Kashun Hta Na Lu La Mai Ai Hkamja Lam Akyu Ni

Ndai lamang hta gaw anhte a buga ginra ni hta grai law tu ai kashun a hkamja lam akyu hte seng nna garan kachyan ya mayu ai.

Kashun ngu tsun dat ai hte anhte Wunpawng myusha ni yawng chye ga ai re.Sha mung sha yu ai ni hkrai rai nga ga ai.Kashun hpe tinang ra ai ladat amyu myu hku nna lu sha,shat mai shadu sha mai ai hta grau nna anhte Wunpawng myusha ni gaw Nga hte shadu sha chye nga ga ai.Dai zawn lu sha shat mai kaja langai rai nga ai kashun gaw sha mu ai sha nrai,hkamja lam hpe mung grai akyu jaw ya lu ai hpe anhte chye nga ga ai kun?

Kashun hta e hkum hkrang hpe akyu jaw ya lu ai, lu sha n-gun dat ni grai law rawng ai re.Dai lu sha dat ni gaw kashun (100 g) hta lani mi a matu ra kadawn ai vitamin A ( 120%)  rawng ai.Dai vitamin A gaw atsam rawng ai shingra Oxidant dat myu mi rai nna  hpyi hte sap sanap ni hpe kang tsawm shangun lu ai.Myi mu n-gun a matu mung n nga nmai ahkyak ai hta lawm nna sinwawp hte n-gup cancer ana nbyin hkra makawp maga ya lu ai atsam nga ai.Bai nna kashun hpun hta e shingra Polyphenol Flavonoid drug pond mung rawng ai.

Cancer hpe ning hkap kau ya lu ai – kashun hta e vitamin C grai law hkra rawng ai rai nna kashun (100g ) hta lani mi a matu ra kadawn ai vitamin C a tsa shadang (44%)  rawng ai.Vitamin C gaw hka hta tun shang ai anti-oxidant myu mi rai nna Carotenoid hte pawng hpawm nhtawm n kaja ai free radical ni hpe hkap manga kau ya nna cancer ana,bum machyi ai ana,virus ana kanu a majaw byin ai jahkru ai hte waw shang machyi ai ana ni hpe makawp maga ya lu ai atsam nga ai.

Sai byip n-gun hte salum gumlawt shadang hpe mung hting hkang ya lu ai – Kashun hta potassium,hpri dat,magnes hte magri dat zawn re ai nhprang dat ni the shum ai jum dat atsawm sha rawng ai.Kashun (100g) hta lani mi ra kadawn ai potassium tsa shadang (7%) rawng ai,Potassium gaw salum n-gun jaw ai jum dat amyu mi rai nna sai kata sodium jum dat shayawm jahkrat kau ya nna salum gum lawt shadang hte sai byip n-gun hpe shayawm kau ya lu ai.Bai nna kashun hta e vitamin B uhpung hta na rai nga ai Niacin,Riboflavin hte Thiamine ni ram daw shadang rawng ai shingra lu sha kaja si mai lap rai nga ai.

Dai re majaw tsawra ai shiga madat Nu Wa Hpunau ni Karai hpan da ya ai shingra simaw si mai lap ni law law nga ai hta ndai kashun mung lawm nga ai.Anhte a Wunpawng buga ginra ni hta grai law tu ai rai nna,bum ga,nam mare kahtawng hkan nga ai ni gaw kashun hpe mari sha nra,a katsing kalang re ai kashun makru ni tam di sha mai ai shaman chyeju hpe lu da nga ga ai re. Grau nna ndai lanam ta aten hta kashun makru hpe ntaw ntsang di sha lu mai nga ga ai.Dai hpe manu shadan nna shat mai kaja hku nna mung,hkum hkrang hkamja lam a matu mung akyu pru ai hku akyu jashawn jai lang lu sha let myit masin hkum hkrang ngwi pyaw hkam kaja ,asak galu ai akyu hpe hkam la nga ga law.