Hkam Kaja Lam Hpe Akyu Jaw Ai Ginsap Tsip

Ginsap Tsip Jahkraw

Ginsap si hpe naw hkalung ai ten hta shat mai lusha hku nna sha ga ai re. Kung nna hkraw mat sai ginsap si hpe gaw di, ban hka wawn kashin ai shaloi di larut hku nna lang ai, hka shin ai shaloi u grwi tsai na matu arut lang ai, lagaw lata kashin ai shaloi ugrwi kanun jai lang nga ga ai re.

Ndai ginsap tsip jahkraw  gaw ya na zawn  akyu jashawn jai lang mai ai zawn hkum hkrang hkam kaja lam a matu mung akyu jaw ai lam hkam kaja lam hte seng ai website ni hta tang madun da ai hpe mu lu ai.

Hkam kaja lam hta gara hku akyu jaw ai re kun ngu ai hpe hka ja yu ai shaloi lami laman machyi ana hpe shamai ya lu ai lam tsun da nga ai. Dai majaw lami laman hkri hkraw machyi ai masha ni, machyi ai shara hta ginsap tsip hpe ahkyen hkayawp shakap da ya ai rai yang mai tsai lu ai lam tsun da nga ai.

Jitdwi saidwi ana a matu kaja ai – jitdwi saidwi ana lu ai masha ni ginsap tsip hpe hka hpunglum a kahtet re ai hta tsing nna shani shagu lu ya jang hkyamsa mai tsai lu ai lam tsun da ai. Tsing lu na ginsap tsip hpe garai n tsing shi yang hka hpunglum hte shawng asan rai kashin kau ra ai, dai hpe katsi shakawp da nna hka tsai hkra shup kau u.

Dai hpang hka hpunglum a kahtet re ai hta tsing nna magap chyip di da ra ai. Minutes ( 15 ) daram tsing da ai hpang lu mai sai. Dai ginsap tsip tsing da ai hka gawm shing nrai, magap chying ai ndum hta ginsap tsip nam chyim hkoi mat ai du hkra hka hpunglum bai bang nna shani tup lu ya mai ai. Tinang tsing lu na ginsap tsip kaji kaba hta hkan nna gawm mi a matu ram daw rai  sharam daw la nna tsing lu u. Dai gaw jitdwi ana lu ai ni a matu shingra tsi kaja langai rai nga ai.

Ginsap tsip hpe hka shin ai shaloi ugrwi kanun lang ga ai re. Dai mung hkum hkrang hta sai ginrawn shamu shamawt ai hpe kaja shangun lu ai hte hpyi kang madi tsawm lu ai akyu ni hpe lu la mai ai. Kashung ta aten byin chye ai hpyi hkraw gapran gaya ai, lagrat grat ai lam nbyin hkra mung makawp maga ya lu ai. Dai majaw hpyi hkam kaja tsawm htap lu na matu ginsap tsip hpe jai lang nna ugrwi kanun ga ngu n gun jaw mayu ai. Anhte bum ga mare kahtawng hkan gaw ginsap tsip hpe mari nra ai sha naw lu lang mai ga ai re. Myo mare kaba hkan nga ai ni mung gat hkan mari la nna akyu jashawn jai lang let hkam kaja lam akyu hpe hkam la nga ga.

Naw hkalung ai ginsap si hpe shat mai shadu sha ai mung hkam kaja lam akyu law law hpe jaw ya lu nga ai.Ginsap si hta carbohydrate hte vitamin A, vitamin B6, vitamin C potassium dat, magri dat ,shingra sau dat hte nprang dat ni rawng ai lam chye lu ai.

Dai re majaw ginsap si hkalung hpe shat mai shadu sha ai gaw cholesterol hpe shayawm kau ya nna kan chyat, kan shadang ai lam n byin hkra makawp maga ya lu ai sha n ga, hkum num nak hpe shayawm kau ya lu ai hte hkum hkrang kata hta nga ai gung maza ni hpe mung jasan jaseng shapraw kau ya lu ai atsam rawng ai. Myi hte seng ai mang hkang lam ni n byin hkra makawp maga ya lu ai.

Jitdwi ana nbyin hkra mung makawp maga ya lu ai, lami laman machyi hkyamsa ai, sai n gun yawm ai hpe shamai ya lu ai, baw chyen machyi hkyamsa lu ai hte bawnu hkam kaja lam a matu mung akyu jaw lu ai lusha kaja rai nga ai majaw shiga madat ni yawng akyu jashawn lu sha jai lang chye nna hkam kaja ai akyu hpe hkam la ga ngu garan kachyan ya dat lu ga ai.

 

By - Julia Ja Ing 

Add new comment

2 + 4 =