Nawn Hkawm Ai Rai Kabai Kau U

Anhte shinggyim masha ni a sak hkrung lam hpe yu dat ga nga yang bu hkawm ai gaw pyaw ai hkring sa la lam langai rai nga ai.Rai tim dai hta yawm ai lam langai mi gaw nawn hkawm ai rai hpe gun hpai ra ai lam rai nga ai.

Bu hkawm ai masha gaw lit,nhpye ali ahti,abaw anaw rai nawn hkawm ai shaloi, hkrak npyaw lu ai,lit li lam bai byin wa nga ai.Dai majaw bu hkawm masha nkau mi gaw tinang nawn hkawm ai arai hpe ap mai shara kaw ap kau da nna hkum gaman asan apan rai hkawm nna pyaw hpa lam hpe lu la ma ai re.

Masha a prat hta mung ndai hte maren bung nga ai.Masha langai hte langai a myit masa nbung ai,hkap la,hkam la chye ai lam nbung ai rai tim yawng gaw bu hkawm ai masha ni rai  ga ai.Anhte yawng nawn hkawm ai rai ni hpe hpai ginrawn ra ga ai.Grau nna anhte hpe lit li shanak ya ai nawn hkawm rai lahkawng nga ai.Dai gaw anhte hta grai li ai sadek langai hpra hpe pai hkra lang nna,anhte a prat hpe nga sa wa ra ai hte bung ga ai.Sadek langai mi hta shawng na yawn lam ni,kaga langai mi hta hpang na hkrit tsang hpa lam ni,ngu nna kap taw nga ai.

Tsun mayu ai gaw hkum hkrang hta machyi ai hpe machyi hkrum nga ai ten hta sha hkam sha ra ga ai.Rai tim masha law malaw a myit machyi ai lam gaw shawng de na myit npyaaw hpa  mabyin lam ni hte hpang de byin pru wa na ruyak lam ni hpe myit tsang ai lam rai nga ai.Dai zawn byin ai gaw anhte a sak hkrung prat a matu yawn hpa rai nga ai.Hpa majaw nga yang lai mat sai hte seng nna shut kau ai lam ni,yawn hpa lam ni,myit npyaw myit machyi hpa ni nga na ga ai,rai tim dai lam ni gaw ya aten hta hpa akyu kaja langai mi pyi n jaw lu ai.Nang myit machyi taw ai,yawn taw ai,myit npyaw taw ai lam ni gaw prat a sak hkrung lam hta akyu yawm ai lam sha byin lu nga ai.

Lai mat sai gaw lai mat sai re.Shawng de byin mat wa sai lam ni,shut kau sai lam ni gaw hpang de na matu sadi jaw ai lam hku nna hkap la chye na mai kaja nga ai.Dai hku nre sha,shawng de na lam hpe yawn hpa,myit machyi hpa lam hku sha hkam la,sumru nga ai rai yang,dai gaw akyu nrawng ai nawn hkawm rai hte bung wa ai.

Hpang na lam hte seng nna tsun ga nga yang hpang de hpa byin na re ngu ai hpe anhte kadai mung hkrak nchye lu ga ai.Mabyin lam  law malaw gaw galoi shagu byin taw na nre.Dai majaw shawng de byin lai wa yu sai yawn hpa,myit npyaw hpa lam ni zawn sha myit tsang taw ai gaw akyu nrawng ai lit shajan rai nga ai.

Anhte bu hkawm sa wa ai prat hta pyaw pyaw hte hkawm sa lu na matu gaw nawn hkawm ai rai shajan,lit shajan ni hpe tawn kau da na ra ga ai.Dai shaloi sha ya na aten hta anhte nga nga ga ai hte maren tinang a sak hkrung prat hpe akyu pru ai hku akyu jashawn sak hkrung hkawm sa lu na rai nga ga ai law.

Nang hta e myit machyi lam,myit yawn lam hte myit tsang lam ni nga ai rai yang ya aten kaw nna dai lit shajan hpe kabai kau u.Dai rai yang ya madu da lu ai sak hkrung prat a tsawm htap ai ahkaw ahkang hpe lu la na ra ai.