Mungkan Ga Hta Tinang Hte Nseng Ai Hpa Mung N-nga Ai

Ndai lamang hta Wa Sarabyin Francis a matsun laika rai nga ai Loudato Si hta na Mungkan ga hta tinang hte nseng ai hpa mung n nga ai lam hpe bai sumru hkaja la yu ga ngu saw shaga mayu ai.Shinggyim masha ni gaw manu dan ai nhprang sut rai ni hpe shut shai ai masa lam ni hte tinggyeng lu lam a matu sha majoi jai sum kau ai majaw,grup-yin shingra maka hten run nga ai rai nna,shinggyim wuhpung wuhpawng yawng gaw de a majaw hten za na hkrit tsang lam hkrum nga ga ai.Wa Sarabyin Paulu VI gaw mungkan (UN) ginjaw hte shahpa jarik hte hkailu hkaisha magam (Food and Agriculture organization of United Nation) hte seng ai ginjaw zuphpawng langai hta mungga shaga ai shaloi,jak rai magam madung da ai shiggyim masa a majaw byin pru mai ai hkrit tsang ra ai grup yin shingra tara ni hten za hkrum na maw ai lam,masha ni galaw sa ai magam bungli ni hta npawt daju kaw nna lawan galai ra sai lam,ahkyak da sadi jaw ga tsun lai wa sai.

Hpung tang hpaji hte seng nna,mau hpa galu kaba wa ai hpaga yam-ga hte seng ai lam ni gaw,shinggyim wuhpung wuhpawng a sat lawat,lai kyang masa ni hta mung,dai rawt jat lam ni hte kapyawn nna galu kaba lam n nga ai rai yang,dai rawt jat lam gaw lani mi na nhtoi hta shinggyim masha hpe nhtang rawt malan tsin-yam jaw wa na rai nga ai nga nna tsun lai wa sai.

Wa Sarabyin Yawhan Pawlu II ( John Paul II ) mung grup yin shingra tara ni hten za wa ai hte seng nna grai myit tsang lam byin ai majaw “Redeemer of Men” shinggyim masha ni a “Hkye Madu” ngu ai matsun laika hta Shinggyim masha ni a matu dinghta ga hta jahkring mi na akyu pru lam hte jai lang lu sha na lam sha akyu pru ai hta kaga lachyum n nga ai zawn sha mu ma ai, nga nna myit yu ra sai lam hpe sadi jaw nna mungkan ting hte seng ai grup yin shingra myit masa ni dum hprang galai ra sai lam saw shaga lai wa sai rai nga ai.

Tsawra ai shiga madat Nu Wa Hpunau ni anhte Shinggyim masha ni a jet ai bawng ring lam hta laikyang myit jasat lam re ai hpe malap da n mai nga ga ai.Dai lai kyang myit jasat ni gaw anhte a grup yin mungkan lam a matu hte shingra tara langai hpra hta byin nga ai lam rai nga ai hte byin ai masa ni shada da matut mahkai nga ai hpe myitdum ra nga ai.Dai rai nna anhte shinggyim masha ni a kaja wa byin nga ai lam ni hpe galai shai hkra atsam dat ai lam hta yawng gaw Karai Kasang a ningpawt kumhpa re ai masa hku nna galaw sa ra nga ai.

Wa Sarabyin Benedict XVI mung mungkan sut masa galaw ai lam yak nga  hkra ninghtan shabyin shapraw ai lam ni hpe shamyit jasan nna,grup yin shingra masa hpe hkungga manu shadan akyu pru lam hpe teng sha n shabyin ya nga ai galu kaba lam a htung lai ni hpe shading sharai ra nga ai nga nna tang shawn lai wa sai. Dai shingra tara grup yin gaw anhte a lit nla chye ai tinggyeng lailen a majaw dik hkra hten run nga sai hpe hkap la dum chye shangun nga ai.Shingrai,shinggyim wuhpung wuhpawng grupyin dai hten run lam ni a majaw tsinyam hkrum sha nga sai re.Dai hten za ai lam lahkawng gaw n hkru ai ladat lam madung langai a majaw sha rai nga ai.Dai gaw ndai prat na masha ni,tinang a laikyang myit masin hpe matsun madun nga ai kadai mung ningdang nlu ai tengman ai lam rai nga ai hpe nhkap la lu ai hte shinggyim shanglawt ahkaw ahkang gaw ndut ndang re,nga ai myit ni a majaw rai nga ai.Shinggyim masha gaw myit masin wenyi hte yaw shada myit nga ai rai tim,hpan da hkrum ai shingra tara mung rai nga ai.Ndai zawn mungkan shingra tara ni hpe shut shai ai tinggyeng sung lang ai lam gaw tinang hta grau ai Karai Kasang n nga sai,nga nna kaga ni hpe nmu,tinang hkum tinang sha mu ai kaw na hpang wa ai lam rai nga ai.

Tsawra ai shiga madat Nu Wa Hpunau ni daini mungkan hta anhte shinggyim masha ni a lit nla chye ai myit jasat,tinggyeng akyu hpe madung tawn ai tinggyeng myit masa,tingyeng lailen ni a majaw mungkan ga grai hten za hkrum taw nga sai.Mungkan ga hten za hkrum ai gaw dai mungkan ga hta shanu nga pra ai anhte shinggyim masha ni hte sak hkrung baw hpan yawng hta hkra machyi nna tsin yam hkrum sha nga ai re.Ndai lam ni hpe anhte nang ngai yawng myit sawn yu nna makawp maga tsi shamai la na aten grai lai wa nga sai.

Lamang tang madun ai – Julia Ndawng Ja Ing