Hkumli Tsin Lap Makrung A Hkamja Lam Akyu Ni

Hkumli tsin makrung mung hkamja lam akyu law law hpe jaw ya lu lusha langai hta lawm nga ai re. Wa hkum makrung sha ai nga tim, hkum pak makrung hpe sha, sha law chye ga ai re. Ndai hkumli tsin makrung mung shadu sha, kyaw gangau sha, shadu kaprawng nna ahtawk sha rai tinang ra ai ladat amyu myu hte shadu mai ai shat mai kaja lu sha langai rai nga ai.

Hkumli tsin makrung hta hkum hkrang hpe akyu jaw ai dat atsam ni mung law law rawng nga ai. Dai lu sha dat hpan ni gaw sau dat, carbohydrate dat, hka dat, mawm dat, protein dat, sodium dat, potassium dat, phosphorus, calcium, magnesium, hpri dat, iodine dat, vitamin A, vitamin C, vitamin E, vitamin B6 hte calorie dat ni rawng nga ai.

Rai yang hkumli tsin makrung hpe sha nna kaning re ai hkamja lam akyu ni anhte lu la mai na ga ai kun ngu ai hpe hka ja yu ai shaloi (1) salum hkam ja ai – hpa majaw nga yang hkumli tsin makrung hta cholesterol lawm shadang grai n law ai re majaw salum hkamja na matu garum ya lu ai. Sai gayin shamu shamawt ai hpe kaja shangun nna salum sai lam lasa ni hpe n gun rawng hkamja shangun ai hte salum a magam bungli hpe kaja shangun lu nga ai re.

Sade hkamja ai – hpa majaw rai na kun hkumli tsin lap makrung gaw hkum hkrang kraw kan kata na gung maza mala ni hpe la shaprai kau ya nna sade hpe jasan jaseng ya lu ai. Hkumli tsin makrung sha ai rai yang jit sa hka hkaw kaja nna jit sa lam hkam kaja hkra garum ya lu ai hte sade hta n lung nrawng hkra mung garum ya lu nga ai.

Lusha rin kaja ai – hkumli tsin lap makrung hta mawm dat grai law rawng ai gaw lusha rin shamyit kaja ai hpe garum ya lu nga ai. Bai nna kan chyat ai, kan shabung ai, kan nbung machyi ai lam ni nbyin hkra mung garum ya lu ai.

Nsa sa lam hkamja ai – hkumli tsin makrung sha ai gaw sinwawp hpe hkamja shangun ai zawn nsa sa n hkru, n sa sa chyat ai hte dat n htuk ai lam ni hpe mung hkyamsa shangun lu nga ai.

Hkum num nak yawm ai – hkumli tsin makrung hta calorie rawng shadang yawm nna mawm dat grai law rawng ai re majaw kaw si lawan ai lam n byin ai. Lu sha sha mayu ai myit hpe shayawm ya lu ai.Dai gaw hpum shayawm mayu ai masha ni a matu garum ya lu ai lam rai nga ai. Ya sha tsun mat wa sai ndai lam ni gaw hkumli tsin makrung sha nna lu la mai ai hkamja lam akyu ni rai nga ai.

Hkum hkrang hkamja lam a matu akyu law law hpe jaw ya lu ai lu sha re nga tim hkumli tsin makrung hpe n mai sha ai masha ni, koi gam ra ai masha ni mung nga ai hpe gaw anhte chye tawn da na ra ga ai. Hkumli tsin makrung hpe n mai sha ai, koi gam ra na masha ni gaw jitdwi ana lu ai masha ni, sai rawt ana lu ai masha ni, ma kaji ni hte ma hkum rai taw ai kanu num ni gaw koi gam lu yang kaja ai,  mai byin ai rai yang sarawun hte shawng san jahkrum yu nna sha ai gaw kaja dik rai nga ai ngu nna mung tsun shadum mayu ai. Shingrai tsawra ai shiga madat nu wa hpunau ni hkumli tsin si hpe lusha shat mai shadu sha ga ai zawn hkumli tsin lap makrung hpe mung shat mai lusha shadu sha nna hkum hkrang a hkam kaja ai akyu hpe hkam la nga ga law.

Lamang tang madun shana ya ai - Julia Ja Ing