N'gun Tsi Hpe Hpa Majaw Lu Nga Ga Ai Kun

Shiga madat nu wa hpunau ni ndai lamang hta gaw n-gun tsi hpe hpa majaw lu ga ai kun ngu ai hte seng nna Sarawun Phyo Wai Linn sang lang da ya ai hta na hkaja la lu ai hpe matut  garan kachyan ya mayu ai.

Masha law law wa n-gun tsi hpe lu nga ga ai.Ndai n-gun tsi gaw sarawun ni a matsun nra ai sha tinang ra dum ai hku mari lu mai ai tsi mung rai nga ai.Raitim n-gun tsi hpe hpa a matu lu ai,hpa majaw lu ai rai ngu san dat yang grau hkam kaja n-gun rawng na matu,yup pyaw,sha mu na matu ngu ai daram hpe sha chye na tawn da ai ni law nga ga ai.

Dai hpe atsawm chye tawn da nna lu ga ai rai yang grau nna akyu hkam la lu na gaw teng sha rai na ga ai.N-gun tsi hpe hpa majaw lu ra ai lam sarawun sang lang da ya nga ai gaw vitamin,nhprang dat hte lu sha n-gun dat ningra ai hpe tsi shamai na hte makawp maga na matu n-gun ban jahpring jat ya ai rai nga lam tsun da nga ai.

Anhte masha shagu gaw shani shagu malu masha sha nna asak hkrung nga ga ai.Rai tim dai malu masha ni kaw na hkum hkrang hta ra kadawn ai lu sha n-gun dat ni hpe law htam rap ra ai hku nlu la nga ga ai.Grau nna masa lam amyu myu a majaw shani shagu na malu masha ni hpe mai byin ai hku lu sha taw ai masha ni,aten galu chyi jung ana hkam sha ra taw ai masha ni,shat kan hte pu lam mang hkang ana lam ma byin ai masha ni hta vitamin hte nhprang dat ni ningra wa chye ai.

Dai re majaw tinang hta hpa baw dat ningra taw ai ngu ai hta hkan nna ana kumla ni madun wa chye ai.Law malawng mu mada lu ai ana kumla ni hpe ntsa lam tsun ga nga yang vitamin dat ning ra ai yang hpyi ana mang hkang byin wa ai,vitamin B uhpung dat ningra ai rai yang maju lasa n-gun yawm ai ana kumla byin wa ai,vitamin C ningra ai rai yang wa uji ana ni byin wa chye nga ai.Vitamin D hte calcium dat ningra ai shaloi nra hte seng ai ana kumla ni byin wa ai,hpri dat ningra ai rai yang sai n-gun yawm ana ni byin wa chye ai hpe grau nna mu mada lu nga ga ai.

Dai majaw n-gun tsi lu ai shaloi tinang hta byin taw nga ai ana kumla ni hta hkan nna sarawun hte san jahkrum yu nna lu ai rai yang grau nna tang du ai hku akyu hkam la lu na rai nga ai.Tau nau makawp maga na matu,hkam kaja na matu hte yup pyaw na,malu masha atsawm sha kam na matu sha n-gun tsi lu mayu ai masha ni a matu gaw vitamin hte nhprang dat hkum hkum tsup tsup rawng ai n-gun tsi hpan ni hpe lata mari lu mai ai lam Dr.Phyo Wai Linn sang lang da ya ai hpe matut gam garan ginlen ya dat lu ga ai.