Hpan Kaga Ga (Hpaji NIngli )

Ndai mungkan ga na Num the La shagu gaw tinang a hkum hte seng ai laklai ai arawn alai lu ai.Hpawng shingra mai kaja na matu,dai hpan shagu gaw laklai ai amu galaw ya ra ai.Ga shadawn,pyaw chye ai masha hpan nga ai.Ndai masha hpan gaw grai kang ai lam (tension) hpe shayawm dat lu ai atsam rawng ai rai nna,shi shang wa ai hpawng shingra shagu hta pyaw shangun ai.

Bai, myit masin alum ala re ai hpan nga ai.Ndai hpan gaw masha hpe chye madat matsan dum ai hte masha kaga hkam sha ai machyi makaw ai lam ni hpe hkyamsa kau ya lu ai.

Zet tsang ai masha hpan nga ai.Ndai masha hpan gaw yawng mayawng hpe shamu shamawt shangun ai.Dai gaw shanhte galaw ai amu hte raitim awng sharawng let masha kaga ni hpe aw law ai hte raitim shamu shamawt shangun ai.

Atsin sha makoi magap ai masha hpan nga ai.Ndai hpan hte rau kanawn ai shaloi,hkring sa lu ai hte ba mai ai.

Hpa hpe mung ahkyak ahkya la nna sadi sahka sumru yu ai masha hpan nga ai.Prat masa yak nna mau hpa lam byin pru wa ai shaloi,hpaji hpyi na matu masha ni ndai masha hpan kaw sa lu ai.

Anhte hkum shagu,tinang arawn alai hpan langai mi lu ga ai.Dai hpe galaw sharawt la yang sha,anhte a prat awng dang na ra ai.Masha yawng ndai lam hta n awng dang ai gaw yawn hpa rai nga aiMasha nkau mi gaw shanhte lu ai kaja ai atsam ni hpe manu shayawm kau nhtawm,kaga masha hpe manawn chye ma ai.

Law malaw,ndai masha ni gaw kaga masha ni a arawn alai hpe hkan lang na shakut ma a i.Dai masha ni a lailen mahtang,shanhte hte grai hpyi hpun masu ma ai rai nna,shanhte a kaja ai atsam ni makoi magap lup mat ai hte atsawm sha n galaw sharawt la lu ai.

Masha gaw awng dang mayu yang dai hpyi hpun masu ai hpe raw kabai kau na ra ai.Shaloi tinang hkum hpe teng ai hte maren wawm la lu na ra ai.Tsin ai masha gaw lali tsawm ai alai the atsin sha,kaja ai amu aja awa galaw nga ra ai.Shangwi shapyaw chye ai wa gaw pyaw hpa lam hpe shachyam shabra na matu,n gun atsam dat ra ai.Hpaji shakut ai masha gaw shi hkaja ai lam hte mungkan ting hpe garum na matu shakut ra ai.

Masha hkum shagu tinang a hkum hpe ding lik masam nhtawm,shi lu ai mai kaja lam ni hpe mu tam ra ai hte dai lam ni hkrak rawt kaba wa hkra,tinang a a sak hpe nawng kau let galaw shakut ra ai.

Ka lajang ai – Wajau Paul Lasang La