Hpagyi Ru ,Pawt Mung Hkamja Lam A Matu Akyu Rawng Ai

Hpagyi sha ai shaloi law malawng gaw lap hte ginlang hpe sha,sha nna ru, pawt hpe gaw maza ai,ga grai kap ai nga nna kabai kau chye nga ga ai.

Kaja wa nga yang hpagyi ru,pawt gaw atsawm kashin kau nna shat mai shadu ai hta htu  bang sha ai rai yang manam pyaw ai hte hkamja lam a matu mung hkrak ai.Hpa majaw nga yang hpagyi ru gaw bacteria ana kanu ni hpe ning hkap kau ya lu ai shingra latung sat tsi langai rai nga ai.Ga shadawn bacteria a majaw byin ai kan mase ai zawn re ai ana ni hte lu sha rin mang hkang ni hpe makawp maga ya lu ai.Thai lu sha ni hta gaw hpagyi ru hpe bang sha lang law ai hpe mu lu nga ai.

Hpagyi ru a hkamja lam akyu bai langai mi gaw cancer hpe dang lu ai.Hpagyi ru hta hkum hkrang hpe jam jau jaw jahten shaza ya ai free radical ni hpe ning hkap gasat lu ai anti-oxidant dat atsam rawng ai majaw cancer hpe ning hkap gasat ai hta grai garum ya lu nga ai.

Hpyi hkamja lam a matu kaja ai – hpagyi ru gaw hpyi hta byin chye ai bum ai zawn re ai ana ni hpe tang du ai hku hkyamsa shangun lu ai.Nshu lamut hta kap ai ana kanu hte bacteria ana kanu shang ai majaw byin ai ana ni tsi shamai ai hta akyu jashawn jai lang mai ai.Hpagyi ru hta rawng ai anti-oxidant rai gaw sumbraw hte kaga hpyi hta byin chye ai ana ni hpe hkyamsa mai tsai shangun lu ai.

Kan mase mai ai – hpagyi ru hta lawm ai sau dat gaw lu sha rin ai magam hpe kaja shangun ai,bai hpagyi hta kan mase ai hpe hkyamsa shangun lu ai drup pound ni mung grai law rawng ai hte kraw galau madawn mayu ai hpe hkyamsa shangun lu ai.

Lu sha rin kaja ai – shat mai lu sha shadu ai shaloi hpagyi ru hpe htu bang nna shadu ai rai yang lu sha rin kaja ai atsam rawng ai re majaw lu sha rin ai hta kaja dik garum ya lu nga ai.Kalang lang n gup nmu,lu sha sha nmu ai ten ni hta hpagyi ban a manam pyaw bat wai nga ai sama lu jang,lu sha sha mayu ai myit byin shangun ai ten ni mung nga nga ai.Bai nna hpagyi ru gaw bum machyi ai ana hpe hkyamsa shangun lu ai zawn num kasha ni shata shagu hkam sha ra ai hkra lang ai ten kan machyi,lasa kang machyi rai nga n pyaw ai lam ni hpe mung hkyamsa shangun lu nga ai lam machye machyang ni hpe garan kachyan ya dat lu ga ai.