Mungkan Ga Hte Grup YIn Shingra Tara Hpe Makawp Maga Ga

Anhte Yawng A Nga Shara Nta Rai Nga Ai Mungkan Ga Hpa Byin Nga A Ta

Tsawra hkungga ai shiga madat nu wa hpunau ni ndai lamang hta e Wa Sarabyin Francis a matsun laika rai nga ai Laudato Si,Mungkan ga hte grupyin shingra tara hpe makawp maga ga ngu ai lam hte seng nna anhte yawng a nga shara nta rai nga ai mungkan ga hpa byin nga ai lam hpe anhte shiga madat ni kalang mi bai jawm sumru yu ga ngu saw shaga dat mayu ai.

Mungkan ga hte shinggyim masha ni a masa hpe Karai hpaji hte myit mang hpaji lam hku sumru yu yang shinggyim labau hta kalang mung nbyin hkrum yu ai lam mabyin masa ni daini byin pru taw nga sai.

Ndai mabyin masa lam ni hpe yu dat yang matut manoi lawan shaten let galai shai nga ai lam ni gaw shinggyim masha hte mungkan ga hpe hkra machyi shangun nga ai hta lawan ladan lam ngu ai gaw prat hte magam bungli galaw hkawm sa ai hpe grau shachyut shangun nna htam lahkawng kahtap machyi hkra nga ai.Galai shai lam gaw magam bungli hkrang ladat ni a yak ai lam a adaw achyen rai tim,bawngring kaba wa ai anhte a prat aten ladaw gaw shinggyim masha ni hkrum nga ai galai shai lam grai lawan dik ai rai nna,dai gaw nsoi nsa hpaji ladat hte seng nna galai shai lam lanyan ai shingra tara masa hku yu yang shai nga ai.

Dai hta n’ga ya na zawn matut manoi lawan shaten ai galai shai lam ni a bandung gaw yawng a matu akyu pru mai kaja ai hte hkum tsup ai,ngang kang ai shinggyim bawngring lam de du na ahkyak rai nga ai n’gun dat lam nrai na re.Galai shai lam gaw anhte ra sharawng ai lam lama ma rai nna,dai lam gaw shinggyim masha law law a prat madang hte mungkan ga hpe hkra machyi wa ai aten hta anhte a myit tsang hpa a npawt rai wa ai.

Shinggyim masha a atsam ni hte lachyum npru ai galu kaba lam ni hpe kam sham hkan sa nga ai aten ladaw hta shinggyim hpawng kata na wuhpung wuhpawng nkau mi gaw grau sawn dinglik yu ai masa hpe hkap la jai lang nga ai.Anhte grup yin masa hpe grau grau mu hprang wa ai hte dai grup-yin shingra maka ni hpe makawp maga ra ai lam,dai ni anthe a gintawng lamu ga hta byin nga ai lam ni gaw kaja wa nan hkrit tsang ra wa ai hpe ahkyak da ai lam grau wa nga ai.Dai ni anhte hpe gara lam ni gaw jahkrit shama nga a ta?dai lam ni hpe dun npu de ye seng jahkrat kau nlu ai gawmai gawsha ga san ni hpe bai maram yu ga.Anhte a bandung gaw shiga law law jaw na shing nrai,anhte chye mayu ai lam ni hpe mahtai jaw myit dik na matu yaw shada ai nre.Rai tim grau nna anhte a masin hta hkra dum ai hprang ai ni tai na matu,mungkan hta byin nga ai hpe tinang a jamjau lam rai nga ai ngu kayin yu ai,dai hpang anhte hkum shagu hpa galaw lu na ngu ai hpe tam sawk yu na matu rai nga ai lam Wa Sarabyin Francis anhte hpe tsun shadum,matsun da ya nga ai.

Dai re majaw tsawra hkungga ai shiga madat nu wa hpunau ni dai ni anhte a shanu shingbyi shara,nga shara nta rai nga ai mungkan ga lani hte lani ahpye alam rai,ningma hkang kap,hten za hkra machyi taw nga ai hpe makawp maga sa wa na,lit la gawn hkang sa wa na matu anhte yawng hta lit nga ai lam Wa Sarabyin Francis tsun shadum n’gun jaw taw nga ai hpe galoi mung myitdum nga let tinang a makau grupyin tsit lali tsawm htap nga lu hkra tinang hta du ang wa ai magam lit hpe koi hprai kau ai lam n galaw ai sha jut shara mi kaw mi nna shang lawm shatsawm shahtap sa wa ga ..