Jang Nyang A Hkam Kaja Lam Akyu

Lanam ta aten hta grau lu sha na loi ai jang nyang makru hpe shat mai lu sha hku jai lang lusha law ga ai raitim jang nyang hta na kaning re ai hkam kaja lam akyu ni jaw ya lu ai hpe gaw n chye ai masha ni she grau law nga ga ai re.  Jang nyang gaw malu masha shat mai kaja langai re ai zawn hkam kaja lam a matu mung tsi gawm langai rai nga ai.

Jang nyang hta nsa sa lam hte sinwawp hpe jasan jaseng ya lu ai atsam rawng ai.Dai majaw jang nyang sha ai gaw nsa sa lam hte seng ai ana ahkya byin wa lu ai kaw na shadawn shadang langai du hkra makawp maga ya lu ai.

Jang nyang makru sha nrai, jang nyang si hte pawt mung tsi mawan byin ai rai nga ai. Nsa sa lam hte seng ai ana ahkya ni rai nga ai jahkru ai, yu hkraw machyi ai, mahkak chyat ai, nsen shang ai machyi ana ni byin ai rai yang jang nyang pawt hpe htu nna lwi hkri si hte jum loi mi bang rai kalang lu hpa lap kyaw mi daram dang lu ya mai ai. Bai nna  kraw galau ai, n bung aju makram machyi ai, kan manai machyi ai, kan mase ai hte hka li ana ni mung mai tsai lu ai.

Ma ni jahkru ai, waw hkyek byin ai hte ga awn madawn byin ai rai yang mung jang yang htu la ai ntsin hte shakau hpraw htu shup la ai ntsin hpe gayau nna kalang lu hpa lap kyaw mi, lani mi hta lahkawng lang rai jaw lu yang hkyamsa mai tsai lu ai.

Jit hti ana byin ai rai yang jang nyang pawt hpe shadu nna jumdwi hte gayau lu yang lawan ai hku mai tsai lu ai.

Myiman hta ban si tu ai hte u hpyi kap nna myitru taw ai ni jang nyang si hpe sanap hka hte gayau nna lani mi masum lang garang chya ya ai rai yang ban si tu ai, u hpyi kap ai hte chyit marut byin ai hpe shamai ya lu nga ai.

Tsawra ai shiga madat nu wa hpu nau ni mung jang nyang makru shat mai hpe sha yu ai hkrai rai na hpe kam ai. Jang nyang shat mai gaw n gup n mu nna lusha sha n kam ai ni a matu lusha sha mu shangun ai si mai langai rai nga ai. N gup n mu ai majaw hpa mung n kam lu n kam sha rai byin taw ai ten hta jang nyang pawt hpe jum hte garang nna shinglet pawt du arut chya ya jang lusha sha mu wa ai nga nna mung tsun da nga ma ai.

Jang nyang makru hpe shat mai shadu sha ai shaloi ntsa lam na ja ai kawp ni hpe lam hte lam rai gawng kau nna kata maga na kya ai hpe la ga ai. Ntsa lam na kawp ni gaw ja ai majaw bang shadu shalawm tim sha nmai ai, sha mung nmu ai sha n-ga shat mai hta na dwi ai nam chyim dat hpe mung chyup kau ya ai majaw shat mai nam chyim hpe sit mat shangun nga ai re.

Jang nyang hpe tinang ra ai ladat amyu myu hte shadu sha chye nga ai hta masha nkau mi gaw jang nyang hpe shadu kaprawng kau nna panau ntsin hte ahtawk sha ai,n kau mi jum majap, shakau, naw hkun shapre  tum ni kyaw kangau bang rai gayau sha ai. Nkau mi rai jang ra ai daram daw la nna kai lang hte loi adep kau rai, katsu jahkraw shing nrai katsu panau loi bang nna lamu marang katsi ai ten hta shat mai ntsin shadu lu ma ai. Dai shat mai ntsin hta shakau hpraw hte git mawng loi bang nna a kahtet rai shadu lu yang sha mu ai hte hkam kaja lam a matu mung grai hkrak ai rai nga ai. Jang nyang hpe nhtu hte ga nna shan nga ni hte shadu sha tim mu la nga ai. Jang nyang pawt hpe mung makru zawn nhtu hte galep la nna shan, nga, katsu ni hte shadu sha mai ai, shing nrai jang nyang pawt hpe shawng shadu kaprawng kau nna makru hpe zawn ashin la, shing nrai ahpa hpa rai galep la nna shan, nga, katsu ni hte shadu sha yang grai mu ai lusha kaja, tsi mawan lusha langai rai nga ai.

Dai majaw tsawra ai shiga madat nu wa hpu nau ni jang nyang gaw ndai lanam ta aten hta grau byin law chye ai waw machyi jahkru ai, ladi pat re ai hte hkum kahtet machyi ai ana ahkya ni a matu hte nsa sa lam hte seng ai ana ahkya ni byin ai kaw na hkyamsa shangun lu ai hte dai ana ahkya ni n byin hkrum hkra maga mi hku nna makawp maga ya ai mung rai nga ai.Dai majaw galoi mung sha taw ai jang nyang hpe tinang ra ai ladat hte shat mai lu sha hku mi rai rai, ra ang ai hta hkan nna tsi mawan hku mi rai rai a kyu jashawn lu sha jai lang let hkum hkrang hkam kaja ai akyu hpe hkam la nga ga law.

By - Julia Ja Ing