Namlaw Namlap Hpe Atsawm Kashin Sha Chye Ga

Anhte yawng gaw shani shagu shadu lu,shadu sha nna asak hkrung ai,dai lu sha ni hta lusha n gun dat ni rawng ai majaw hkum hkrang hkamja lam a matu lu sha n-gun dat ni hpe jahpring shatsup la nga ga ai.Rai tim  mung namlaw nam lap,namsi namsaw ni hpe garai n shadu ai ten,naw kashin san seng la ai aten kaw nna dai lu sha ni hta na lusha n gun dat ni jasum kau chye nga ga ai.Dai gaw lu sha kashin san seng ai ladat n jaw ai a majaw mung  rai nga ai.

Nam law/lap,namsi nam saw ni hpe atsawm n kashin ai sha ai rai yang ana kap wa lu ai mung teng nga ai.Hpa majaw nga yang hkai sun galaw sha ai ni,hkai nmai hpun shagu ni hte namsi namsaw ni hta dat nam hpun,latung shingtai si tsi hte kaga chemical datu tsi ni amyu myu grai jai lang law ai prat rai nga ai,ya Covid ana byin taw ai ten hta sha nre,galoi mung tsang ra nga ai majaw nam law/lap,nam si nam saw ni hpe atsawm tsai hkra kashin san seng nna sha na gaw dum nta masha yawng a hkamja lam matu ahkyak ai lam rai nga ai.

Ndai namlaw/nam,namsi/saw ni hpe mi na shi a nam chyim mung nhten mat ai sha, dai hta kap taw ai bacteria ni,dat tsi hte latung shingtai ni hpe mung sat kau ya lu ai,shatsai kau ya lu ai kashin san seng lam ni hpe tsun ga nga  yang ( 1 ) jum ntsin rai nga ai.Gat kaw na mari wa ai,namlaw/lap,namsaw namsi ni hpe kashin san seng ai shaloi jum ntsin hte kashin ai ladat hpe jai lang ding yang re ai ni mung law law nga ma ai.

Jum ntsin jai lang ai ladat hpe tsun ga nga yang shawng nnan hka hpum kachyi mi lum lum nga ai hta jum bang shatun nna shalau kabun dat u,dai hpang tinang kashin mayu ai nam law/lap,namsi/saw hpe bang nna yawm dik minutes (10 ) dang tsing tawn da u,minutes (30) dang tsing tawn da tim mai ai.Dai hpang asan re ai hka hte bai kashin kau nna sha ai rai yang mi na shi a lu sha dat hte nam chyim ni mung nhkoi mat ai sha,latung shingtai hte datu tsi ni mung tsai mat lu nga ai.

Bai langai mi gaw namchyim ntsin rai nga ai.Nam chyim ntsin mung latung shingtai kanu ni hpe sat kau ya lu ai atsam rawng ai re.Dai mung hka hpun lum loi mi lum lum nga ai hpe hka zalung hta bang nna tinang kashin mayu ai shat mai kade daram re ai hta hkan nna namchyim hkungun hpe sharam bang nhtawm gayau kabun dat u,dai hpe minutes ( 10 ) daram na hkra tsing da ai hpang hka jasan hte bai kashin kau dat jang rai sai.

Bai langai gaw ရှာလကာရည်  ngu ai ntsin hkri rai nga ai.Ndai shar laga ntsin hkri hte mung nam law nam lap ,nam si nam saw kashin sha chye ai masha ni law law nga ma ai re.Shar laga ntsin hkri htam mi hta hka htam mali dang bang gayau nna minutes 10/15 daram na hkra tsing da ai hpang hka jasan hte bai kashin kau dat jang nam law/lap,nam si/saw ni hta kap lawm wa ai ana kanu ni,dat tsi hte latung shingtai ni si mat lu  ai.Ndai lam ni gaw gat kaw na mari wa ai,nam law/lap,nam si nam saw ni hpe hkamja lam hte htuk hkra shim lum ai hku lu sha na matu kashin san seng sha mai ai ladat kaja ni rai nga ai majaw lu sha hpe madung lajang jaw ai shat gawk gainu ni nchye da nmai rai nga ga ai ngu tsun shadum ya mayu ai.Shat gawk gainu tai ai ni gaw dum nta masha yawng a shim lum ai hkamja lam lu la na matu madung lit nga ai ni re ngu tsun tim nshut nga ai.