Masha Hpe Akyu Jaw Ya Lu Ai Duhkra Ladaw

Tsawra hkungga shiga madat Nu Wa hpunau ni ndai lamang hta gaw Mungkan ga hte grup-yin shingra tara hpe makawp maga ga,Laudato Si ngu ai Wa Sarabyin Francis a matsun laika hta na masha ni hpe akyu jaw ai duhkra ladaw a lam hpe bai jawm sumru yu ga ngu saw shaga dat mayu ai.

Duhkra ladaw gaw yawng hpe akyu jaw ai,yawng madu lu nna yawng a matu hpan da Madu yaw shada da ai lam rai nga ai.Mungkan ting a tsang madang hta duhkra ladaw gaw shinggyim masha sak hkrung nga lu na matu kri dung lam law law hte matut mahkai nga ai myit yak masa langai re.Hpungtang hpaji ninghkring ni law law myit hkrum nna ngang kang ai sawk sagawn tang shawn lam hte maren,ndai du hkra ladaw shinggrup masa hta kahtet ai dingbai dingna kaba hpe hkrum katut nga ai lam tsun dan nga ai.Lai wa sai shi ning ban laman hta duhkra ladaw kahtet wa ai hte maren nammukdara hka tsaw madang matut manoi re ai lam,du hkra ladaw hten ai rai nna nbung laru ru ai,hka kaba ai lam ni kapyawn byin nga ai.Ndai zawn duhkra ladaw ladu lai hten wa ai mabyin hpe hpaji ninghkring ni tsun ai,mai byin ai lam madang hte sha daw dan da nmai ga ai.Duhkra ladaw kahtet lam shabyin ya nga ai,masha ni a majaw grau shabyin ya ai lam madung ni hpe reng hkang na matu ra nga sai hte maren shinggyim wuhpung wuhpawng yawng gaw tinang a nga sat nga sa lam,rai shapraw ladat hte jai lang ladat ni hta galai shai lam ni galaw na ra nga ga ai.

Bai nna anhte shinggyim masha ni nlu reng hkang ai kaga lam ni naw nga ai hpe mung hkap la ra ga ai.Ga shadawn,nhprang wan bum kapaw ai,lamu ga hkyetding hte ginhtawng shinggrup lam galai shai ai lam,mungkan ga jan hpe shinggrup ai lam masa ni rai nga ai.Rai tim,hpungtang hpaji hte seng ai sawk chyam ai lam ni hta shinggyim masha ni galaw ai,jak rung ni hta law law shapraw ya nga ai asit nsam dat shamawng ai lam (carbon hkru ai dat nsa (wan hkut) Methane,nitrogen oxides hte kaga dat nsa ni) a majaw lai wa sai shaning shi ban ning hkan hta byin pru sai duhkra ladaw kahtet lam tang shawn sai re.Ndai dat wan hkut ni gaw nbung e mahkawng nga ai a majaw lamu ga kaw nna jan a nhtoi hpe bai nhtang shingnan ai kahtet wan hte shabra kau lam ndang galaw ai duhkra ladaw kahtet lam hpe grau sawng wa shangun ai kaga lam madung langai gaw mungkan ting hta dat n’gun hku jai lang nga ai sau/hkru rai ni a majaw re.Kaga lam langai mi gaw hkai sun magam a matu nam maling hpun ni kran ai,lungseng htu,ja htu rai ga hpe kaga lam a matu jai lang nga ai lam rai nga ai majaw ndai mungkan ga tsit lali tsawm htap nga lu na hte duhkra ladaw galai shai hten za wa nga ai hpe gawn hkang makawp maga la na gaw masha marai langai,mare buga langai,uhpung uhpawng langai,mungdan langai hte sha nmai byin nga ai.Mungkan ga hta shanu nga pra ai anhte nang ngai yawng tinggyeng a matu chyu nmyit ai sha mungkan ga makau grup-yin shingra tara hpe tsawra myit hte kawn zing makawp maga la na ra nga ga ai ngu kalang mi bai tsun shadum ya dat ai law.