Karai Kasang Gaw Mungkan Ga Hpe Tsawm Htap Dik Ai Hku Mawn Sumli Da Ya Sai

Tsawra hkungga ai shiga madat Nu Wa Hpunau ni ndai lamang hta gaw anhte shinggyim masha ni shanu shingbyi nga ai shara,mungkan ga hpe Hpan Madu Karai Kasang gaw grai tsawm htap hpring tsup dik ai hku hpan tawn da ya sai hpe anhte ni hpa majaw jahten sharun ntsawm nhtap di kau nga ga ai kun ngu ai lam hpe Wa Sarabyin Francis a matsun laika rai nga ai Nang Madu Kaw Hpung Shingkang Shakawn Kungdawn Anga Nga U ga Law ( Laudato Si ) hpe mahta nna anhte yawng myit yu ga,sawn yu ga ngu saw shaga dat mayu ai.

Karai Kasang gaw mungkan ga hpe ra nrawng hkra tsawm htap kaja dik ai hku  mawn sumli,hpan lajang da ya sai.Dai mungkan ga hta asak hkrung nga pra nga ai anhte shinggyim masha ni hte asak hkrung mahkrung yawng a matu mung shi shara hte shi mai kaja htap htuk dik ai lam hpe lajang da ya nga ai.Anhte shinggyim masha ni a matu lu hpa,sha hpa hpan da ya ai,tam lu tam sha na shara lajang da ya ai,tsi hkrung tsi nan ni lajang da ya ai,du hkra ladaw,hpun kawa nam maling ni hpe grai htuk manu tsawm htap dik ai hku lajang da ya ai.

Dai hte maren du sat du myeng ni,ntsa malen u,namji nam joi ni a matu mung hkring sa shara,hpun shingnip,hpun lakung lakying ni nga ai,shanhte sha na matu namsi nam saw ni hkum sumhpa nga ai.Hka kata na nga ashu ashan ni mung dai hte maren shanhte hte htap htuk dik ai nga shara malu masha ni hpe Karai Kasang gaw grai tsawm htap mai kaja dik ai hku ra nrawng hkra jahtuk lajang da ya nga ai.

Dai ni yawng gaw shi shingra maka hte shi nga taw ai hpe mu yang kadai mung myit ngwi myit pyaw simsa ai hpe hkam sha lu nga ga ai re.Dai hpe wa kadai ni jahten sharun taw nga ai kun,hpa majaw ningma hkang shakap ya taw nga ai rai kun,anhte yawng myit yu ga.Dai hpe jahten sharun ai gaw Karai Kasang hpan da ai amyu yawng hta na grau tsaw dik ai,bawnu machye machyang nga dik ai anhte shinggyim masha ni nan rai nga ga ai.

Hpa majaw ngu ai hpe yu dat yang tinggyeng akyu hpe madung tawn,marin law hpa ai myit ni a majaw re ngu ai hpe mu mada lu ai.Dai tinggyeng myit,tinggyeng akyu tam ai lam a nhtang byin pru wa na akyu gaw makau grupyin lamu ga a shingra maka ni hten za hkrum nna mungkan ga hta asak hkrung nga pra ai anhte ni nan jam jau hkrum ra na lam sha rai nga ai.Anhte shinggyim masha ni gaw anhte hkum nan dai mungkan ga a ntsa myit ra ai hku roi rip dang sha mai ai,lamu ga madu nga myit sawn nna kanawn mazum nga ga ai.Dai myit masa gaw lamu ga sau hpe jahten ai,nbung,lu hka hte asak hkrung dusat amyu hkum sumhpa ni hpe jahten shaza,ana ahkya byin pru shangun nga ai.

Dai lam ni a majaw mungkan ga gaw grai li ai lit hpe gun hpai nga ra ai,jahten sharun hkrum nga ai hte mungkan ga gaw kabai kau hkrum dik,roi rip hkrum nga ai matsan mayan ni a ka-ang e du taw nga ai hte yawn madai hkrap nga sai.

Anhte shinggyim masha ni gaw tinang hkum nan ga yun hte hpan da hkrum ai rai nna,anhte a hkum hkrang gaw ga kaw na pru ai dat hte galaw shachyaw da let,ga kaw na nbung marawp sak hkung nga ai ni rai nga ga ai hte ga kata na hka hte kashin jasan,shabran la lu nga ai hpe malap mali rai nga ga ai,dai hpe daini anhte myit dum sawn lu nna jut shara mi kaw na sha pyi mungkan ga hpe bai tsi shamai ai,shatsawm jahtap mawn sumli ai magam hta shang lawm nga ga law.

Tang madun ya ai – Julia Ndawng Ja Ing

Mahta ai laika – Laudato Si