Manam Tsing A Hkamja Lam Akyu

Tsawra hkungga ai shiga madat nu wa hpunau ni daini na hkamja lam machye machyang madat hka ja la na aten lamang hta gaw anhte a buga ginra shara law law hta tsing langai hku tu nga ai manam tsing hpe tsi mawan shatai akyu jashawn lang mai ai lam garan kachyan ya mayu ai.

Manam tsing hpun hpe gaw anhte yawng mu yu ai hte chye ai masha ni law na hpe kam ai. Sun wang hkan, lam makau hkan baw kau she yak na daram kahti galai rai shingra e tu ai tsing hpun rai nga ai. Tsing hpun re nga tim chye jai lang ai rai yang shingra tsi mawan kaja langai mung rai nga ai majaw Karai Kasang hpan da ya ai shingra tsi hkrung tsi nan langai hta lawm nga ai re. Masha nkau ni manam tsing hpe tsi mawan shatai jai lang chye ai ni nga ai. Nkau mi jahkru mai tsi hku jai lang ai, masha law malawng gaw ningma hpye machyi yang ningma mai tsi hku jai lang law ai hpe mu lu ai. Kaja wa mung ningma hpye machyi ai shara hta manam tsing hpe gayup nna ntsin shup bang ya jang a ningdaw mi rai mai tsai lawan nga ai.

Dai re majaw manam tsing hpun a hkamja lam akyu hte seng nna sawk sagawn hka ja lam ni galaw yu ai shaloi manam tsing gaw jahkru mai ai, bum machyi ai hpe jasip kau ya lu ai, bacteria ana kanu ni, shu lamut kamu ana kanu ni hpe gasat kau ya lu ai, lusha rin shamyit kaja ai, jit sa kaja ai,hpyi ana amyu myu hpe shamai ya lu ai,kan machyi kan mase ai hpe mai tsai hkyamsa shangun lu ai, shayi num ni hte seng ai ana mai tsai lu ai, hkum kahtet machyi kawp ai, manai kanu hkrat ai hte yup pyaw ai hkamja lam akyu ni jaw ya lu ai lam hpe mu hti hka ja la lu nga ai.

Jahkru machyi, jahkru n mai hkraw  ai rai yang manam tsing lap hpe di la nhtawm asan shawng kashin kau u,dai hpe  shat mai kyaw langai mi daram htu abraw shing nrai ta hte gayup nna ntsin shup lu yang mai tsai lu ai. Jum loi bang rai lani mi lahkawng lang daram lu ya u.

Ningma hpye ai shara hta mung manam tsing lap hpe asan rai hkra shawng kashin kau nna ntsin shup bang ya u, ningma loi sawng ai rai yang ntsin shup bang da ai tsi pa hpe ningma hta dagap da nna sumpan hte gayawp da yang ningma lawan ai hku mai tsai lu nga ai.

Manam tsing gaw jit sa hka hkaw kaja tsi mung rai nga ai hte jit sa lam hta ana kanu shang ai, jit sa shagu machyi ai rai yang mung manam tsing hpe jai lang nna tsi shamai la lu ai.

Mi lahta e tsun sai hte maren manam tsing lap gaw hpyi ana amyu myu a mtu shingra tsi mawan kaba langai rai nga ai. Ningma hpye machyi ana a matu sha nrai, shakrwi tu ai, hpyi hta hka majaw gumdin tu ai, hpyi hta ana kanu shang ai, maden ana byin ai, sumbram hte maru gaya ana ni hpe tsi shamai na matu mung tsi mawan kaja rai nga ai. Manam tsing gaw sai san tsi mung rai nga ai majaw sai n san ai majaw hpyi gaya ana byin ai hpe mung hkyamsa mai tsai shangun lu ai.

Kan machyi kan mase rai byin yang mung manam tsing hpe ntsin shup la nna lu ya jang mai tsai lu ai. Shat kan machyi ai hpe hkyamsa shangun lu ai zawn kan shabung nam pum pum, nbung machyi byin ai rai yang mung manam tsing hte tsi shamai la lu mai nga ai.

Hkum kahtet kawp ai -  katsi lawt nna machyi ai, hka li machyi ai, tukwi waw makret machyi ai ana ahkya ni byin ai shaloi hkum kahtet kawp lawan na matu manam tsing hpe jai lang mai nga ai. Kaji kajaw hkum kahtet machyi ai hte katsi lawt nna waw shawn jahkru ai mung manam tsing hpe jai lang nna mai tsai lu  ai.

Manai kanu jahkrat kau ya lu ai – manam tsing gaw kamyen sha ai shingtai kanu ni hpe mung gasat ya lu ai tsi lap rai nga ai. Lusha rin shamyit kaja nna shat lam hta na kamyen sha shingtai ana kanu ni hpe jahkrat kau ya lu ai hte kan sa man ai akyu ni jaw ya lu nga ai.

Anhte chye da ra na gaw tsi re majaw mai mayu ai nga nna grai law n mai sha na ga ai re, bai nna tinang hta galoi mung machyi taw ai ana lama ma nga ai rai yang mung sarawun hte shawng san jahkrum yu nna lu sha ai gaw kaja dik rai nga ai. Sha ai baw hpun nre nga tim tsi hku nna lu sha mai ai hpun re, shi a nam chyim gaw loi mi hka hka nga nna hpun ting tsi byin ai shingra tsi hpun rai nga ai. Tsi hpun hku lu sha mai ai re majaw katsing sha tim nang ai lam n nga ai.

Dai re majaw tsawra ai shiga madat nu wa hpu nau ni anhte a makau grupyin hta tsing hpan hku nna shingra e tu ai manam tsing hpun hpe tsing hpun re ngu ai hku chyu n yu ai sha, Karai Kasang hpan da ya ai shingra tsi mawan kaja langai hku mung akyu jashawn jai lang chye nna mai kaja ai akyu hpe hkam la ga ngu shiga madat yawng a matu akyu pru ai machye machyang langai rai na hpe myit mada let garan kachyan ya dat lu ga ai. Grau nna ya aten anhte Myanmar mungdan shara shagu ngu na daram hta majan byin taw ai, gasat gala lam ni a majaw shimlum ai shara de hprawng koi yen hkawm ra ai masha ni law law rai nga ai. Mungdan nsim sa ai re majaw masha shagu shimlum lam n lu ai, galoi aten kadai wa kaning re ai shara de hprawng shingbyi hkawm ra na hpe nchye tsun nga ga ai. Tsin yam hkrum masha ni hta madung ra kadawn ai gaw malu masha hte tsi mawan ni rai nga ai. Dai re majaw ya na zawn majan tsinyam lapran nga taw ra ai ten hta tsi rung tsi gawk sa na grau yak hkak wa ai, tsi mawan mari lu mari sha lu na yak hkak wa ai ten ndai  zawn re ai shingra tsi mawan kaja ni hpe chye tawn da ga ai rai yang tinang a makau grupyin na tsi hkrung tsi nan ni hpe madung akyu jashawn jai chye na grai hkyak na re ngu nna mung tsun shadum ya mayu ai. Shiga madat ni yawng shimlum ai, ngwi pyaw hkam kaja ai chyeju hpe hkam la lu mu ga law.

By Julia Ja Ing