Makam Masham Hka Ja Lamang - MYIT YU HPA MEDIA NINGNAN

MYIT YU HPA MEDIA NINGNAN

Ga San 44: Kaja ai media hte n kaja ai media nga a ni?

Media gaw shi hkrai shi kaja nga ai, raitim, dai hpe n kaja ai hku mung jai lang ma ai; nkau gaw akyu ja ai, nkau ga akyu nau n jaw ai. Galoimung madu a yaw shada ai hte dai hpe gara hku jai lang ai hta hkan ai. Media hpe jai lang ai shaloi hpa n re ai shiga mung chye lu ai, hpa lachyum n pru ai sha majoi mi shapyaw ya ai, shi ga hpaji hpa mung n jat ai; dai hku rai jang masha hpe shi a tatut prat hpe koi ye kau shangun ai. Media madu ni gaw media hpa n nga ai myit htum na mungkan ndai kaw na masha ni hpe yen kau shangun ai. Du daw sai hkaw gasat gala hte nse nsa sumla ni hpe yu na matu masha ni internet yu chye ma ai. Gyin shalat ai ni mung media malawm ningnan hpe shapraw ai, ga shadawn, computer games hte gatlawk tam nna masha ni dai kaw shamyet shanat shangun ai mung shut ai lam langai re. Dai zawn re ai malawm ni a ntsa ramma ni shamyet shanat shangun ai mung shut ai lam langai re. Dai zawn re ai malawm ni a ntsa ramma ni shamyet shanat nna yubak n hkrum na matu Hkristan ni masha ni hpe lam madun garum ya ra ai.

2498 – 2499

Shiga (information) lu na ahkaw ahkang hpe matut mahkai na awmdawm tara kaw nna n jahka ya lu ai. Shawa hta nga ai prat gaw masha shada, wuhpung wuhpawng shada galoimung dingyang matut mahkai ai hte sha byin mai ai.  Pastoral Instruction C0munio et progressio 44

Kadai raitim, madu myit ra ai hku matut mahkai ai media hpe jai lang ai ni gaw.. shanhte a wenyi hpe jahten shaza shangun ai, shing n rai, grit nem ai kasi a majaw masha ni hpe hkrit tsang shara shatai ya ai, kaja ai hpe ninghkap nna n kaja ai lam n-gun jaw ai ni hpe koi kau ra ai. Dai zawn re ai ni a majaw akyu hkam sha ai ni gaw media hpe amyat tam ai ni a matu sha rai mat ai. Vatican Council II, Decree Inter mirifica (IM) 9

Shiga hpe manai ai (Disinformation) ngu ai gaw teng ai lam daw mi (half-truth) sha tsun ai, tinang hte manu ai daw hpe sha tsun ai, ngam ai daw hpe n tsun ai. Dai majaw TV hpe mada ai ni, radio hpe madat ai ni gaw hkum tsup ai ningmu dawdan lam kaw n du lu ai, hpa majaw nga jang, ra ai lam ni hpe shanhte n lu la ai majaw re, dai hpe media kaw na n jaw ai. Chyeju hte ndai zawn re ai shuthpyit mara ni hpe koi kau u. POPE FRANCIS to journalists, March 23, 2014

Google gaw medium n re; google gaw hpaga lam yan re. FRANK A. MEYER (b. 1944), Swiss publicist

TV kaw matut manoi ndau shana ai gaw, sumla hkrang hta manit shagu shang wa ai rai jang, shi a yaw shada ai de n du mat ai. LORIOT (Vicco Von Bulow, 1923-2011), German humorist

Ga San 45: Media hpe tingkyeng a matu n gawn n sawn jai lang ai kaw na gara hku makawp maga na i?

Media hpe tingkyeng a matu n gawn n sawn jai lang ai hpe teng sha ninghkap ra ai. Gatlawk gaw awmdawm ra ai, raitim, kyang lailen yaw shada ai lam i nga ra ai. Shang lam (access) jaw ai ni, galaw lajang ya ai (service) ni hte shara (platform) jaw ai ni gaw shawa yawng a kaja na hte shinggyim masha bawngring rawt jat na matu arawn alai masat da ra ai. Shinggyim masha a ngang (human sexuality) hpe jahpyak ya ai, grau nna ma kaji ni a nse nsa lam hpe garan madun ai gaw lit la ai ni ladu lai tingkyeng a matu n gawn n sawn di ai lam re. Internet hpe mying makoi ai hku jashuk ya ai (cyber-mobbing) hpe mung n hkap la lu ai. Google, Facebook compani zawn re ai ni (mung up asuya) pyi data hpe hkrup mara n gawn n sawn jai lang chye ai majaw, madu hte seng ai lam yawng hpe online hta n mai tsun hpaw dan ai hte grai hku hkau ai lam hte seng jang smartphone hte sumla (felfile) n gayat na matu mung ahkyak ai.

235,249 – 459

Katsi katsang re ai ga ni gaw masha hpe katsi ge shangun ai, kahtet ai ga gaw shanhte hpe jahkat kau ai, hka ai ga gaw shanhte hpe hka shangun ai, pawt ai ga gaw shanhte hpe shapawt ai. Si mani ai ga gaw masha a wenyi hta shanhte a sumla shapraw ai. Madat ai ni hpe si mani nna shazim nhtawm shalan shabran ya ai. BLAISE PASCAL (1623-1662) French mathematician and philosopher

Matut mahkai ai ladat hpe jai lang lu ai gaw majoi mi pratdep na matu n re. Kabu Gara Shiga a manu dan dik ai ni hpe yawng a myit salum de du na matu re. BENEDICT XVI, Message for the 47th World Communications Day, 2013

Ga San 46: Nawku Hpung gaw Jak hpaji rawt jat ai lam yawng hte rau hkan hkawm ra na?

Hpungtang hpaji hte jak hpaji gaw Karai Kasang jaw da ai hpan da ai arai ni re. Raitim, rawt jat ai rai shagu gaw jahtum n re, ningnan re ngu nna kaja ai ngu n tsun lu ai. Rawt jat ai lam shagu gaw masha hpe daw jau ai kun, yawng a matu kaja ai kun, shing n rai, shinggyim masha a sari sadang hpe n sawn kau ai kun? Hpa majaw nga yang shamyet shanat ai ngu ai lam hpe, jep sagawn chyam yu ra ai.

457,458 – 2493,2294

Anhte a makau na digital mungkan a mung masha tai na matu hkum hkrit et.  POPE FRANCIS, January 23, 2014

 

Add new comment

9 + 5 =