Masha Hta Rawng Ai Nhprang Wan

Masha Hta Rawng Ai Nhprang Wan

Mungkan labau na ,lai wa sai shaning law malaw hta,masha ni nhprang wan a akyu hpe nlu hkam la ai sha nga lai mat wa masai.Raitim lai mat wa sai latsa ning daram kaw nna,nhprang wan gaw masha aprat hta n nga nmai lam langai mi zawn,ahkyak kaba mat wa ai majaw dai nlang lu yang,anhte kaning rai nna nga lu na ga ai kun ngu ai kaw du hkra myitru hpa lam tai wa sai.

Nhprang wan gaw nhtoi,wan nkang,n-gun laksang hpe jaw ai.Ndai ni gaw nhprang wan kaw na pru ai akyu kaba masum rai re.Ndai wan nkang hte n-gun laksang hpe lam law law hku nna akyu jashawn la nga ai hpe,gara hku raitim tsun nma re.<

Nhprang wan gaw anhte a mare hpe wan jaw ai,anhte a hkarang wanleng hpe jahkawm ya ai hte anhte a si shat hpe jahkut ya ai.Dai wan gaw sumla hkrung madun lu shangun ai,mahkawn mangwi hpe bai mahkawn shapraw dat ya lu ai,ga shaga jak,nta lakang,laika dip jak,nta katsi kahtet jahtuk jak,ndai ni yawng nhprang wan n-gun hpe kam ra ai.Dai wan gaw anhte a malu masha n tsu n yat hkra,hka ge jak hta kyem mazing da ya nna bai jahkut jaw lu ai,nhprang wan hpe ndai zawn akyu jashawn ai lam tsun nma rai nga ai.

Masha hta mung nhprang wan zawn re ai n-gun atsam rawng nga ai.Dai gaw Wenyi n-gun atsam rai nna,nhtoi,nkang,atsam ni hpe jaw ya ai.Nhtoi gaw myit nhtoi re,Nkang gaw tsawra wan a nkang re.Atsam gaw tsun nma law la ai masha galaw ai amu ni hku nna dan leng ai.Ndai Wenyi hte seng ai n-gun atsam gaw ra sharawng ai myit masin hta maju jung nga ai.Dai n-gun atsam gaw ra sharawng ai myit masin kaw nna myit len sa wa nhtawm,masin salum hte masha a hkum na lamyi laman kaw du sa wa ai.Ra sharawng ai myit masin hkang dat ai hte dai n-gun atsam lwi wa ai.Hkang dat ai lam tsawra ra na matu rai yang,salum gaw lum mat wa ai.Magam bungli galaw na matu hkang dat ai rai yang masha a hkum hkrang na lasaw lasa lamyi laman ni shamu shamawt mat wa ai.

Masha langai mi a prat masa arawn alai gaw,shi a ra sharawng ai myit masin hpa baw hkang dat ai hte maren shi a wenyi n-gun atsam gara hku,gara maga lwi mat wa nna,kade lang hkang dat ai ngu ai hte grai seng ai.Shamu shamawt nga yang sha,nhprang wan gaw nhprang wan rai nga ai hte maren,masha a Wenyi atsam mung shamu shamawt nga yang sha,Wenyi atsam nga ai.