Jak Layit (Fan)Jai Lang Ai Gaw Nbung Katsi Hpe Jaw Ya Lu Ai Raitim Hkamja Lam Hkra Machyi Shangun Lu Ai

Jak Layit Gaw Hkamja Lam Hpe Hkra Machyi Shangun Lu

Ndai nbung katsi shapraw ya lu ai jak layit lang ai majaw hkmaja lam hpe kade daram hkra machyi shangun wa na ngu ai gaw jai lang  ai  masha hta mung hkan na re ngu mu mada lu ai.Hpa majaw nga yang masha nkau mi nbung lu jang rai sai,kahtet hkoi jang rai nga nna  jak layit hpe manang shatai,tinang a makau kaw nan shani tup,shana tup kawut shakri da nna lang ai ni nga ai.Dai zawn galaw ai rai yang lani mi nrai lani mi hta hkamja lam hkra machyi wa na gaw teng sha rai na ra ai.

Hkamja lam hte nhtap htuk ai hpe chye nga ga tim jan grai kahtet ai aten hta gaw air-con nbung katsi jak lu lang na matu mung anhte a mungdan sut masa lam hta hakn nna nmai byin ai masha she grau naw law nga ga ai.

Rai yang gaw hkam kaja lam hpe gara hku hkra machyi shangun lu ai lam hpe chye tawn da nna sadi sahka rai sung lang chye na ra nga ga ai.

Jak layit nbung kawut jak ai a majaw hkamja lam hkra machyi shangun lu ai lam hta masha langai hte langai a asak aprat hta hkan nna byin hkrum ra ai lam nbung hkat nga ai.Masha nkau mi ladi pat ai madang sha hkam sha ra ai,nkau mi gaw lata lasa gying ai,nra hte lasa shan ni katsut makret machyi ai lam byin wa ai,nkau mi gaw shingma tsu ka ut machyi ai,nkau mi gaw baw machyi ai,nkau mi hta sinwawp katsi lawt nna waw shang ai,masha law malawng hta byin chye ai gaw lagaw lata hte hkum ali ahti nga byin ai,ndai zawn rai byin ai ana kumla nbung ai hta na masha nkau mi hta e ana lahkawng masum kalang ta byin hkrum ra chye ai mung nga nga ai.

Grau hkrit tsang ra ai gaw hkum katsing si ana du hkra pyi byin chye nga ai re.Grau nna  tsa chyaru grai lu da ai masha ni jak layit hpaw  da nna yup ai rai yang a kajawng sha hkum katsing si ana byin wa na hpe grai sadi ra nga ai.

 Jak layit a majaw hkrit tsang ra ai lam bai langai mi gaw ma kaji ni si mat ai lam law ai -  ndai lam hte seng nna hkamja lam gawn hkang dap uhpung langai mi a sawk jep sagawn da lu ai hta ma ni yup ai gawk kata jak layit hpaw da nna yup shangun ai majaw ma ni tsa shadang  70% hkamja lam hkra machyi hkrum ai hte si hkrum ra ai lam byin shangun ai nga nna tang madun da ai hpe mu lu nga ai.

Rai yang anhte hpa baw lam ni hpe sadi ra na ga ai kun?Shana maga jan du ai hpang baw hkum hkrut u,grau nna ndai lam hpe shayi num ni sadi ra nga ga ai.Shana maga baw hkrut da nna atsawm n jahkraw kau ai sha jak layit hpaw da nna yup mat ai rai yang asak (30) ning nhpring shi ai num kasha ni rai yang n-gup n hkyeng,shabyi n yawt ai lam ni byin wa chye ai. Bai nna jak layit hpe galoi mung sung lang taw ai rai tim dai jak layit hpe san seng lam galoi shagu galaw ya taw ai masha gaw n nga ai daram rai nga ai.Jak layit hta kap taw ai nhpu maza mala ni gaw jak layit hpaw dat ai shaloi yup taw ai masha a baw kum hta ladi hku hte matut da ai baw kata na nbung lam ni hpe pat kau ya ai.Dai majaw jak layit hpe galoi shagu  katsut kau nna san seng lam galaw ya nga na ra nga ai.Ndai jak layit hpaw nna yup na rai yang mung shana tup hpaw yup ai hku nre sha,nnan yup hpang wa ai daw hkying hkum  2/3 sha kyi na hku timer aten masat tawn da u.Jak layit nkau ni hta dai zawn aten masat da mai ai timer lawm ai re.Timer lama nlawm ai jak layit rai jang,jak layit kaw na nbung tinang a hkum de a ding tawk nhkra na hku lang ra ai.Ga shadawn jak layit kaw na nbung hpe shakum de shawng wa gayet shangun nna bai ginhtang wa ai nbung hte katsi hkam ai daram madang rai jang ram la sai.Grau ahkyak ai gaw baw daw maga rai nga ai. Tsa lu da nna yup ai rai yang mung jak layit kaw na nbung a ding tawk nan nmai hkra na hpe grai sadi sahka la ra nga ai.Dai gaw asak hpe nyan e sin ai nga ai hte maren machye machyang hte rau tinang a asak hpe makawp maga la ai lam rai nga ai. Akyu rawng na hku htuk shapraw da ai arung rai re majaw akyu pru ai hku gaw anhte jai lang chye na ra nga ga ai law.