Mahkaw Nam A Hkam Kaja Lam Akyu

Tsawra hkungga ai shiga madat nu wa hpu nau ni daini na hkam kaja lam machye machyang madat hka ja la na aten lamang hta gaw mahkaw nam lap sha nna lu mai na hkam kaja lam akyu hte seng nna mu hti hka ja da lu ai hpe garan kachyan ya mayu ai.

Mahkaw nam lap hpe shan, nga shat mai hta sha nrai, majap si htu hte kaga tinang shadu lu, shadu sha ai lusha hpan ni hta hkan nna shani shagu ngu na daram bang shalawm lu sha jai lang taw nga ga ai re. Rai yang ndai mahkaw nam gaw shat mai shadu ai shaloi shakau shaban hku sha akyu jaw ai re kun, hkam kaja lam a matu hpa akyu ni nga ai kun ngu ai hpe hka ja yu ai shaloi mahkaw nam sha ai gaw hkam kaja lam akyu mung grai nga ai hpe chye lu ai. Dai re majaw mahkaw nam lap gaw shat mai lu sha ni hta bang sha yang lusha ni hpe grau mu mai ai nam chyim jaw ya lu ai namji nam ya langai re ai zawn hkam kaja lam a matu mung grai akyu jaw garum ya lu nga ai.

Mahkaw nam sha nna lu mai na hkam kaja lam akyu ni hpe tsun ga nga yang bum machyi ai hpe hkyamsa mai tsai shangun lu ai, lusha rin shamyit kaja ai, sai kata na gung maza ni hpe la jasan kau ya lu ai, hkum makret waw shawn machyi ai hpe hkyamsa shangun lu ai, waw shawn ladi pat ai lam hkyamsa lu ai, nyang ntuk rawng ai hkrung kanu ni kawa hkrum yang n tuk shaw tsi hku nna jai lang mai ai,kan machyi kan mase byin ai lam mai tsai hkyamsa lu ai. Sai san ai akyu jaw lu ai. Hpyi hkam kaja ai akyu hpe jaw lu ai. Jitdwi ana hkyamsa ai, shat kan machyi ana hkyamsa ai  kyu ni jaw ya lu nga ai.

Lusha rin nmyit ai mang hkang, kraw galau ga-awn ai, kan hten kan machyi rai byin ai ten ni hta mung mahkaw nam lap shing nrai ginlap hpe tsi mawan hku jai lang mai ai. Mahkaw nam lap sha ai gaw shat kan machyi ai hte shat kan bum ana ni nbyin hkra  makawp maga ya lu ai .

Bai nna mahkaw nam gaw bum machyi ai lam n byin hkra makawp maga ya lu ai sha n-ga, wan hkru ningma ni hpe mung lawan ai hku mai tsai shangun lu ai.Hpyi hkam kaja hkra garum ya lu ai re majaw ban si tu ai kaw na makawp maga ya lu ai hte maru gaya ai, sumbra gaya hpye machyi ai lam ni n byin ai akyu ni hpe jaw ya lu ai lusha kaja shakau shaban lap langai rai nga ai ngu garan kachyan ya dat lu ga ai.

By - Julia Ja Ing