Hpagyi Hta Na Lu La Mai Ai Hkamja Lam Akyu Ni

Hpagyi a manam pyaw la ai sama hpe ra ai masha ni law nga ga ai zawn hpagyi sama nra ai masha ni mung gaw nga ma ai re.Ndai hpagyi hpe manam pyaw shakau shaban langai hku nna madung jai lang lu sha nga ai hte hpagyi gaw hkum hkrang a matu ra kadawn ai dat atsam ni law law hpe jaw ya lu ai lu sha langai mung rai nga ai.

Hpagyi hta rawng ai lu sha dat atsam ni gaw mawm dat,magnesium,hpri dat hte maganic dat,bai vitamin C,vitamin K hte protein dat,calcium,phosphorus,potassium,thiamine,niacin hte carotene dat ni rawng ai lu sha rai nga ai majaw lu sha n-gun dat law ai nam lap hku nna masat da hkrum ai hta lawm nga ai re.

Hpagyi hta na lu la mai ai hkamja lam akyu law law nga ai hta na anhte a matu grau akyu rawng na zawn re ai hpe tsun ga nga yang hpagyi gaw (LDL) ngu ai n kaja ai cholesterol hpe shayawm shaprai kau ya lu nna (HDL) ngu ai kaja ai cholesterol hpe shalaw jat ya lu nga ai.Dai sha n-ga lu sha rin shamyit n-gun hpe kaja shangun lu ai zawn sin a magam bungli ni hpe madi shadaw garum ya lu nga ai.

Hpagyi gaw jitdwi ana lu ai masha ni sha ya na kaja ai lu sha mung rai nga ai.Hpa majaw nga yang hpagyi sha ya ai gaw insulin dat pru wa hkra jasu alun ya nna sai kata na jumdwi dat hpe shayawm ya lu nga ai.Hpagyi hta rawng ai vitamin K gaw Alzheimer ana nbyin hkra makawp maga ya lu ai.Vitamin A gaw sinwawp cancer ana nbyin hkra makawp maga ya lu ai.Nra hkri hkraw lami laman bum machyi ana hpe makawp maga ya lu ai majaw gout ana zawn re ai lami laman bum makret machyi ai ana kaw na makawp maga ya lu ai.Hpagyi hta rawng ai antioxidants ni gaw myi hte seng ai ana ni nbyin hkra makawp maga ya lu ai.Hpagyi hta e shayi num ni madung ra kadawn ai hpri dat alaw ahtam rawng ai rai nna sai n-gun yawm ana nbyin hkra garum ya lu nga ai.Bai nna maju lasa hte seng ai hpe garum ya ai majaw nyan marai atsam hpe sharawt ya lu ai akyu hpagyi sha nna lu la mai nga Hpagyi hta mawm dat grai law rawng ai majaw malu masha rin shamyit ai magam hpe kaja shangun nna kan kaja,kan sa man ai majaw kan chyat kan shing dang ai mang hkang n nga sai.Shaloi gaw pu kaba cancer ana byin lu masa hpe shayawm kau ya lu nga ai. Hpagyi gaw sai shadawn shadang hte n kaja ai cholesterol sau dat ni hpe shayawm kau ya lu ai majaw sai rawt ana lu ai masha ni sha ya na htap htuk nga ai.

Sade ana lu ai masha ni a matu mung hpagyi lap hpe shadu lu ya jang hkyamsa lu ai lam sawk sagawn magam lam galaw ai ni madi shadaw tsun da nga ai.Tsi hka hku shadu lu na ladat gaw hpagyi lap nhpang 10 – 15 daram hpe hka gawm kaba mi bang da ai hpun lum di hta loi kaji ji di atawk ahkak nhtawm minutes (10) daram shadu dat u.Dai hpang di  htawn la nna hpagyi lap ni hpe shaw kau nhtawm shadu ntsin hpe sha shakawp katsi lu ya mai ai.Ndai ladat hte sade ana nbyin hkra makawp maga la mayu ai masha ni rai yang bat mi hta kalang dang lu ya mai ai zawn sade ana machyi taw ai masha ni rai yang gaw shani shagu shadu lu ya na kaja ai lam tsun da nga ai.

Hpagyi gaw hkum hkrang kata na maza mala gung ni hpe kashin jasan kau ya ai hta grai atsam rawng ai hte hpagyi hta e n-gun ja ai antioxidants ni rawng ai majaw sade a magam bungli galaw ai hpe n-gun bai rawng wa shangun nna cell ni n-gun bai rawng wa hkra mung garum ya lu nga ai.

Tsawra ai shiga madat nu wa hpunau ni hpa malu masha hpe raitim ra ai hta jan nna grai law sha jang mung akyu yawm ai lam bai byin shangun lu nga ai.Dai hte maren hpagyi hpe mung grai law sha jang hkamja lam hta hkra machyi dingbai dingna jaw ai lam ni bai byin wa shangun lu ai hpe tsun shadum ya mayu ai.Hpagyi grai law sha jang dat nhtuk ai lam byin wa chye ai,ma hkum rai taw ai kanu num ni hta rai jang hkri tung na ma hta hemoglobin mang hkang byin wa chye ai,hpagyi hta rawng ai Myristicin a majaw hkri tung na ma salum gumlawt shadang galai mat chye ai mang hkang lam ni nga wa chye ai majaw shadawn sharam rai nna gaw sha chye na ra ga ai.