Lamyin Kaw Na Madun Taw Ai Na A Hkamja Lam Masa

Tsawra hkungga ai shiga madat nu wa hpu nau ni daini na hkam kaja lam machye machyang madat hka ja la lu na aten hta gaw anhte shinggyim masha ni a hkum hkrang hta machyi makaw ana ahkya hte la kap nna lamyin hta madun wa chye ai kumla ni hte seng nna tsun ginlen garan kachyan ya mayu ai.Hkam kaja taw nga ai anhte a lamyin ni mung hkum hkrang hta machyi makaw ana ahkya byin wa ai ten hta dai machyi makaw ana ahkya hta la kap nna lamyin hta hkrang hte n sam ni galai shai wa ai lam hpe madun wa chye ai re. Ndai kumla ni hpe jau chye tawn da nna anhte a hkum hkrang hkam kaja lam hpe tau nau gawn lajang lu ai hte sadi sahka lu na matu yaw shada let garan kachyan ya mayu ai rai nga ai.

Lamyin hta madun chye ai kumla ni amyu hpan ( 12 ) hpe daini hka ja la lu na ga ai. ( 1 ) Htoi ai lamyin nsam – ndai lamyin hpe htoi shangun ai shi a mabyin ni gaw lamyin su grai su ja ai ni, malut grai lu ai masha ni, lamyin hta fugus ngu ai kamu kap ai ana a majaw mung htoi nsam madun wa chye ai. Jit dwi sai dwi ana lu ai a majaw mung lamyin ni htoi nsam byin wa chye ai sha n-ga thyroid gland hta mang hkang  lama ma byin nna mung nsa sa lam hta ana lama ma byin ai a majaw anhte a lamyin hta htoi ai nsam hpe mu mada wa chye lu ai re.

2) Hkraw ai, kapran ai hte hkrawp nna kahta ai lamyin –  lamyin hta hkraw ai, kapran ai, je loi ai lamyin gaw lamyin su tsi chya nna lamyin su tsi  bai hpyet shaprai  tsi hpe jahkring hkring jai lang ai masha ni, lata laraw n lang ai sha, aten galu shing nrai jahkring hkring ban wawn kashin, rai hkrut ja ai ni, hypothyroidism ngu ai thyroid hormone bungli galaw ai nau lanyan ai ana hte seng nna mung, ndai zawn rai lamyin hkraw ai, kapran ai, kahta ai kumla madun chye ai re majaw gaw ahpa atang n shalai kau ai sha, tsi du hte madun na ra ai. Ndai zawn lamyin hkraw kapran kahta ai hpe hkyamsa shangun lu na matu gaw Hyaluronic acid hte Glycerin lotion hpe lata mari nna chya ya jang lamyin ni hkraw, kapran, kahta daw ai lam hpe hkyamsa shangun lu na rai nga ai.

3) Lamyin a gup tu ai  ( Clubbing Nails ) lamyin tu ai htumpa de hkyeng wa, bum wa nna, lamyin ni gup gup rai nna byin ai kumla hpe mu mada lu na rai nga ai. Ndai zawn re ai lamyin gup nna byin ai kumla gaw hkritung kaw na lawm wa ai salum ana, sinwawp ana, sinwawp mawng cancer ana, pu bum ai ana, ndai zawn rai nna hkrit tsang ra ai ana ahkya langai ngai hte matut manoi taw nga ai re. Dai re majaw gaw ndai zawn re ai lamyin gup ai ana kumla hpe mu mada ai rai jang n hpang hkrat ai sha tsi du hte madun nna tsi tsi hkam la ga ngu tsun shadum ya mayu ai.

4) White Spots ( Leukonychia ) ngu ai lamyin hta ahpraw teng pang, nsam ni hpe mu mada lu ai. Ndai zawn rai lamyin hta ahpraw teng pang nsam ni kap ai kumla gaw asak kaba sai gumgai dingla ni law malawng hta byin chye ai rai nna grai hkrit tsang ra ai mang hkang n nga ai rai tim mung, kalang marang gaw tsang ra ai salum mang hkang, shing nrai protein dat yawm ai a majaw ndai zawn rai lamyin hta ahpraw teng pang nsam ni hpe mu mada lu ai re.

5) Lamyin hta nda ban re mahkret hpe mu lu ai – ndai zawn rai lamyin ntsa hta nda ban rai nna ahpraw mahkret gaw sinwawp ana hte kaga tsang ra ai machyi makaw ana lama ma hte lakap nna madun ai kumla mung byin chye nga ai.

6) Beau’s line ngu ai mahkret hpe mu lu ai, ndai gaw jit dwi sai dwi ana mai tsi hpe man man lu sha ai majaw ana hpe n lu hkang zing la mat ai machyi masha ni hte Psoriasis ngu ai hpyi hta byin ai ana a majaw lakap nna ndai zawn re ai mahkret hpe mu mada lu chye nga ai. Shing nrai yang gaw grai sawng ai zinc dat yawm ai mang hkang hte sai gayin hkawm sa lam n jaw ai mang hkang ni hte la kap nna mung madun chye nga ai re.

7) Ding dung yawn re ai mahkret – ndai zawn lamyin hta ding dung yawn re ai mahkret kumla gaw asak kaba sai gumgai dingla ni kaw law malawng byin chye nna, grai hkrit tsang nra ai, kalang lang chyawm gaw magnesium dat ra ningra nna shing nrai vitamin B12 ra ningra nna hte kaga lusha n’gun dat ni ra ningra ai a majaw madun chye ai kumla ni rai nga ai.

8) Kyaw zawn rai lagyawk ai lamyin ( Spoon Nails ) – lamyin a ga ang hta kyaw zawn rai nna lagyawk wa ai ndai kumla gaw iron-deficiency anemia ngu ai hpri dat yawm nna sai hkyeng di n’gun ni yawm wa ai, shing nrai salum ana ni hte lakap nna madun chye ai kumla ni rai nga ai majaw ahpa atang rai aten n shalai kau ai sha, ndai kumla hpe mu mada yang tsi du hte lawan bawng ban jahkrup la ga.

9) ( Pitting Nails ) Lamyin hta lagyawk kaji ateng apang kap ai - Ndai zawn rai lamyin hta lagyawk kaji teng pang rai nna kap ai gaw kara grai raw chye ai masha ni hta madun byin chye ai kumla rai nna, Reter’s syndrome ngu ai ana hte lakap nna byin chye nga ai re.

10) Dark discoloration on nails ( Malenoma ) Lamyin adep la ai zawn rai nna lamyin chyang ai nsam - Ndai zawn re ai lamyin hta achyang nsam byin wa nna, nsam ni gaw gau ngwi gau ngwi grau kaba jat wa ai, machyi ai lam hpe hkam sha ai ndai kumla ni madun ai rai yang tsi du hte a lawan sha madun kau nna tsi tsi hkam la ra ai. Hpa majaw nga yang ndai zawn rai lamyin hta achyang nsam ni bra kaba jat wa nna machyi ai gaw hkum hkrang shara ra hta kap ai prat kaw nna mawng cancer de gale mat wa ai shan hpyi mawng ana kumla re majaw gaw aten n shalai kau ai sha, tsi du hte lawan jahkrup bawng ban tsi tsi hkam la na ra ai.

11) Terry’s nails ngu ai lamyin ndung a matu de hkyeng ai nsam hpe mu lu nna htumpa de gaw ahpraw re ai nsam hpe mu mada lu na re ai. Ndai gaw sin hpe jam jau jaw ai C ana kanu rawng ai majaw sin hten za ai ana shing nrai jit dwi sai dwi sawng mat ai ana a majaw lamyin hta ndai zawn rai ndung de hkyeng mang nna npu de hpraw ai kumla hpe mu mada lu ai re ai.

12) Dark streak on nails lamyin a ntsa hta chyang ai mahkret hpe mu mada lu ai – ndai zawn lamyin a ntsa hta achyang mahkret hpe mu mada lu ai kumla gaw sai hkraw ai mang hkang hta la kap nna byin chye ai zawn law malawng gaw ntsang ra ai, African mungdan masha ni gaw mara shan chyang ai majaw lamyin kaw du hkra chyang ai nsam loi loi kap chye ai, dai gaw normal sha rai nga ai. Dai re majaw ndai lamyin a kumla ni hpe chye la nna hkum hkrang hkam kaja lam hpe tau nau sadi sahka gawn lajang la lu mu ga ngu yaw shada let garan kachyan ya dat lu ga ai.