Mahkawn Hkawn Ai Gaw Hkamja Lam Akyu Law Law Hpe Jaw Ya Lu Ai

Mahkawn n hkawn yu ai masha ngu na gaw n nga daram rai na ga ai.Mahkawn hkawn ai gaw myit shalan shabran ai hpe hkam sha lu ai majaw myit ngwi simsa lam hpe lu la ai,puba lam hpe jahkoi ya lu ai,manaw manang hku hkau lam a matu mung kaja ai lam langai rai nga ai hte hkum hkrang hkamja lam akyu law law hpe jaw ya lu nga ai re.

Gara hku nna hkamja lam akyu shabyin ya lu ai kun nga yang mahkawn hkawn ai shaloi myit atsang awang,asan awan nga hkam sha ai, myitru shoihpa myit hkri lit li lam ni hpe hkyamsa shangun lu ai.Mahkawn hkawn dat ai shaloi hkum hkrang hta myit hkam sha lam kaja nna oxytocin hormone ni pru wa ai.Dai hormone ni pru wa ai gaw mi sha tsun ai myit a hkam sha lam rai nga ai myitru tsam pu,myit hkyi lit li lam ni hpe shayawm kau ya lu nna myit asan awan nga nna simsa ai hpe hkam sha shangun lu ai.Dai zawn myit asan awan nga hkam sha ai majaw sai n gun tsaw ai hpe jahkrat ya lu ai zawn sai shadang hpe reng hkang shara ya ai majaw sai rawt ana lu ai masha ni mahkawn hkawn myit lawm ai gaw kaja ai lam langai rai nga ai.

Myiman lasa shan ni hpe hkamja shangun ai – masha law malaw hkum hkrang shamu shamawt lam hpe galaw ma ai rai tim myiman lasa shan a matu gaw nau n galaw byin ai ni law nga ai.Ndai mahkawn hkawn ai gaw myiman lasa shan ni  hkamja na matu galaw ya ai shamu shamawt lam langai rai nga ai zawn mahkawn hkawn ai gaw nsen hpe nem tsaw shara nna mahkawn magang sinwawp hkamja lam a matu galaw ya ai tai magang rai nna sinwawp hkamja lu na matu mung kaja dik garum ya lu nga ai .

Matsing nyan kaja ai – mahkawn hkawn sana nga yang mahkawn ga si ni hpe shawng matsin na ra nga ai.Dai zawn mahkawn ga si ni matsing da ai gaw bawnu a matsing lu ai atsam grau kaja shangun ai shamu shamawt lam rai nga ai majaw mahkawn hkawn ai gaw bawnu matsing nyan kaja na matu mung garum ya lu nga ai.

Masin ga un ai hte myit yawn,myit npyaw hpa lam ni hpe shanem kau ya lu ai – masha gaw kalang lang magam bungli hta mang hkang nga ai,shing nrai dum nta hta shing nrai manaw manang ni hte mang hkang byin ai,myitru hpa lam ni kalang nrai,kalang gaw nga chyalu sha rai nga ai.Dai zawn re ai ten ni hta mahkawn hkawn ai hte myit shalan kau dat ai rai yang masin ga un ai lam,myit npyaw,myit ru lam ni loi mi sha pyi yawm hkoi mat na gaw teng sha rai nga ai.Mahkawn hkawn ai majaw endophins ngu ai dat pru wa nna dai dat gaw nang hpe myit pyaw ai hkam sha lam hpe shabyin ya lu ai.Dai majaw myitru ai ten,masin pawt mayu ai ten,magam bungli a majaw myit hkyiba hkrum ai ten ni hta mahkawn hpe marawn hkawn kau dat u hkyamsa mat na ra ai.

Shingrai tsawra ai shiga madat nu wa hpunau ni ndai mahkawn hkawn ai ngu ai gaw masha hpe shangwi shapyaw ya lu ai,myit pyaw lam jaw ya lu ai sha n-ga hkum hkrang hkam ja lam akyu law law hpe mung jaw ya lu nga ai.Masha shagu ngu na daram gaw mahkawn hkawn chye ai hkrai rai nga ga ai.Mahkawn hkawn ai a akyu law la ai hpe mung chye la lu saga ai re majaw  grau nna ya na zawn rai Covid-19 ana zinli a majaw dum nta kaw sha law nga ra ai,yak hkak jamjau lam amyu myu a majaw myitru,myit tsang ai lam ni mung nga na ga ai re,pyaw nna mi rai rai,myitru nna mi rai rai,manaw manang ni hte hkrum nna mi rai rai kaga myitru myit npyaw hpa lam ni hpe myit taw nga na malai mahkawn hkawn nna hkum hkrang hkamja lam hte mai kaja ai lam akyu law law hpe hkam la nga ga law.

 

Lamang  tang madun ai - Julia Ja Ing 

Add new comment

7 + 4 =