Manoi Ru A Hkamja Lam Akyu

Anhte wunpawng myusha ni mung manoi ru hpe moi kaw nna shingra tsi mawan hku akyu jashawn jai lang chye ai ni nga ga ai zawn manoi ru gaw India mungdan a mungding tsi kaba langai mi mung rai nga ai. Manoi ru a hpun ting hpe yu yang shi a hpun mat gaw madung tsi tai ai adaw ashan rai nga ai hte manoi ru a hpung ting gaw tsi tai ai hkrai rai nga ai. Manoi ru hpe ahpa hpa rai galep la nna jan ja ai kaw lam jahkraw la ai raitim shi a tsi atsam yawm mat ai lam n nga ai re hpe chye lu ai.

Manoi ru hpe n si tsi nga nna mung shamying tawn da nga ma ai. Hpa majaw nga yang hkraw kyip mat sai manoi ru adaw hpe madi ai ga hta bai jun tawn da yang aloi sha bai tu wa lu nga ai. Manoi ru gaw hpun kaba ni hta shamyet shanat nna lawan dik ai hku alaw ahtam chyambra tu loi ai hpun hpan rai nga ai.

Lai wa sai 2020 ning the 2022 ning laman covid grai byin taw ai aten India mungdan the ministry of Ayush kaw nna ndai manoi ru gaw covid ana hpe tsep kawp dang ma-nga kau lu ai shingra tsi langai mi re nga nna madi shadaw tsun lai wa ai hpe mung chye lu ai. Manoi ru gaw aten grai lai mat sai, aten na na n mai hkraw ai, sawng ai ningma ni hpe mung shamai shatsai ya lu ai hta akyu jashawn jai lang mai nga ai.

Manoi ru hta lawm ai antipyretic dat atsam a majaw pu bum ana, sai hprau makhkalawng ana, hkali ana ndai ana nib yin ai majaw hkum grai kahtet sawng ai hpe lawan ai hku nna shamai shakawp ya lu nga ai. Manoi ru hta tsi kaja tai ai dat atsam hpan ( 13 ) nga ai. Manoi ru hpe jai lang ai a marang e mai tsai hkamja wa lu ai ana ahkya hpan ( 37 ) nga ai hpe mung chye lu ai.

Dai ana hpan ni gaw gout ana, jitdwi sai dwi ana, mang gang ana, dat n htuk ai a majaw byin ai ana, sai tsaw ana, num ni a pu jat hta shan gumdin byin ai ana, lami laman machyi ana, ban si tu ai ana, nam sa lam ana byin ai, sai cancer ana, sai lam kata sai ni gye gumdin kap ai ana, bawnu hta shan gumdin lapau byin ai ana, n shu lamut kamu ana, num ni num hkring sa yak ai ana, sumbraw ana, salat htaw lai ai ana, myi ana, num hkrang, la hkrang hta twi kahpaw machyi ai ana, mak sa ana, bum tum chyen machyi ai ana, sinbum ana, num hkring sa ai ten sai law ding lai ai ana, HIV/AIDS ana, hpyi hte seng ai ana ahkya hpan amyu myu hpe shamai shatsai ya lu ai sha n-ga lami laman hkri hkraw ni hta bum makret machyi ai ana, sade ana byin ai, sin cancer ana, ladi sai yun ai ana, machyi makret ai lam shanem ya lu ai, shat kan hpye bum ana hpe shamai ya lu ai, nsa sa lam hta byin ai ana ni hpe shamai shatsai ya lu ai, kan shingtai hpe jahkrat sat kau ya lu ai, TB ana, jit sa lam hta ana kanu shang ai, hpum dinglai ai ana ndai ana hpan ( 37 ) gaw manoi ru hpe akyu jashawn jai lang ai a marang e mai tsai hkamja la lu na ana ahkya hpan ni rai nga ai.

Manoi ru hta bum machyi ai hpe shamai ya lu ai grai ahkyak ai steroid dat ni lawm nga ai. Dai steroid dat ni gaw Hydroxyecdysone, Ecdysterone ndai steroid dat ni gaw manoi ru a hpun mat hta lawm ai shadang grau law ai rai nna bum ai hpe shayawm ya ai hte ana zinli ni n kap bra wa lu na matu tau nau makawp maga ya ai dat mung rai nga ai. Manoi ru gaw jit dwi sai dwi lu ai machyi masha ni a matu grai akyu jaw htap htuk ai shingra tsi mung rai nga ai.

Sai kata na dwi hpa dat hpe shayawm ya na matu hte jit dwi saidwi ana lu ai a majaw hkan matut byin wa chye ai jit dwi a majaw maju lasa ni hten za wa ai lam ai hpe tau nau makawp maga ya lu nga ai. Manoi ru hpe jai lang na nga yang hkan sa ra ai lam hte koi gam ra ai lam ni mung nga ai. N kau machyi makaw ana ahkya ni gaw ndai manoi ru hte n htap htuk ai ana ni mung nga nga ai. Ga shadawn sai n’gun yawm ai machyi masha hte sai hkrat ana lu ai machyi masha ni gaw manoi ru hpe jai lang hkrup yang n’gun kya ai, baw sin ai, myi n mu ai hte ndum shami asak kaw hkra wa chye nga ai.

Sadi la chye ra na bai langai mi gaw manoi ru hpe tsi hku sung lang na nga yang shata masum hta jan n mai lu ai hpe dum chye na ra ai. Shata masum lu ngut ai hpang aten galu jahkring tawn da nna bai matut lu ai gaw mang hkang kaba n nga ai. Manoi ru hpe machyi makaw lam ni tau nau makawp maga na matu hte mai tsai hkyamsa shayawm lu na matu matut jai lang mai ai ladat naw nga nga ai.

Dai gaw manoi ru hpe hpa lap galaw lu ai ladat rai nga ai. Ndai hpe mung manap shat garai n sha shi yang shat kan Kaman hta lu ya mai ai. Manoi ru hpe shadu jahkyet la lu ai ntsin hpe soi, ndum ni hta bang nhtawm hka ge sadek hta bang da nna aten na na sung lang mai nga ai. Dai ntsin hpe sumbram ana zawn re ai hpyi hta byin ai ana ni hta chya nna shamai shatsai la mai nga ai. Manoi ru gaw sai ntsin kata hta lwi lawm taw nga ai n kaja ai gung maza ni hpe jen jasan kau ya lu ai atsam nga ai re majaw gaw sai gaya nna byin ai ana ni hpe mung shamai shatsai ya lu nga ai. Ndai manoi ru hpe akyu jashawn jai lang ai a marang e lahta e tsun lai mat wa sai ana ahkya ni hpe tau nau makawp maga ai hte mai tsai hkyamsa shayawm kau ya lu ai akyu ni hkam la lu mai nga ai.

Dai rai nna tsawra ai shiga madat nu wa hpu nau ni anhte na la, chye la lu saga ai hte maren ana ahkya law law hpe shamai shatsai ya lu ai, shingra mungding tsi mawan kaja langai rai nga ai manoi ru hpe dum nta kun dinghku shagu hta hkai da na kaja ai. Manoi ru gaw mi sha tsun sai hte maren hpun kaba ni hta shamyet shanat nna grai tu loi ai, hkai loi ai hpun mung rai nga ai. Anhte na la, chye la lu saga ai hte maren shingra tsi hpun rai nga ai manoi ru hpe tinang hta byin hkrum sha ai ana ahkya hta hkan nna akyu jashawn jai lang chye let asak galu hkam kaja ai akyu ara hpe hkam la nga ga ngu garan kachyan ya dat lu ga ai.