Kala Hpagyi Ban A Hkamja Lam Akyu NI

Kala hpagyi,sam hpagyi nga nna mi tsun shamying lang ai raitim amyu baw sang shagu jai lang lu sha ai hpagyi ban rai nga ai.

Ndai kala hpagyi ban gaw anhte a Myanmar mungdan hta buga shara shagu hkan tu ai rai nna shat mai lu sha shagu ngu na daram hta bang sha lang ai majaw masha shagu mung lu sha yu ai hkrai rai nga ga ai.Kala hpagyi ban hpe anhte Myanmar mungdan masha ni chyu sha,sha ai gaw nrai nga ai,kaga Vietnam,Thai,Korea,India hte Mexico,dingda America mungdan nkau hkan na masha ni mung sha ma ai lam mu lu nga ai.

Kala hpagyi hpe shat mai lu sha ni hta manam pyaw shakau shaban hku nna madung bang sha lang ga ai rai tim shi hta e hkum hkrang hkamja lam hpe mung akyu jaw ya lu ai atsam nga ai.Dai majaw ndai kala hpagyi ban gaw tsi mawan tai ai lu sha kaja langai hta lawm nga ai re.

Kala hpagyi ban gaw kaning re ai ana ahkya ni a matu kaja a ta nga yang sinda chyat ai,kan makram machyi ai,na machyi ai,sai rawt ana ni a matu kaja ai,bai lu sha rin kaja ai,lapu,shing nrai tuk rawng ai hkrung kanu lama ma kawa hkrum ai,hkum kahtet machyi ai hte hka li machyi ana ni a matu mung kaja ai lam tsun da nga ai.

Anhte law malawng gaw kala hpagyi lap hpe sha madung jai lang lu sha ga ai rai tim,kala hpagyi a ru pawt hta mung lu sha n gun dat grai law rawng ai lam chye lu ai.Kala hpagyi hta rawng ai lu sha n gun dat ni gaw riboflavin,carotene dat,vitamin A,vitamin C,vitamin B1,vitamin B2, ni rawng ai,bai protein dat hte carbonhydrate ni mung rawng ai majaw shan,nga nsha ai masha ni sha ya na kaja ai lu sha mung rai nga ai.Lu sha atsawm nkam sha ai masha ni hpe mung lu sha sha mayu ai myit byin shangun lu nga ai.

Kala hpagyi ban hta hkum hkrang a matu n nga nmai re ai lu sha n gun dat ni grai law rawng ai re majaw hkum hkrang hta ra kadawn ai n gun dat ni hpe jahpring shatsup ya lu ai.Tuk kwi zawn re ai ana ahkya ni byin yang hkyamsa shangun lu ai.Sai rawt ana lu ai ni a matu kaja ai.Sinda chyat sahti  ana hpe hkyamsa shangun lu ai.Bum machyi ai hpe shamai ya lu ai,bum nna ga-ut makret machyi ai,lami laman hkri hkraw ni machyi ai hpe hkyamsa shangun lu ai.

Na makret machyi ai,kan makram machyi ai,baw machyi rai byin ai shaloi kala hpagyi hpe hka hpunlum hte hpa hka zawn tsing lu yang hkyamsa mai tsai shangun lu nga ai.Bai jitdwi ana hpe hkyamsa shangun lu ai,kan chyat kan shingdang ai hpe hkyamsa shangun lu ai,hkum kahtet kawp shangun ai,kraw galau madawn ai,kan hten kan machyi ai,waw shang ai ndai zawn re ai machyi ana ahkya ni a matu kala hpagyi gaw tsi mawan hku nna garum ya lu ai lu sha kaja rai nga ai.

Shingrai tsawra ai shiga madat nu wa hpunau ni anhte galoi mung sha nga ga ai kala hpagyi ban gaw hkamja lam a matu mung hkrak ai lu sha kaja tsi mawan  langai rai nga ai.Dai majaw shi a kaja ai akyu hpe chye la lu saga ai rai nna grau grau akyu rawng ai hku manu shadan lu sha jai lang chye nga ga.Machyi makaw byin hkrum ai ten kala hpagyi ban di sha nna tawt hprut nan mai tsai lu ai lam n nga ai rai tim pyi lu sha shat mai ni hta galoi mung bang sha shalawm taw nga ga ai majaw hkum hkrang hkam kaja lam a matu akyu jaw madi shadaw garum ya na gaw teng sha rai nga ai majaw kala hpagyi ban hpe lu sha jai lang nna hkum hkrang hkam kaja ai akyu hpe hkam la nga ga.Hkum hkrang hkam kaja ai rai yang she myit masin mung hkam kaja na,hkum hkrang,myit masin lahkawng yan hkam kaja ai rai yang she myit mang galaw sa ai magam lam shagu hta mung awng dang lu na rai nga ga ai.

Lamang tang madun ai - Julia Ja Ing