Mati Kamu A Hkam Kaja Lam Akyu Ni

Tsawra hkungga ai shiga madat nu wa hpu nau ni daini na hkam kaja lam machye machyang madat hka ja la na aten lamang hta gaw ya ndai lanam ta aten hta grai tu ai mati kamu ni gaw hkam kaja lam hpe gara hku akyu byin shangun ai, akyu yawm shangun lu ai ngu ai lam ni hte seng nna sawk sagawn hka ja da lu ai made hpe garan kachyan ya mayu ai.

Mati kamu gaw grai shum ai majaw shan hta pyi grau mu ai lusha re ngu tsun tim n shut nga ai. Grau nna ndai aten gaw mati tu ai ten rai nga ai hte maren mati shat mai lu sha law dik ai ten mung rai nga ai. Dai majaw ndai aten hta mati kamu tam ai masha ni gaw hpun kaba tu ai shara hkan, gum hpu bum nga ai shara hkan hte kawa pawt nga ai shara ni hkan mati tam hkawm chye nga ma ai. Mati tu ai ten rai nga ai majaw mati nang, kamu nang nna tsi rung tsi gawk du ai masha ni mung grai nga ai. Mati kamu ni gaw sha mu ai lusha re nga tim sha shut chye ai, nang chye ai lusha mung rai nga ai. Mati kamu sha shut nna, nang nna asak si sum mat ra ai masha ni mung anhte a makau grupyin hta myi chyaw mu lu ai lam nga ai zawn shiga ni hta na mu lu, chye lu ai mung law law rai nga ai.

Rai yang ndai mati kamu gaw hkrit tsang ra ai baw lusha re ai kun nga yang mati kamu hpan hta hkan nna sha mai ai hpan mati, n mai sha ai hpan mati, kamu hpan ni nga ai hpe ginhka la chye na ra ahkyak ai ngu tsun mayu ai. Mati kamu sha ai gaw hkum hkrang hkam kaja lam akyu law law hpe mung jaw ya lu ai rai nga ai.

Kaning re ai hkam kaja lam akyu ni jaw ya lu ai kun ngu ai hpe hka ja yu ai shaloi ( 1 ) mati kamu shadu sha ai gaw sinda chyat, sahti ana byin ai lam hkyamsa mai tsai lu ai. ( 2 ) matsing nyan n kaja ai ma ni hpe mati kamu shadu jaw ai rai yang shanhte a bawnu maju lasa hkam kaja nna matsing nyan marai atsam rawt jat wa ai lam tsun da nga ai.( 3 ) sai n gun yawm ai hte hkum chying n gun yawm ai ana a matu mung mati kamu hpe tinang ra ai hku shadu sha, shan nga ni hte gayau shadu sha rai lawan ai hku n gun sharawt ya lu ai. (4 ) Mati kamu hpe tauba si shing nrai yang yi hte soup ntsin shadu lu ai rai yang mung hpyi,shan hkraw ai,  hpyi shan kahtet nga n pyaw ai hte lasi lamun re ai masha ni a matu hkyamsa mai tsai lu ai.

(5) Kamu matum hpan gaw baw machyi ana hpe shamai ya lu ai hte n gun rawng ai re majaw n gun yawm ai masha ni, aten galu machyi ai masha ni sha ya na kaja ai lam tsun da nga ai. Kamu hpan hta lawm nga ai makrat gaw nbung dang ai, hkum hkrang hta hkam jan lu na hkum chying n gun kaja wa hkra jasu alun ya lu ai dat rawng ai. Myi hte hkum hkrang kata na sap sanap ni bum machyi ai hpe shanem shamai kau ya lu ai. Sai gayin shamu shamawt ai hpe kaja shangun ai,mawng ana kumla rai nga ai shapawt gumdin ni n byin hkra makawp maga ya lu ai, cholesterol hte hkum hkrang a matu akyu n jaw ai sai ni hpe shayawm jahkrat kau ya lu ai hkam kaja lam akyu ni hpe jaw ya lu nga ai re.

Mati kamu gaw mi sha tsun sai hte maren grai sha mu la ai lusha mung rai nga ai majaw sha shut ai lam, nang ai lam byin chye ai raitim nawng lap hte gayau shadu sha yang hpa nra ai, nawng lap gaw gung dang lu ai ngu hkap la da nna masha law malawng gaw nawng lap hte gayau shadu sha nga ma ai. Sha mu ai lusha re nga tim mati n mai sha ai masha ni, koi gam ra ai masha ni mung nga nga ai. Mati n mai sha na masha ni gaw ma nnan shangai ngut ai ma kanu ni koi gam ya ra ai. Bai waw shawn, ladi pat, ladi gaya kahti rai byin taw ai masha ni, myi ana byin taw ai masha ni, baw makret kawa machyi taw ai masha ni, bum machyi ana lu ai masha ni, thu nye nar ngu ai u latsang ana lu ai masha ni, jit shadang ana lu ai masha ni,sai rawt ana lu ai masha ni hte jit dwi ana lu ai masha ni gaw mati hpe shadawn sharam rai sha ra ai, koi gam lu yang grau kaja nga ai.

Mati hte seng nna sadi la chye ra na bai langai mi gaw mati hte rau n mai sha ai lusha ni mung nga ai, dai lusha ni gaw  mati hte udi, mati hte langu si, brang tai shan hte mati, saga hka si hte mati, nga chyu hte mati ndai malu masha ni hpe mati hte rau n mai gapyawn sha ai hpe mung anhte chye tawn da ga. Lama mati kamu sha shut nna nang ai lam byin wa ai rai yang n gu kashin ntsin hpe jaw lu dat u. Aten loi na ai hpang she chye ai rai yang gaw nawng lap hpe htu abraw nna ntsin jaw lu dat u, shing nrai nawng lap hte nam htan hpe hka gawm masum hta na gawm mi sha ngam hkra shadu nna chyahkring hkring jaw lu u ndai lam ni gaw tsi rung tsi gawk tsan nna hkyak hkyak galaw lu na matu chye tawn da mai ai ahkyak ai lam ni rai nga ai. Mati kamu sha shut sai, nang sai ngu ai hpe chye ai hte rau mai byin ai daram lawan ladan rai nna tsi rung tsi gawk de woi sa na ahkyak nga ai.

Mati kamu nang ai ana kumla ni gaw kan grai makram machyi wa ai, kraw galau ga awn madawn wa ai, baw sin ai, kan mase ai, mayen law shabyu ai, jit shadang ai, hkum ali ahti nga ai, salat katsi pru ai hte tet malap mat ai machyi ana kumla ni madun wa ai re. Nang ai hpan kamu mati sha hkrup ai rai yang sha ngut ai hpang hkying hkum 6 kaw nna hkying hkum 24 laman nang ai machyi kumla ni hkam sha hpang wa ai.

Kamu mati nang ai majaw shat kan hte pu ni hta byin ai machyi mang hkang ni gaw nhtoi 2 ya kaw nna 4 ya na ai laman mai tsai hkyamsa wa lu ai raitim sin hta hten za hkra machyi hkrum ai majaw bat lahkawng na ai ten asak si sum ra ai du hkra hkrit tsang shara nga nga ai.

Dai majaw mati kamu ni gaw sha mu la ai lusha hpan raitim nang chye ai lusha mung rai nga ai majaw sha mai ai baw kamu mati re kun ngu ai hpe anhte ginhka chye na ra ahkyak la nga ai. Kamu mati nang ai lam n byin na matu sha mai ai hpan rai nrai atsawm nchye ai, mu mamu kamu mati hpe n shadu sha ga, nang ai hpan kamu mati ni hpe hka hte asan kashin kau ai hte sha shi hta na gung ni tsai mat lu ai nrai nga ai. Dai hte maren mati hpe nawng lap hte shadu sha yang hpa nra ai nga tim tinang atsawm n chye ai mati kamu ni hpe gaw n shadu sha chyam yu ga, mati kamu nang nna asak lawm mat chye ai hpe dum ga. Lanam ta aten gaw nam hkan, tinang dum nta makau grup yin hkan mati tu chye ai ten re majaw ma ni n chye nna baw shadu sha na hpe sadi ra ai. Dai majaw dum nta masha ni hte ma ni hpe mati kamu hpan n kau mi gaw nang wa chye ai baw re lam atsawm sha tsun dan da na ra ai. Kamu mati sha na rai yang kaja dik gaw tinang atsawm sha chye nna galoi mung sha taw ai kamu mati hpan ni hte masha hkai nna dut ai kamu mati ni gaw nang na lam tsang shara kaga mi n nga ai ngu tsun shadum garan kachyan ya mayu ai. Shiga madat ni yawng mati kamu sha nna machyi makaw n byin hkrum ai sha, hkum hkrang hkam kaja lam akyu hpe sha hkam la lu mu ga law.

Lamang tang madun ai - Julia Ja Ing