Interview With Fr. Stephen Labang Naw Tawng ( MSP ) 24 March 2023

Hkrum Shaga Lamang  ( Padang Mare, Mogok )

- 21 March 2023 ya jahpawt (9:00) am ten Mogok Jau Ginwang Padang Mare na San Peter hte San Paul Nawku Jawng hta San Paul Jau wuhpung na Wa Jau Stephen Labang Naw Tawng hpe nawku hpung masha ni hte mare buga masha ni kabu gara hkap tau la sai rai nga ai.

- Chyeju dum Missa Hkungga hpe Wa Jau Ningnan hkum nan woi awn let Wa Jau ni marai(6), Mama ni marai(13), Brother ni marai (6), Nawku hpung masha ni marai (600) Jan ram shang lawm let chyeju shakawn akyu chyeju hkamla lu sai.

- Wa Jau Stephen Labang Naw Tawng gaw Mogok Jau Ginwang, Awng Padang mare kaw daidaw wa nna, lai wa sai ndai March 18, 2023 ya shani Jau tai Sakramentu hpe hkamla lu sai hte shi ang ai lit magam gaw Saradaw kaba Cardinal Charles Bo a Amu madu hku nna garum na matu shatsam hkrum sai rai nga ai.

- Wa Jau gaw Asak (10) ning aten hta Kanu yan kawa si shakram kau sai majaw shi a kanau yan hte matsan shayan rai nga kaba wa ai lam chye lu ai. Kanau yan hpe bau ra ai majaw asak kaji tim bungli shaja galaw Mogok bum de nlung tam, mashani kaw nchyang galaw let kan bau shakut wa sai lam chyelu ai.

- Mayak lam amyu myu a majaw tsang(4)awng nna jawng hkring mat ra sai. Daizawn jawng hkring nga ai ten daiten na Ginwang up Wa Jau Athar-hpa woi la nna jawng bai matut lung lu sai majaw, ya daini san seng san pra ai Jau langai byin tai wa sai rai nga ai.

- Nuwa hpunau ni, mau hpa chyeju re ai hte anhte yawng a matu kasi la hpa nan rai nga ai.

- Anhte hpung masha ni yawng Wa Jau Nnan a matu akyu hpyi garum ya let Ramma ni yawng mung Wa Jau hpe kasi la nna, Karai a magam gun ni byin tai hkra shakut ga ngu, n gun jaw dat ga ai.

By; Sr. Rose Angeline Maran Nang Doi, SFX

RVA-Kachin