Nchye Kau Dat Ai Gumhpraw Dum Jahpan

Ndai lang na hpaji ningli hka ja lamang hta gaw “Nchye Kau Dat Ai Gumhpraw Dum Jahpan” ngu ai ga baw hte garan kachyan ya mayu ai.Masha gaw shi lu da ai gumhpraw hpe shi sha nchye yang,dai gumhpraw gaw manu ndan ai.

Ndai lam hte seng nna ga shadawn langai mi hpe yu yu ga: masha langai mi hpe shi a kawa dim gumhpraw lap wan mi htawng da ya ai.Dai gumhpraw hpe kawa dim gaw kasha wa a  mying hte gumhpraw dum hta bang tawn da ya ai.Raitim dai lam hte seng nna kawa dim hpa ntsun da ai majaw,kasha wa dai hpe nchye ai.Kasha wa gaw shata shabrai hte amu galaw sha ai wa re.Dai shabrai hte sha nga yak nga ai.Shi gaw ra ai rai ni hpe n mari lang hkra,gumhpraw mahkawng nna,kasha ni hpe dakkasu jawng shalun ai.Shi dingla ai shaloi mung,sut rai grai sadi lang ai hte nga shalai kau nu ai.Shi si wa ai shaloi,madu jan hte kasha ni a matu sutgan loili ngam da ya lu ai majaw shi myit pyaw wu ai.

Dai laman hta gumhpraw dum na shi a gumhpraw gaw grai law htam jat wa ai.De a lu jat gumhpraw gaw laning hpang laning rawt jat wa ai.Shi si ai ten hta wan shi hkun du na sai.Dai gumhpraw gaw shi a gumhpraw sha gaw arai nga ai.Raitim shi gaw dai gumhpraw lu ai hpe nchye wu ai majaw dai gumhpraw shi hpe hpa akyu n jaw wu ai.

Tsawra ai shiga madat ni ndai zawn re ai lam ni byin wa na gaw anhte kadai mung kanoi n myit hkawn lu ai daram rai nga ai.Raitim ndai ga shadawn gaw tsun mayu ai lachyum hpe shapraw dan ya nga ai.Dai gaw madu n chye ai sutgan gaw lu da tim,kaman lila sha re.Ndai gaw gumhpraw hta sha n-ga kaga rai law law hta mung maren sha tsun lu nga ai.Wenyi sutgan hta mung arai sutgan hta mung ndai lam maren sha teng nga ai.

Hkrak tsun ga nga yang ndai arai sutgan a lam hpe wenyi sutgan a lam hta lang yang grau lachyum pru na tai nga ai.Lahta de na ga shadawn hta rawng ai kasha wa gaw kawa dim tawn da ya ai shi a sali wunli hpe chye ai rai yang,grau hkyamsa na re ngu nna mung anhte ntsun lu ga ai.Dai sutgan nga ai lam hpe nchye ai mahtang,shi a matu grau kaja,grau pyaw nga ai kun nchye tsun ai.

Raitim ndai gaw wenyi sutgan hta galoi nteng ai.Kaja ai hpe ra sharawng ai myit atsam kaba ai anhte hkum shagu hta rawng nga ai hpe chye madat la ai lam gaw,anhte a nga sa lam hpe galu kaba wa shangun ai hte hpawng shingra a mai kaja lam a matu anhte grau jat nna amu galaw lu ai hte akyu pru nga ai.Lahta de na ga shadawn hta lawm ai kam nrawng ai kasha wa hte maren masha law malaw gaw shanhte madu lu da ai grai kaba ai  sutgan hpe ndum chye ai sha,si htum mat wa ai lam gaw grai yawn hpa rai nga ai nga nna Wa Jau Paul Lasang La kaw nna ga shadawn langai mi hte ka lajang tawn da ai kaw na garan kachyan ya dat ai re.Shingrai tsawra ai shiga madat ni anhte mung Karai Kasang jaw bang da ya sai tinang madu lu da ai,tinang hta nga ai mai kaja manu dan la ai sutgan ni hpe ndum nchye majoi shalai kau ai hku nre sha,ta tut hkrang shapraw sharawt nna,arai sutgan,wenyi sutgan ni hpe shalaw jahtam jat la na mai kaja la nga ai.