka ai shara hta chya ya ai rai yang mai mat na ra ai.

3)Nlung chyahkri gaw hka hta lawm ai maza mala,shingmun shingmawng  ni hpe jasan ya lu ai,htin mat shangun lu ai atsam rawng ai.Hkum pup hka zawn re ai ni hpe jasan kau ya lu ai majaw hka san tsi hku nna mung akyu jashawn jai lang law nga ga ai re.

4) Nlung chyahkri gaw salat bat manam ai hpe mung jahkoi kau ya lu nna bacteria ni hpe sat ma nga kau ya lu ai atsam rawng  ai majaw lahpa npu manam ai,hpa yen manam mai tsi hku nna jai lang law ai tsi mung rai nga ai.Dai majaw hpa yen manam chye ai masha ni nlung chyahkri hpe shani shagu jai lang ya na kaja ai.

5) Nlung chyahkri gaw hpyi ni hpe apri rai kang  tsawm shangun lu ai re majaw myi man hte du grup yin hta grau byin chye ai hpyi kyip dumrit ai lam ni yawm matu jai lang mai nga ai.Myi man madi dat nga na matu chya hpa hku nna mung jai lang mai ai.Dai majaw nlung chyahkri gaw masha hpe hpyi kyip lawan ai kaw na makawp maga ya lu ai,hpyi pri madi san tsawm shangun ai tsi mung rai nga ai.

6) Nlung chyahkri hpe udi di tum shaw kau nna gayau chya ya ai rai yang ban si tu ai hpe hkyamsa mai tsai mat shangun ai ban si mai tsi kaja langai mung rai nga ai.

7) Baw hta tsi grai law rawng ai rai yang nlung chyahkri hpe hpalap sau hte hka rau gayau nna tsi sat tsi hku nna jai lang mai ai.Bai baw saw rawng nna baw gaya ai rai yang mung baw hkrut ai shaloi nlung chyahkri loi bang nna hkrut ya jang baw saw mat mat lu ai.Rai tim grai law nmai lang ai sha,shadawn sharam rai chye lang na gaw ra ai.

8) N gup manam ai mang hkang gaw n gup kata myi hte nmu lu ai bacteria rai kanu ni kraw rawng ai majaw  madung byin ai rai nga ai.Dai hpe nlung chyahkri hte n gup krang,garu kashin ya ai rai yang bacteria ni kraw jat ai hpe makawp maga ya lu nna n gup manam ai lam nbyin sai.

9) Nlung chyahkri gaw labawp galau,bawp le le ai hpe mung hkyamsa shangun lu ai shingra tsi myu mi rai nga ai.Hpa majaw nga yang nlung chyahkri hta na sai hpe san ntsin shangun lu ai atsam gaw bawk le le ai hpe hkyamsa shangun ya lu ai.

10) Lama na ningma hkala la nna sai pru ai,ningma hpye nna sai pru ai lam ni byin ai rai yang nlung chyahkri shingmun hpe ana byin ai shara hta mun bang ya ai shaloi sai pru hkring mat lu nga ai.Rai tim ningma grai sawng nna sai grai law pru ai rai yang chyawm gaw tinang chye ai hku ntsi taw ai sha tsi rung,tsi gawk de lawan ai hku sa madun ai kaja dik rai nga ai.

11) Lagaw hpye gaya ai,ga kasha sha nna gaya ai rai yang nlung chyahkri hpa lap kyaw lahkawng daram hpe hka hpunlum hte gayau nna lagaw tsing da ya jang mai mat lu ai.Kalang tsing yang minutes 15/20 daram na hkra tsing ya ra ai.

Tsawra ai shiga madat nu wa hpunau ni nlung chyahkri hpe shingra tsi mawan hku nna ta tut akyu jashawn jai lang taw ai ni mung law law rai nga na ga ai.Nlung chyahkri gaw sha hpa nre,tsi re hpe dum nna grai law nmai lang na hpe gaw sadi la chye ga.Lama grai law shalai lang ai rai yang nsa sa lam hte seng ai ana ahkya ni bai byin wa chye nga ai majaw shadawn sharam rai akyu pru ai hku jai lang nna hkam kaja ai akyu hpe hkam la nga ga law.

Lamang tang madun ai - Julia Ja Ing