Ji Grawng Gat Tsi Hte Hkamja Lam

Ndai ji grawng tsi lahkawng nat shachyi shamawng ai gaw masha a hkamja lam hpe mung hkra machyi shangun lu ai majaw nau nmai lang ai nga nna gaw tsun nga ga ai re.Rai tim masha law law wa ji grawng hprawng na matu,ji grawng n kawa na matu nga nna ji grawng tsi lahkawng hpe nat shamawng nna ji grawng gawn ai hpe ladat kaja langai hku galaw nga ga ai.Dai zawn ji grawng tsi lahkawng hpe nat shamawng lang ai gaw kalang marang,jahkring jahkra a matu sha myit yang bungli byin ai zawn rai tim aten galu a matu rai yang masha a hkum hkrang hkamja lam hta hkra machyi shangun wa lu nga ai.Grau nna hkum hkrang naw hkalung ai ma ni a matu tsang ya ra nga ai.

Hpa majaw nga yang ji grawng nat tsi hta rawng ai datu rai ni gaw ji grawng ni hpe jam jau jaw dingbai dingna byin shangun lu ai zawn masha hpe mung hkra machyi shangun lu nga ai.Grau nna sinda chyat ana lu ai masha ni hta grau tsang ra ai zawn nsa sa lam hte seng ai ana ni hpe byin shangun lu chye nga ai.Ji grawng tsi lahkawng shachyi shamawng ai wan hkut hpe marawp ai aten na wa jang nsa sa chyat ai,jahkru ai,sinda chyat ai,baw sin ai,baw machyi ai hte hkum zeng n nga ai lam ni byin chye nga ai.Ji grawng tsi lahkawng langai mi a wan hkut hpe marawp hkrup ai gaw hka yawm mayawn (100 ) daram marawp lu ai hte bung ai nga nna mung tsun nga ma ai.Dai majaw anhte sadi sahka la chye ra na gaw dum nta masha ni nga ai makau hkan n shachyi  ai rai yang grau nna kaja nga ai.

Bai nna ji grawng tsi lahkawng shachyi na rai yang chyinghka chyip ai gawk kata hta n shachyi ai sha nbung pru pru shang shang kaja ai shara hta shachyi da ai rai yang loi hkyamsa na rai nga ai.Kaja dik gaw dum nta masha ni nga ai shara hte loi tsan ai hku, ji grawng shang wa mai ai shara hta sha shachyi da yang kaja ai.Gawk kata de shachyi ra ai rai yang mung ji grawng tsi lahkawng hpe shawng shachyi da nna,ji grawng mung hprawng,ji grawng tsi mung hkoi ai hpang she bai shang wa rai machye machyang hte makawp maga la na ra nga ai.

Dai majaw tsawra ai shiga madat nu wa hpunau ni ji grawng n kawa hkrum na matu makawp maga la ai,ji grawng gawn ai ladat hta ji grawng tsi lahkawng shachyi shamawng ai ladat langai hte sha nre sha,makau grupyin san seng lam hte ji grawng n nga hkra galaw mai ai kaga ladat lam ni hte makawp maga la lu hkra mung ladat shaw shakut ra na ga ai.Dai rai yang she dum nta masha ni hta ji grawng tsi lahkawng nat shamawng ai majaw byin wa lu mai ai  ana ahkya ni kaw na tau nau makawp maga la lu na ,shalawt la lu na rai nga ga ai.