Mungkan Ga Grau Kahtet Jat Yang Hpa Byin Wa Na

Daini mungkan ga gaw duhkra ladaw ni galai shai nna grau grau kahtet wa nga ai.Dai zawn kahtet ai gaw mungkan ga hta shanu nga ai sak hkrung baw hpan yawng a matu hkrit tsang hpa rai wa nga ai.Mungkan ga kahtet wa ai gaw carbon hkru dat nsa kayin ai masa hpe shabyin ya ai.Dai lam gaw matut manoi kayin nga ai hpe shabyin ya nna,kayin masa hpe grau laja lana shabyin ai majaw lu hka zawn re ai shinggyim masha ni a madung ra kadawn lam hpe hkra jahten ya nga ai.Kahtet ai lamu ga shara hkan e hkai nmai shapraw ai hte dat n’gun ni hpe hkra jahten ya nga ai.Mungkan ga e sak hkrung nga ai dusat du myeng amyu hpan nkau si htum nna amyu mat ai de du wa shangun nga ai.

Kahtet ai majaw panglai man hta grau tsaw ai bum ni kaw na hkyen ni ntsin byawng wa nna,hkrit tsang hpa methane(mitain)dat nsa law law pru ai de byin wa na rai nna hka kata e nga ai si mat sai dusat hkum tsawp nra ni ntsa de bai waw wa ai. Shingrai,dai hpu yat ai nra ni a majaw carbon nsa shapraw lam grau grau law htam wa na rai nga ai.Dai hta kaga,ndai mabyin lam ni hpe grau sawng shangun ai lam langai mi gaw duhkra ladaw hpe sharam reng lu ai mungkan kahtet daw na hpun kawa ni mat mat wa ai lam rai nga ai.Carbon dat nsa a majaw nbung n san n seng byin nna,n san mat ai lam law wa ai shaloi panglai nammukdara hka ni hta hkri dat (acid ) ni lwi byawng wa ai a majaw hka kata na hkrung nga ai dusat ni hte panglai sha hpa ni hta hkra wa ai re.

Ya byin ai lam ni zawn sha matut byin pru nga ding yang rai yang,ya na tsa ban n htum shi yang pyi grai ja ai duhkra ladaw galai shai lam ni hte moi nhkrum katut shi ai kaba la ai shingra grupyin masa htenza lam hte shinggyim masha ni yawng a matu hkrit tsang hpa lam ni htawm hpang e hkrum ra na sha rai nga ai.Mungkan masha jahpan a gambum mali a gambum langai mi gaw hkringau hte dai makau mayang e nga nga ai hta grau kaba ai mare ni gaw dai hkingau mayan e law malawng nga ai rai nna,panglai hka man loi mi rawt tsaw wa yang,dai masha ni a matu grai hkrit hpa hte sawng ai masa ni byin wa na ra ai.Ndai mang hkang lam ni gaw mungkan ga hta shanu nga pra nga ai anhte yawng hta hkra machyi hkrum ra na teng sha rai nga ai hte ya nan mung dai dam hpe hkam sha ra hpang taw sai rai nga ai.Dai majaw duhkra ladaw galai shai wa ai,laning hte laning grau grau kahtet jat wa ai lam hpe anhte sung sung li li jawm myit yu nna jawm makawp maga la na lam hpe galaw nan galaw sai.