Miwa Mahkaw Si Hte Hkamja Lam

Miwa mahkaw si a hkamja akyu hte seng nna kaja ai n kaja ai hpe sawk sagawn hkaja da lu ai made garan kachyan ya mayu ai.Ndai miwa mahkaw si gaw anhte a Jinghpaw mung hta grai law tu ai namsi mung rai nga ai.

Miwa mahkaw si gaw hkamja lam a matu madung ra kadawn ai lu sha dat ni rai nga ai vitamin D,vitamin E,protein shan dat,jum dwi dat,calcium dat,hpri dat,carbondydrate hte hka ntsin dat jahpring ya lu ai.Vitamin C,rawng ai majaw cancer byin lu masa hpe mung shayawm kau ya lu ai.Miwa mahkaw si sha ya ai gaw salum n-gun kaja shangun ai majaw salum ana byin ai hpe mung shayawm kau ya lu ai.Sai pa magyep ai ai ana hpe mung hkyamsa shangun lu ai hte hkum katsing si ana kaw na mung makawp maga ya lu ai.Sai gayin shamu shamawt kaja shangun ai,lusha rin kaja nna cancer ana hpe makawp maga ya lu ai sha n-ga sai shadang hpe hting hkang ya lu ai,hkam jan n gun hpe kaja shangun ai akyu ni miwa mahkaw si hta na lu la mai nga ai.

Miwa mahkaw si sha nna lu la mai na hkamja lam akyu ni gaw miwa mahkaw si hta mawm dat rawng ai majaw lu sha rin shamyit ai magam hta kaja nna kan kya shangun ai,pu hte seng ai lasa ni shamu shamawt kaja ai majaw kan chyat kan shing dang byin ai masha ni sha ya na kaja ai namsi rai nga ai.

Miwa mahkaw si hta vitamin C rawng ai majaw hkum hkrang hkam jan n gun kaja ai hta garum ya lu ai,sai hpraw di cell ni hpe jasu alun ya nna hkum hkrang hte hkam jan n gun hpe kaja dik hkrang  shachyaw ya lu ai.

Cancer ana hpe makawp maga ya lu ai – miwa mahkaw si hta polyphenolic dat rawng ai majaw sin cancer ,pu kaba cancer hte kaga cancer ana ni byin wa lu ai kaw na shayawm kau ya lu ai.Cancer cell chyambra jat ai hpe shing dang ya lu ai.Dai majaw cancer ana hpe makawp maga ai hku nna mung,cancer ana tsi tsi hkam la nga ai ten dat lu sha hku nna sha ya na kaja ai.

Maju lasa a matu kaja ai – miwa mahkaw si sha ya ai gaw maju lasa a matu kaja ai rai nna asak kaba wa ai ten maju lasa ni hten za hkra machyi lam byin ai kaw na makawp maga ya lu ai zawn asak kaba ai ten byin ai Alzheimer ana byin masa kaw na mung  shayawm kau ya lu ai.Dai majaw bawnu lasa hte seng nna mang hkang nga ai masha ni sha ya na kaja ai namsi mung rai nga ai.

Sai shadang hpe hting shara ya lu ai – potassium grai law rawng ai majaw hkum hkrang na ntsin dat hpe hting shara ya ai hte sodium ngu ai jum dat shadang hpe shayawm kau ya lu ai.Sai lam lasa ni hpe kaw raw ya lu ai majaw salum n-gun  kaja nna sai rawt ana lu ai masha ni sha ya na kaja ai.

Miwa mahkaw si hta phenolic drup pound rawng ai majaw hkam kaja lam hpe grai akyu jaw garum ya lu nga ai.Hkum hkrang hta sai gayin shamu shamawt lam hpe kaja shangun nna hkum nam nak shadang hpe shayawm ya lu ai,hpyi hkam kaja lam a matu mung saba lai jan a dam kaw na makawp maga ya lu ai.

Sai gayin ginlen kaja ai – magri dat hte hpri dat rawng ai majaw sai hkyeng di cell ni hpe kaja shangun nna hkum hkrang shara shagu de oxygen hte sai ni hpe kaja dik sa ginlen ya lu ai.Cell ni de mung oxygen du hkra atsawm sha sa ginlen ya lu ai.Ndai lam ni gaw miwa mahkaw si sha nna lu la mai ai hkamja lam akyu ni rai nga ai.

Tsawra ai shiga madat ni miwa mahkaw si gaw hkam kaja lam a matu kaja ai dat atsam ni law law rawng ai gaw teng nga ai.Rai tim masha shagu hte htuk ai namsi re ngu nna mung nlu tsun nga ai.Hpa majaw nga yang miwa mahkaw si gaw dwi ai dat law ai zawn kahtet dat law ai namsi mung rai nga ai.Dai majaw jit dwi ana lu ai masha ni,ma hkum rai taw ai kanu num ni hte ma kaji ni grai law nmai sha na lam matsun da nga ma ai.Miwa mahkaw si hpe grai law sha ai rai yang hkum kahtet machyi ai,yu hkraw machyi ai,ladi sai yun ai,baw sin ai,kraw galau,ga awn madawn re ai  lam ni byin chye ai hpe mung sadi jaw da nga ai.Dai majaw ma kaji ni hpe malu masha garai nsha shi ai ten miwa mahkaw si nsha shangun ai gaw kaja ai hte shadawn sharam nna jaw sha yang kaja ai lam garan kachyan ya dat lu ga ai.