Machyang Si A Hkamja Lam Akyu

Machyang si hta e potassium dat,vitamin A dat,hpri dat,manganese dat,zinc dat, phosphorus ni hte hkum hkrang hpe akyu jaw ai nhprang dat ni law law rawng nga ai.

Machyang si a hkamja lam akyu hpe tsun ga nga yang machyang si hta rawng ai drup pound ni gaw myit hpe asan awan nga hkam sha shangun ai sama hte rau myit san seng nga pyaw shangun ai.

Lusha rin kaja shangun ai – machyang si gaw lusha rin kaja shangun ai majaw kan shabung nbung ju machyi ai,kan machyi ai hte kraw kan kata na lusha chyayet ni hpe jasan jaseng kau ya lu ai.

Nhprang dat grai law rawng ai – mi sha tsun sai hte maren machyang si hta e hkum hkrang hkamja na matu garum madi shadaw ya ai potassium,copper,manganese,phosphorus,zinc hte selenium dat ni grai law rawng nga ai.Bai sai rawt ana nbyin na matu makawp maga ya lu ai rai nna sai cell ni shabyin ya lu ai zawn hkum hkrang kata na oxygen shadang hpe sharawt ya lu ai hpri dat mung grai law hkra rawng ai.

Wa machyi ai hpe hkyamsa shangun ai – machyang si hpe wa machyi hkyamsa na matu mung jai lang mai nga ai.Wa machyi mai na matu machyang si hpe hka hpun lum hta minutes 10-15 dang tsing tawn nna dai ntsin hte n gup krang garu ya ai shaloi wa machyi ai hpe a ningdaw mi rai hkyamsa shangun lu ai.

Lusha sha mayu ai myit byin shangun ai – lusha sha mayu ai myit ngu ai hta lusha nkam sha ai masha ni,n gup nmu taw ai masha ni shat mai hta na machyang si sama a majaw n gup mu,sha pyaw byin shangun lu nga ai.

Sai rawt ai hpe hkyamsa shangun lu ai – machyang si hta potassium grai law rawng ai majaw sai shadang hpe reng hkang shara ya lu ai.Sai rawt hkyamsa shangun lu ai zawn salum hkamja na matu kaja dik garum ya lu nga ai.Machyang si gaw salum sai lam lasa chyum gyip ai,a kajawng sha salum galawp hkring mat ai,hkum katsing si ai ndai ana ni byin lu shadang hpe mung shayawm kau ya lu nga ai.

Myi n gun hpe kaja shangun ai –machyang si hta beta-carotene rawng ai majaw myi n gun kaja na matu kaja dik garum ya lu nga ai.Myi sap sanap hpe hkam kaja shangun lu ai zawn myi mu n gun hpe kaja shangun ai,myi hte seng ai ana amyu myu kaw na makawp maga ya lu ai.

Nra hkamja ai – machyang si hta phosphorus,manganese,copper hte hpri dat ni rawng ai majaw nra hpe n gun byin hkamja shangun lu ai.Nra hpa ai,nra bawm,nra tsam ai lam ni nbyin hkra kaja dik makawp maga ya lu ai atsam machyang si hta rawng nga ai.

Ndai machyang si hpe anhte jinghpaw shat mai shadu sha ai shaloi mung nlawm nmai ngu na daram bang sha lang ga ai zawn hpunau Kayar myusha ni mung grai jai lang lu sha law ma ai re.

Bai  ya ten mying kaba taw ai Malar shan kaw mung sha dat yang hpawm hpawm nga nna jap hpawm ai machyang si nam chyim hpe madung tawn nna masha ra sha law ai lusha langai rai nga ai.Dai zawn lu sha shat mai ni hta bang sha ai shaloi n gup mu shangun ai,nam chyim kaja,sama kaja jaw ya lu ai machyang si gaw hkum hkrang hkamja lam akyu law law hpe mung jaw ya lu ai lam daini anhte chye la lu saga ai majaw machyang si hpe grau nna akyu pru ai hku manu shadan  jai lang lu sha ai hte hkum hkrang hkamja lam akyu hpe mung hkam la nga ga law.

Lamang tang madun ai - Julia Ja Ing

Source from Internet