Malu Masha Hte Tuk Kwi Mak Hkalawng Ana Hpe Makawp Maga La Ga

Ndai lanam ta aten hta grau byin law taw nga ai tuk kwi mak hkalawng ana kaw na makawp maga la lu na matu gaw hkam kaja nna hkum hkrang hkam jan lu ai n-gun nga na ra ahkyak nga ai.Hkum hkrang hkam jan n-gun nga na matu hpa galaw ra na ga ai kun? Shani shagu na tinang sha ai malu masha ni ahkyak nga ai zawn chye lata sha na mung ra nga ai.

Dai re majaw tuk kwi ana hpe makawp maga la lu mai ai malu masha ni hpe  hkaja la yu ga.Ndai malu masha ni a lam hpe tsun ga nga yang  masha langai hte langai hta nbung hkat ai sai uhpung ni nga ga ai.Ga shadawn masha nkau mi gaw A sai uhpung rai nna,nkau mi gaw B sai,nkau mi AB sai,nkau mi O sai nga nna nga ga ai re.Tinang hta nga ai sai uhpung hta hkan nna masha gaw hkam jan lu ai n-gun,ana ahkya ni hpe makawp maga lu ai n-gun ni mung nbung hkat nga ai.

Rai yang gara sai uhpung gaw kaning re ai malu masha ni hpe grau madung sha ya na htap htuk nga ai kun ngu ai hpe hkaja la yu ga.

O sai uhpung hpe madu da ai masha ni gaw hkum hkrang hkam jan n-gun kaja ai ni re nga tim tuk kwi ana hpe makawp maga lu na matu gaw sau dat law rawng ai nga,salau lap,chyinghkrang tsit zawn re ai tsit ai baw nam law nam lap ni,bai nna shaman,shakau hpraw,tsan lwi sau,hpa lap katsing  hte hpa hka ni lu sha ya na htap htuk nga ai.
B sai uhpung hpe madu da ai ni gaw kaga sai uhpung ni hta tuk kwi mak hkalawng ana grau byin law ai ni rai nga ai majaw hkum hkrang hkam jan n-gun rawng na matu tsit ai hkrang pan,ba hkri si,lwi hkri si zawn re ai nam law,nam lap nam si nam saw ni hte naw hkun shapre hta na pru ai malu masha ,tsan lwi sau,nga chyu chyahkri,shakau hpraw hte nam chyim hka ngun ni sha ya na htap htuk nga ai.

A sai uhpung hpe madu da ai masha ni gaw hkum hkrang hkam jan n-gun kaja na matu shakau hpraw,nam chyim hku ngun zawn re ai shakau shaban ni bai taw bat si,jang wawm si zawn re ai nam si nam saw ni hte nga hpe law law sha ya na grau htap htuk nga ai.
AB sai uhpung madu da ai masha ni hkam jan n gun kaja nna tuk kwi mak hkalawng ana hpe makawp maga la lu na matu nga chyu,nga chyu chyahkri,sagu,bai nam shan zawn re ai sau dat nau nrawng ai shan ni hte miwa hpa gyi,ang nam,shanam,nam chyim ni sha ya na htap htuk nga ai lam hpaji matsun da ya ma ai hpe shiga madat ni mung chye tawn da nna lu sha jai lang let hkam kaja ai akyu hpe hkam la lu mu ga ngu garan kachyan ya dat lu ga.

Bai nna ndai tuk kwi mak hkalawng ana hpe grai dang ai lu ai hta sang hpaw lap mung lawm nga ai re.Tuk kwi mak hkalawng ana byin hkrum taw ai masha ni hpe sang hpaw lap katsing pa lahkawng dang hpe ntsin shup la nna jum loi mi bang rai shat mai zun mi dang hpe lani mi lahkawng lang jaw lu ya u.Dai shaloi kahtet kawp mat nna tuk kwi ana lawan ai hku teng sha mai tsai lu na ra ai.Shadu kau ai,wan kakang kalip kau ai lam ni n mai galaw ai,dai zawn galaw kau jang tsi nsa yawm mat ai lam hpe chye lu ai.Sang hpaw lap shup ntsin gaw tsawmra mi hka ai nam chyim nga ai re majaw machyi masha lama nlu lu ai rai jang ladi pat nna lu shangun dat u.Shiga madat ni yawng ya aten grai byin hkrum sha taw nga ai tuk kwi mak hkalawng ana kaw na lawt lu mu ga law.

By - Julia Ja Ing