HKRISMAT YUP TUNG MISSA

Hkrismat Poi du shang wa ai Dec 24 ya shana yup tung ten wa n rai tim, ni htep ai aten hpe masat la nhtawm, hpung shawa shang lawm ai nawku dawjau hpawng lamang rai nga ai. Kahtawlik nawku hpung masha ni a matu gaw, yup tung Missa Hkungga nawng jau let Karai Kasang hpe nawku dawjau ai lam rai nga ai.

Ndai htunghking lailen galoi kaw nna hpang wa ai?

Shaning 430 AD–ning hta Hpung Woi Ningbaw rai nga ai Pope Sixtus III kaw nna woi hpang wa ai lam labau hta mu lu ai. Roma mare daju kaw nga ai San Pra ai Maria a nawku htingnu kaba ( Basilica of St.Mary Major) hta Yup Missa Hkungga nawng ya let nawku dawjau sai. Jawprat 16 ( 16th Century) hta gaw shara shagu hkan galaw taw nga sai hpe chye lu ai. Ndai htung hking gaw lani hte lani mying dan hkung wa hpe mu lu ai.

Kahtawlik Nawku Hpung hta Hkrismat shaloi Missa Hpan 4 hpe nawng ya ai lam nga ai. Dai ni gaw; Christmas Vilgil Mass, Midnight Mass, Dawn Mass hte Day Mass ni rai nga ma ai. December 24 shana de jau e nawng ya ai hpe Christmas Vilgil Mass ngu nhtawm, shana nsin tsawm ra sin hpang e nawng ya ai hpe Midnight Mass nga shamying ai. Yup tung e nan n rai tim, nari hkying 9:00 pm hpang na hpe yup tung ngu nna shamying lang ai hku rai nga ai. December 25 hta jahpawt jau e nawng ya ai hpe Dawn Mass ngu nhtawm shani e nawng ya ai hpe Day Mass ngu shamying ai.

Midnight Mass hpe Kahtawlik Nawku Hpung sha n rai, sinna mungdan hkan gaw Anglican Hpung & Lutheran Hpung ni mung Dec 24 shana hpawng de let nawku dawjau ai lam nga ma ai.
Shangai wa Hkye La Madu hpe kamsham, tsawra let nawku dawjau shakawn kungdawn nga ga law..Amen.

By:John Lawn